UPI: యూపీఐ పేమెంట్స్ చేసే వారికి అలర్ట్.. రూ.60 వేలు వస్తే నోటీసులు రావొచ్చు

UPI: ప్రస్తుత కాలంలో ప్రతి చిన్నదానికి డిజిటల్ పేమెంట్స్ చేయడం సర్వసాధారణం అయిపోయింది. అయితే కేవలం పెద్ద మొత్తంలో లావాదేవీలు జరిగే వారికే కాదు, చిన్న మొత్తాలు వాడే వారికి కూడా ఆదాయపు శాఖ నుంచి నోటీసులు అందే అవకాశం ఉంది. మీ బ్యాంక్ ఖాతాలో డిక్లేర్ చేసిన ఆదాయం కంటే అదనంగా డబ్బు కనిపిస్తే ట్యాక్స్ డిపార్ట్‌మెంట్ ఎప్పుడైనా ఆరా తీయవచ్చు. యూపీఐ లావాదేవీలకు సంబంధించి ఎలాంటి వార్షిక మినహాయింపు పరిమితి లేనందున ప్రతి చిన్న లెక్కను జాగ్రత్తగా చూసుకోవడం చాలా ముఖ్యం.

సాధారణంగా ప్రజలు లక్షల్లో లావాదేవీలు చేస్తేనే ట్యాక్స్ అధికారులు గమనిస్తారని భావిస్తుంటారు. కానీ కేవలం రూ.60వేలు ఖాతాలో అదనంగా వచ్చి పడినా, ఆ డబ్బు ఎక్కడి నుంచి వచ్చిందో సరైన సమాధానం చెప్పలేకపోతే కష్టాల్లో పడాల్సి వస్తుంది. ఆదాయపు శాఖ చట్టం నిబంధనల ప్రకారం ఖాతాలోకి వచ్చే ప్రతి అన్యధా సొమ్ముకు స్పష్టమైన ఆధారాలు ఉండాలి. ఆదాయానికి మించి లావాదేవీలు జరుగుతున్నప్పుడు మొత్తం వివరాలు సమర్పించలేకపోతే విచారణ ఎదుర్కోవాల్సి వస్తుంది.

చాలా మంది స్నేహితులతో కలిసి షాపింగ్ చేసినప్పుడు లేదా ఎవరికైనా డబ్బులు పంపాల్సినప్పుడు తమ ఖాతా ద్వారా ఇతరులకు నగదు బదిలీ చేస్తుంటారు. ఇలాంటి పనులు చూడటానికి చిన్నవిగా అనిపించినప్పటికీ పెద్ద సమస్యలకు దారి తీస్తాయి. మరొకరి డబ్బును మీ అకౌంట్ ద్వారా వేరే వాళ్లకు పంపడం వల్ల మీ అకౌంట్ లావాదేవీల రికార్డు తప్పుగా మారుతుంది. ఇది మనీ మ్యూల్ ఖాతాల తరహాలో అనుమానాలకు తావిస్తుంది. కాబట్టి ఇతరుల లావాదేవీలను మీ వ్యక్తిగత ఖాతాల ద్వారా నిర్వహించడం మానుకోవడం మంచిది.

చిన్న వ్యాపారులు, ట్యూషన్ చెప్పే వారు, ఫ్రీలాన్సర్లు తమ వ్యక్తిగత ఖర్చులు అలాగే వృత్తిపరమైన ఆదాయాన్ని ఒకే బ్యాంక్ ఖాతాలో నిర్వహించకూడదు. వ్యాపార లావాదేవీల కోసం ప్రత్యేకంగా వేరే ఖాతాను ఉపయోగించడం ద్వారా ఎలాంటి గందరగోళం ఉండదు. కర్ణాటకలో కొందరు చిరు వ్యాపారులు ఇతరుల పేమెంట్లను తమ ఖాతా ద్వారా తీసుకోవడం వల్ల ఇబ్బందులు పడిన ఉదాహరణలు ఉన్నాయి. ఈ డిజిటల్ యుగంలో ప్రతి రూపాయికి సంబంధించిన లెక్కలను పక్కాగా ఉంచుకోవడం ద్వారా భవిష్యత్తులో వచ్చే ట్యాక్స్ సమస్యల నుంచి సులభంగా రక్షించుకోవచ్చు.