భారత్‌లో ఈవీ విప్లవం పాశ్చాత్య దేశాల కంటే ఎందుకు భిన్నం?

భారత్‌లో ఎలక్ట్రిక్ వాహనాల (EV) విస్తరణ యూరప్, అమెరికాతో పోలిస్తే భిన్నమైన మార్గంలో సాగనుందని ఓ తాజా కథనం పేర్కొంది. దేశంలోని రవాణా వ్యవస్థలో ద్విచక్ర వాహనాలు, ఆటోరిక్షాలు, బస్సులు, రైళ్లు, ప్యాసింజర్ కార్లు వంటి విభిన్న రకాల వాహనాలు ఉండటమే ఇందుకు ప్రధాన కారణంగా తెలిపింది.

యూరప్, అమెరికాలో ఎలక్ట్రిక్ మొబిలిటీ మార్పు ప్రధానంగా ప్యాసింజర్ కార్ల చుట్టూ తిరుగుతుండగా.. భారత్‌లో మాత్రం వేర్వేరు వాహన విభాగాలు ఒక్కో వేగంతో విద్యుదీకరణ చెందనున్నాయని ‘ది పాలసీ ఎడ్జ్’లో ప్రచురితమైన కథనం పేర్కొంది.

కీలక ఖనిజాలకు భారీ డిమాండ్

రాబోయే దశాబ్దాల్లో లక్షలాది ఎలక్ట్రిక్ వాహనాలు భారత రోడ్లపైకి రానున్న నేపథ్యంలో బ్యాటరీల తయారీకి అవసరమైన కీలక ఖనిజాలైన లిథియం, రాగి, నికెల్, కోబాల్ట్కు డిమాండ్ భారీగా పెరిగే అవకాశం ఉంది.

కొన్ని సందర్భాల్లో ఈ ఖనిజాలకు భారత్‌లో ఏర్పడే డిమాండ్ ఇటీవలి ప్రపంచ ఉత్పత్తి స్థాయిలను కూడా అధిగమించే అవకాశం ఉందని కథనం పేర్కొంది.

అయితే దేశంలో వాహనాల వినియోగ విధానం విభిన్నంగా ఉండటంతో ఖనిజాల సరఫరా వ్యవస్థపై ఒత్తిడి అన్ని దశల్లో ఒకే విధంగా ఉండదని తెలిపింది.

మొదట ఈ వాహనాలే ఎలక్ట్రిక్‌గా మారతాయి

భారత్‌లో ఈవీ మార్పు తొలి దశలో ద్విచక్ర వాహనాలు, ఆటోరిక్షాలు కీలక పాత్ర పోషించనున్నాయి. రోజువారీ ప్రయాణాల్లో వీటి వినియోగం అధికంగా ఉండటంతో వీటి విద్యుదీకరణ వేగంగా జరిగే అవకాశం ఉంది.

ఈ మార్కెట్లు క్రమంగా పరిపక్వత సాధించిన తర్వాత కొత్త వాహనాల సంఖ్య పెరగడం కంటే పాత వాహనాలను ఎలక్ట్రిక్ వాహనాలతో భర్తీ చేయడం ప్రధాన వృద్ధి డ్రైవర్‌గా మారుతుందని కథనం పేర్కొంది.

2050 తర్వాత కూడా కార్ల సంఖ్య పెరిగే అవకాశం

ప్యాసింజర్ కార్ల విషయంలో మాత్రం పరిస్థితి భిన్నంగా ఉండనుంది. 2050 తర్వాత కూడా దేశంలో కార్ల సంఖ్య పెరుగుతూనే ఉంటుందని అంచనా. ఫలితంగా మొత్తం వాహనాల వృద్ధి స్థిరపడుతున్న సమయంలోనూ బ్యాటరీలు, కీలక ఖనిజాల వినియోగంలో కార్ల వాటా క్రమంగా పెరగనుంది.

దీంతో భారత్‌లో ఎలక్ట్రిఫికేషన్ ప్రక్రియ కాలక్రమేణా మరింత మెటీరియల్-ఇంటెన్సివ్గా మారే అవకాశం ఉందని నివేదిక తెలిపింది.

2030 నాటికి ఛార్జర్లకు భారీ డిమాండ్

ఈవీల పెరుగుదలతో ఛార్జింగ్ మౌలిక వసతుల అవసరం కూడా భారీగా పెరగనుంది. ముఖ్యంగా ద్విచక్ర, త్రిచక్ర వాహనాల కారణంగా స్లో ఛార్జర్ల డిమాండ్ 2030 నాటికి ఆరు నుంచి తొమ్మిది రెట్లు పెరిగే అవకాశం ఉంది.

మరోవైపు ప్యాసింజర్ కార్ల వినియోగం పెరుగుతున్న కొద్దీ ఫాస్ట్ ఛార్జర్ల విస్తరణ కూడా వేగం పుంజుకోనుంది. ఈ డిమాండ్ రాబోయే దశాబ్దాల్లో కూడా కొనసాగుతుందని అంచనా.

మొత్తంగా భారత్‌లో ఈవీ మార్పు కార్ల ఆధారిత పాశ్చాత్య దేశాల మోడల్‌కు భిన్నంగా.. ద్విచక్ర వాహనాలు, ఆటోలు, బస్సులు, కార్లు వంటి విభిన్న రవాణా విభాగాల సమ్మిళిత విద్యుదీకరణగా కొనసాగనుంది.