Upstox US Stocks: భారత్ నుంచే Apple, Tesla, Google షేర్లలో పెట్టుబడి

భారతీయ పెట్టుబడిదారులకు అంతర్జాతీయ స్టాక్ మార్కెట్లలో పెట్టుబడులు పెట్టేందుకు మరో అవకాశం అందుబాటులోకి వచ్చింది. ప్రముఖ పెట్టుబడి వేదిక అప్‌స్టాక్స్‌ సోమవారం అమెరికా స్టాక్స్‌ పెట్టుబడి సేవలను తన వేదికపై ప్రారంభించింది. దీంతో భారతీయులు అప్‌స్టాక్స్‌ యాప్‌ ద్వారా అమెరికా మార్కెట్లలో లిస్టైన 8,000కు పైగా షేర్లు, 2,000 ఎక్స్ఛేంజ్‌ ట్రేడెడ్‌ ఫండ్స్‌ (ఈటీఎఫ్‌లు)లో కొనుగోలు, విక్రయాలు చేయవచ్చు.

ఈ సేవ ద్వారా యాపిల్‌, టెస్లా, అమెజాన్‌, గూగుల్‌ వంటి ప్రముఖ అంతర్జాతీయ కంపెనీల షేర్లలోనూ పెట్టుబడి పెట్టే అవకాశం లభిస్తుంది. పెట్టుబడిదారులు కేవలం ఒక డాలర్‌ నుంచే పెట్టుబడిని ప్రారంభించవచ్చు. ఇందుకోసం ఫ్రాక్షనల్‌ ఇన్వెస్టింగ్‌ సదుపాయాన్ని అందుబాటులోకి తీసుకొచ్చింది. అంటే పూర్తి షేర్‌ను కొనుగోలు చేయాల్సిన అవసరం లేకుండా.. ఒక షేర్‌లో కొంత భాగాన్ని కూడా సొంతం చేసుకోవచ్చు.

అంతర్జాతీయ పెట్టుబడులు భారతదేశ సంపద వ్యవస్థలో తదుపరి కీలక వృద్ధి దశగా మారనున్నాయని అప్‌స్టాక్స్‌ సీఈఓ, సహ వ్యవస్థాపకుడు రవి కుమార్‌ తెలిపారు.

రూపాయలతోనే ఖాతాకు నిధులు

పెట్టుబడిదారులు తమకు అనుకూలమైన భారతీయ బ్యాంకు ఖాతాల నుంచి రూపాయల్లో అప్‌స్టాక్స్‌ ఖాతాకు నిధులు జమ చేయవచ్చు. ఆ మొత్తాన్ని అమెరికా డాలర్లలోకి మార్చి అమెరికా స్టాక్స్‌లో పెట్టుబడులకు వినియోగించే అవకాశం ఉంటుంది.

అమెరికా మార్కెట్‌ ట్రేడింగ్‌ సమయాలు ముగిసిన తర్వాత కూడా ఆర్డర్లు పెట్టేందుకు అప్‌స్టాక్స్‌ ఆఫ్టర్‌ మార్కెట్‌ ఆర్డర్స్‌ (ఏఎంఓ) సదుపాయాన్ని అందిస్తోంది. దీంతో మార్కెట్‌ ట్రేడింగ్‌ సమయాలకు వెలుపల కూడా పెట్టుబడిదారులు తమ ఆర్డర్లను నమోదు చేసుకోవచ్చు.

అమెరికా స్టాక్స్‌ పెట్టుబడి సేవలను ప్రారంభించడం ద్వారా అప్‌స్టాక్స్‌ తన సంపద నిర్వహణ సేవలను భారతీయ షేర్లు, డెరివేటివ్స్‌, మ్యూచువల్‌ ఫండ్స్‌, ఐపీఓలు, బీమా వంటి విభాగాలకు మించి విస్తరిస్తోంది. భారతీయ పెట్టుబడిదారులకు దేశీయ మార్కెట్లతో పాటు అంతర్జాతీయ పెట్టుబడి అవకాశాలను కూడా ఒకే వేదిక ద్వారా అందించడమే ఈ విస్తరణలో భాగంగా ఉంది.