WFH: ఆఫీసుకు వెళ్లాలా? ఇంటి నుంచే పనిచేయాలా? భార‌తీయ ఉద్యోగుల ఆలోచ‌న ఏంటో తెలుసా.?

WFH: క‌రోనా మహమ్మారి తర్వాత ప్రపంచవ్యాప్తంగా ఉద్యోగ విధానంలో పెద్ద మార్పు వచ్చింది. ముఖ్యంగా వర్క్ ఫ్రం హోమ్ ఉద్యోగులకు కొత్త అనుభవాన్ని అందించింది. అయితే ఇప్పుడు ఉద్యోగులు పూర్తిగా ఇంటి నుంచే పని చేయాలనుకుంటున్నారా? లేక ఆఫీసుకు వెళ్లడానికే ఆసక్తి చూపుతున్నారా? తాజాగా విడుదలైన ఓ సర్వే దీనిపై ఆసక్తికర విషయాలను వెల్లడించింది.

హైబ్రిడ్ వర్క్ మోడల్‌కే ఎక్కువ మంది మద్దతు

గ్రేట్ ప్లేస్ టు వర్క్ ఇండియా – వాయిస్ ఆఫ్ ఇండియా 2025 సర్వే ప్రకారం, ఉద్యోగులకు ఎంపిక ఇస్తే 39 శాతం మంది హైబ్రిడ్ వర్క్ మోడల్‌నే ఇష్టపడుతున్నారు. ముఖ్యంగా టెక్నాలజీ, ప్రొఫెషనల్ సర్వీసెస్ రంగాల్లో పనిచేసే ఉద్యోగులు ఈ విధానానికి ఎక్కువ ప్రాధాన్యం ఇస్తున్నారు. ప్రస్తుతం కంపెనీలు ఉద్యోగులు ఎక్కడి నుంచి పని చేస్తున్నారు అనే దానికంటే, వారు ఎంత సమర్థంగా పని చేస్తున్నారు అనే విషయానికే ఎక్కువ ప్రాధాన్యం ఇస్తున్నాయి.

హైబ్రిడ్ వర్క్ మోడల్ అంటే ఏమిటి?

హైబ్రిడ్ వర్క్ మోడల్ అంటే వర్క్ ఫ్రం హోమ్‌తో పాటు వర్క్ ఫ్రం ఆఫీస్ రెండింటి కలయిక. ఈ విధానంలో ఉద్యోగులు వారానికి రెండు లేదా మూడు రోజులు ఆఫీసుకు వెళ్లి, మిగతా రోజులు ఇంటి నుంచే పని చేస్తారు. దీంతో ఇంటి సౌకర్యంతో పాటు, ఆఫీసులో సహోద్యోగులతో కలిసి పనిచేసే అవకాశం కూడా లభిస్తుంది. అందుకే చాలా మంది ఉద్యోగులు ఈ విధానాన్ని ఇష్టపడుతున్నారు.

హైబ్రిడ్ విధానం వల్ల కలిగే ప్రయోజనాలు

హైబ్రిడ్ వర్క్ మోడల్ ఉద్యోగులు, కంపెనీలు రెండింటికీ ఉపయోగకరంగా ఉంటుంది. కొద్ది రోజులు ఇంటి నుంచి, మరికొన్ని రోజులు ఆఫీసు నుంచి పని చేసే అవకాశం ఉంటుంది. ఉద్యోగం, వ్యక్తిగత జీవితానికి మధ్య మంచి సమతుల్యత ఏర్పడుతుంది. ఉద్యోగుల సంతృప్తి పెరుగుతుంది. ఉద్యోగులు సంస్థను వదిలి వెళ్లే అవకాశం తగ్గుతుంది. కంపెనీలకు మంచి ప్రతిభ ఉన్న ఉద్యోగులను ఆకర్షించడం సులభమవుతుంది. ప్రయాణ సమయం, ఖర్చు కూడా కొంత వరకు తగ్గుతుంది.

వర్క్ ఫ్రం ఆఫీస్ పూర్తిగా ముగిసిపోతుందా?

ఈ సర్వే ప్రకారం వర్క్ ఫ్రం ఆఫీస్ పూర్తిగా ముగిసే అవకాశం లేదు. కొన్ని రంగాల్లో ఉద్యోగులు కార్యాలయం లేదా పని ప్రదేశంలో ఉండటం తప్పనిసరి. ముఖ్యంగా తయారీ (మాన్యుఫ్యాక్చరింగ్), ఉత్పత్తి (ప్రొడక్షన్) రంగాల్లో ప్రత్యక్షంగా పనిచేయాల్సి ఉంటుంది.

కొన్ని రంగాల్లో ఇప్పటికీ ఆఫీసు విధానానికే ప్రాధాన్యం

సర్వే ప్రకారం మాన్యుఫ్యాక్చరింగ్, ప్రొడక్షన్ రంగాల్లో 72 శాతం మంది ఉద్యోగులు ఇప్పటికీ కార్యాలయం లేదా పరిశ్రమల్లోనే పని చేస్తున్నారు. అలాగే ఆన్‌సైట్ విధానంలో పనిచేస్తున్న ఉద్యోగుల్లో 59 శాతం మంది తమ కంపెనీ కార్యాలయం లేదా ఫ్యాక్టరీ నుంచే విధులు నిర్వహిస్తున్నారు.