Gold Price: తులం బంగారం రూ. 2 లక్ష‌లు కానుందా.? ఒక్క‌రోజులోనే రూ. 13 వేల జంప్

Gold Price: అంతర్జాతీయ మార్కెట్‌లో పెరుగుతున్న ఉద్రిక్తతల ప్రభావంతో భారత బులియన్ మార్కెట్‌లో బంగారం, వెండి ధరలు భారీగా పెరుగుతున్నాయి. ముఖ్యంగా కేవలం వారం రోజుల్లోనే వెండి ధరలు ఏకంగా రూ.20 వేల వరకు పెరగడం మార్కెట్ వర్గాలను ఆశ్చర్యానికి గురి చేసింది. పెట్టుబడిదారులు ఇప్పుడు బంగారం, వెండివైపు ఎక్కువగా మొగ్గు చూపుతున్నారు.

వారంలోనే వెండి ధరలకు భారీ జంప్

ఇటీవల వరకు స్థిరంగా ఉన్న వెండి ధరలు ఒక్కసారిగా భారీగా పెరిగాయి. కొన్ని రోజుల క్రితం కిలో వెండి ధర సుమారు రూ.2.44 లక్షల వద్ద ఉండగా, ఇప్పుడు అది రూ.3 లక్షలు దాటింది. 2026 ప్రారంభం నుంచి ఇప్పటివరకు వెండి ధ‌ర‌లు భారీగా పెరిగాయి. వెండి ధరలు పెరగడానికి ప్రధాన కారణం అంతర్జాతీయ మార్కెట్‌లో డిమాండ్ పెరగడం. పరిశ్రమల వినియోగంతో పాటు పెట్టుబడిదారులు కూడా వెండిలో పెట్టుబడులు పెడుతున్నారు. దీంతో డిమాండ్ మరింత పెరిగి ధరలు రికార్డు స్థాయికి చేరుతున్నాయి.

బంగారం కూడా కొత్త రికార్డులు సృష్టిస్తోంది

వెండి మాత్రమే కాదు, బంగారం ధరలు కూడా వరుసగా కొత్త గరిష్టాలను నమోదు చేస్తున్నాయి. ప్రస్తుతం 24 క్యారెట్ బంగారం ధర 10 గ్రాములకు రూ. 1,67,890కి చేరింది. ఒక్క రోజులోనే ఏకంగా రూ. 13 వేలు పెర‌గ‌డం అంద‌రినీ ఆశ్చ‌ర్యానికి గురి చేస్తోంది. దీంతో త్వరలోనే బంగారం ధర రూ.2 లక్షలకు చేరుతుందా అనే చర్చ మార్కెట్‌లో మొదలైంది.

అమెరికా-ఇరాన్ ఉద్రిక్తతల ప్రభావం

ప్రస్తుతం మధ్యప్రాచ్యంలో పెరుగుతున్న భౌగోళిక ఉద్రిక్తతలు బంగారం, వెండి ధరల పెరుగుదలకు ప్రధాన కారణంగా మారాయి. ముఖ్యంగా అమెరికా-ఇరాన్ మధ్య ఉద్రిక్త పరిస్థితులు కొనసాగుతుండటంతో పెట్టుబడిదారులు సురక్షిత పెట్టుబడులవైపు వెళ్తున్నారు. స్టాక్ మార్కెట్‌లో అనిశ్చితి పెరగడంతో బంగారం, వెండి వంటి విలువైన లోహాలపై విశ్వాసం పెరిగింది. అదే సమయంలో డాలర్ ఇండెక్స్ బలహీనపడటం, అంతర్జాతీయ మార్కెట్‌లో క్రూడ్ ఆయిల్ ధరల్లో హెచ్చుతగ్గులు కూడా బంగారం, వెండి ధరలను మరింత పెంచుతున్నాయి.

అంతర్జాతీయ మార్కెట్‌లో కూడా భారీ పెరుగుదల

ప్రపంచ మార్కెట్‌లో కూడా బంగారం ధరలు చరిత్రాత్మక గరిష్టాలకు చేరుతున్నాయి. అంతర్జాతీయ మార్కెట్‌లో ఔన్స్ బంగారం ధర 4,723 డాలర్ల స్థాయిని తాకింది. ప్రపంచవ్యాప్తంగా కేంద్ర బ్యాంకులు తమ బంగారం నిల్వలను పెంచుతుండటం కూడా ధరల పెరుగుదలకు కారణమవుతోంది.

మార్కెట్ నిపుణుల అంచనాల ప్రకారం, ప్రస్తుతం ఉన్న పరిస్థితులు కొనసాగితే బంగారం, వెండి ధరలు మరింత పెరిగే అవకాశం ఉంది. అందుకే చాలామంది పెట్టుబడిదారులు ఇప్పుడు విలువైన లోహాల్లో పెట్టుబడులను పెంచుతున్నారు.