Credit Card: యాడ్ ఆన్ క్రెడిట్ కార్డు అంటే ఏంటి.? దీని ఉప‌యోగం ఏంటో తెలుసా.?

Credit Card: కుటుంబ సభ్యుల అవసరాల కోసం ఒకే క్రెడిట్‌ కార్డు ఖాతాను ఉపయోగించాలనుకునేవారికి యాడ్‌-ఆన్‌ క్రెడిట్‌ కార్డు సౌకర్యవంతమైన ఎంపిక. ప్రైమరీ కార్డుదారుడి ఖాతాకు అనుబంధంగా ఈ కార్డును కుటుంబ సభ్యులకు జారీ చేస్తారు. ఈ కార్డుకు సంబంధించిన పూర్తి వివ‌రాలు ఇప్పుడు చూద్దాం.

ఒకే క్రెడిట్‌ పరిమితి.. ఖర్చులు మాత్రం ఇద్దరివి

యాడ్‌-ఆన్‌ కార్డుకు ప్రత్యేక కార్డు నంబర్, పిన్‌ ఉండొచ్చు. కానీ అది ప్రత్యేక క్రెడిట్‌ ఖాతా కాదు. ప్రైమరీ కార్డుతో అనుసంధానమైన అదే ఖాతాలో భాగంగా పనిచేస్తుంది. ఉదాహరణకు మీ ప్రధాన క్రెడిట్‌ కార్డు లిమిట్‌ రూ.4 లక్షలు ఉందనుకుంటే, కుటుంబ సభ్యుడికి యాడ్‌-ఆన్‌ కార్డు ఇచ్చిన తర్వాత మొత్తం పరిమితి రూ.8 లక్షలకు పెరగదు.

రెండు కార్డులతో చేసే లావాదేవీలకు కలిపి అందుబాటులో ఉన్న పరిమితి రూ.4 లక్షలే. అందువల్ల కుటుంబ సభ్యులు ఎక్కువ మొత్తంలో ఖర్చు చేస్తే ప్రైమరీ కార్డుదారుడికి అందుబాటులో ఉండే క్రెడిట్‌ పరిమితి వేగంగా తగ్గిపోతుంది. ఈ పరిస్థితి పెద్ద మొత్తంలో వ్యక్తిగత ఖర్చులు చేయాల్సిన సమయంలో ఇబ్బందికి దారితీయొచ్చు. అందుకే యాడ్‌-ఆన్‌ కార్డు ఇచ్చే వ్యక్తి, దాని ద్వారా నెలకు ఎంత వరకు ఖర్చు చేయవచ్చో ముందుగానే నిర్ణయించుకోవడం మంచిది.

బిల్లు చెల్లించాల్సింది ప్రధాన కార్డుదారుడే

యాడ్‌-ఆన్‌ కార్డు ఉపయోగించే వ్యక్తి చేసిన ప్రతి లావాదేవీ చివరికి ప్రైమరీ క్రెడిట్‌ కార్డు ఖాతాలోనే నమోదవుతుంది. నెలవారీ స్టేట్‌మెంట్ కూడా ప్రధాన ఖాతాకు సంబంధించినదే. కాబట్టి కుటుంబ సభ్యుడు తన కార్డుతో చేసిన ఖర్చుకు డబ్బు ఇవ్వకపోయినా, బ్యాంకుకు బిల్లు చెల్లించే బాధ్యత మాత్రం ప్రైమరీ కార్డుదారుడిపైనే ఉంటుంది.

ఇక్కడే అసలు జాగ్రత్త అవసరం. కుటుంబ సభ్యుడి ఖర్చులపై సరైన నియంత్రణ లేకపోతే బిల్లు భారీగా పెరిగే అవకాశం ఉంటుంది. అంతేకాదు, మొత్తం బకాయిని గడువులోగా చెల్లించకపోతే వడ్డీ, ఆలస్య రుసుములు వంటి అదనపు భారం పడవచ్చు. అందువల్ల యాడ్‌-ఆన్‌ కార్డు ఉపయోగిస్తున్న వ్యక్తి చేసే ఖర్చులను క్రమం తప్పకుండా పరిశీలించడం అవసరం. కొన్ని బ్యాంకులు ప్రధాన కార్డుదారుడికి అనుబంధ కార్డు ఖర్చులపై ప్రత్యేక పరిమితులు పెట్టుకునే అవకాశం కూడా కల్పిస్తాయి.

రివార్డ్‌ పాయింట్లు, క్రెడిట్‌ స్కోర్‌పై ప్రభావం

రెండు కార్డులు ఉన్నందుకు రివార్డ్‌ పాయింట్లు కూడా రెండింతలు వస్తాయని భావించడం సరైంది కాదు. యాడ్‌-ఆన్‌ కార్డుతో జరిగే కొనుగోళ్లకు లభించే రివార్డులు సాధారణంగా అదే క్రెడిట్‌ కార్డు ఖాతాలోకి చేరతాయి. అంటే కుటుంబ సభ్యుల ఖర్చుల ద్వారా వచ్చిన పాయింట్లు ప్రత్యేకంగా వారి పేరుతో మరో ఖాతాలో నిల్వ కావు. యాడ్‌-ఆన్‌ కార్డు జారీకి సంబంధించి రుసుములు ఉంటాయా లేదా అనేది కార్డు రకం, బ్యాంకు నిబంధనలపై ఆధారపడి ఉంటుంది.

క్రెడిట్‌ స్కోర్‌ విషయంలో కూడా ప్రధాన కార్డుదారుడు అప్రమత్తంగా ఉండాలి. యాడ్‌-ఆన్‌ కార్డుతో చేసిన ఖర్చుల బకాయిలు సకాలంలో చెల్లించకపోతే దాని ప్రభావం ప్రధాన ఖాతాపై పడే అవకాశం ఉంటుంది. మరోవైపు యాడ్‌-ఆన్‌ కార్డు ఉపయోగించడం వల్ల సెకండరీ కార్డుదారుడికి సాధారణంగా స్వతంత్ర క్రెడిట్‌ చరిత్ర ఏర్పడదు.

కాబట్టి భవిష్యత్తులో తమ పేరుతో రుణం తీసుకోవడానికి లేదా క్రెడిట్‌ ప్రొఫైల్‌ నిర్మించుకోవడానికి ప్రయత్నిస్తున్న వారు సొంత క్రెడిట్‌ కార్డు వంటి ప్రత్యామ్నాయాలను కూడా పరిశీలించవచ్చు.

ఖర్చులకు పరిమితి పెట్టుకోవడం చాలా ముఖ్యం

యాడ్‌-ఆన్‌ కార్డు ప్రధాన ప్రయోజనం కుటుంబ ఖర్చులను సులభంగా నిర్వహించుకోవడమే. అయితే అందుబాటులో ఉన్న మొత్తం క్రెడిట్‌ పరిమితిని పూర్తిగా ఉపయోగించడం ఆర్థికంగా మంచిది కాదు. ఉదాహరణకు మొత్తం కార్డు పరిమితి రూ.4 లక్షలు ఉంటే, యాడ్‌-ఆన్‌ కార్డుకు ప్రత్యేకంగా రూ.ల‌క్ష వ‌ర‌కు మాత్రమే వినియోగించేలా పరిమితి పెట్టుకోవచ్చు. ఇలా చేయడం వల్ల అనుకోకుండా అధిక ఖర్చులు జరిగే ప్రమాదాన్ని తగ్గించవచ్చు.

క్రెడిట్‌ కార్డు వినియోగం ఎక్కువైతే తిరిగి చెల్లించాల్సిన మొత్తం కూడా పెరుగుతుంది. అందువల్ల అవసరమైన ఖర్చులకే కార్డును ఉపయోగించడం, నెలవారీ బిల్లును వీలైనంత వరకు పూర్తిగా చెల్లించడం మంచిది. ముఖ్యంగా యాడ్‌-ఆన్‌ కార్డును కుటుంబ సభ్యుడికి ఇచ్చిన తర్వాత లావాదేవీలను ఎప్పటికప్పుడు గమనించాలి. సౌకర్యం కోసం తీసుకున్న ఈ కార్డు అదుపు తప్పిన ఖర్చులకు కారణం కాకుండా ముందుగానే నియమాలు పెట్టుకోవడం ఉత్తమం.