Zepto IPO: స్టాక్ మార్కెట్ లిస్టింగ్‌కు సిద్ధమైన జెప్టో.. ప్రీ-ఐపీఓ ఫండింగ్ ప్రారంభం

Zepto Pre IPO : క్విక్‌ కామర్స్‌ రంగంలో ప్రముఖ సంస్థ జెప్టో (Zepto) తన ప్రతిపాదిత ఐపీఓకు ముందు కీలక నిర్ణయం తీసుకుంది. స్టాక్‌ మార్కెట్‌లో లిస్టింగ్‌కు ముందు ఈక్విటీ షేర్ల ద్వారా ప్రీ-ఐపీఓ ప్రైవేట్ ప్లేస్‌మెంట్ చేపట్టేందుకు ప్రధాన వాటాదారులతో ఒప్పందం కుదుర్చుకున్నట్లు సంస్థ ప్రకటించింది. కంపెనీ ఆర్థిక బలాన్ని మరింత పెంచడం, నగదు నిల్వలను బలోపేతం చేయడమే ఈ నిర్ణయం వెనుక ప్రధాన ఉద్దేశమని వెల్లడించింది.

జెప్టో తెలిపిన వివరాల ప్రకారం, తాజా పెట్టుబడుల ద్వారా ఇప్పటికే ఉన్న రూ.5,681 కోట్ల నగదు నిల్వలకు మరింత బలం చేకూరనుంది. అలాగే 2026 మార్చి 31 నాటికి కంపెనీపై ఎలాంటి రుణభారం లేదని స్పష్టం చేసింది.

కంపెనీ బోర్డు, వ్యవస్థాపకులకు పబ్లిక్‌ మార్కెట్‌ ఇన్వెస్టర్ల నుంచి లిస్టింగ్‌కు సంబంధించి సానుకూల స్పందన లభించిందని జెప్టో పేర్కొంది. అయితే ప్రస్తుతం కంపెనీ బలమైన ఆర్థిక స్థితిలో ఉన్నందున వ్యాపార విస్తరణపైనే ప్రధాన దృష్టి పెట్టనున్నట్లు తెలిపింది. రాబోయే త్రైమాసికాల ఆర్థిక ఫలితాలతో డీఆర్‌హెచ్‌పీ (DRHP) పత్రాలను నవీకరించి, సెబీ (SEBI) నిర్దేశించిన గడువులోపు ఐపీఓను తీసుకురావాలని యోచిస్తున్నట్లు వెల్లడించింది.

ఈ ప్రైవేట్ ప్లేస్‌మెంట్ ద్వారా కంపెనీ సుమారు 4.5 బిలియన్ అమెరికన్ డాలర్ల (దాదాపు రూ.42,925 కోట్లు) విలువ ఆధారంగా నిధులు సమీకరించనుంది. ఈ పెట్టుబడుల్లో దేశీయ ఇన్వెస్టర్ల వాటా అధికంగా ఉండే అవకాశం ఉందని, ప్రస్తుతం సుమారు 40 శాతంగా ఉన్న భారతీయ వాటాదారుల వాటాను మరింత పెంచడమే లక్ష్యమని తెలిపింది.

గత ఏడాది అక్టోబర్‌లో 7 బిలియన్ డాలర్ల విలువ ఆధారంగా 450 మిలియన్ డాలర్ల పెట్టుబడులు సమీకరించిన జెప్టో, ఈసారి తక్కువ విలువ వద్ద నిధులు సమీకరించడం గమనార్హం.

స్టాన్‌ఫోర్డ్ విశ్వవిద్యాలయం మాజీ విద్యార్థులు ఆదిత్ పాలిచా, కైవల్య వోహ్రా స్థాపించిన జెప్టో, 2025 డిసెంబర్‌లో గోప్య విధానంలో ఐపీఓ ప్రాథమిక పత్రాలను దాఖలు చేసింది. అనంతరం 2026 జూన్‌లో సమర్పించిన తాజా ముసాయిదా ప్రకారం, రూ.8,010 కోట్ల తాజా షేర్ల జారీతో పాటు 11.35 కోట్ల ఈక్విటీ షేర్ల ఆఫర్ ఫర్ సేల్ (OFS) ద్వారా నిధులు సమీకరించాలని కంపెనీ ప్రణాళిక రూపొందించింది.

2025-26 ఆర్థిక సంవత్సరంలో జెప్టో రూ.22,624 కోట్ల ఆదాయాన్ని నమోదు చేసింది. సంస్థ నెట్ రిసీవబుల్స్ విలువ రూ.24,816 కోట్లకు చేరింది. ఏడాది మొత్తం సగటున రోజుకు 17.5 లక్షల ఆర్డర్లు ప్రాసెస్ చేయగా, 2026 మార్చితో ముగిసిన త్రైమాసికంలో ఈ సంఖ్య 23.3 లక్షలకు పెరిగింది. ప్రస్తుతం దేశవ్యాప్తంగా 1,139 స్టోర్లు, దాదాపు 4.8 కోట్ల వార్షిక యాక్టివ్ వినియోగదారులు జెప్టోకు ఉన్నారు.

ఐపీఓ అనంతరం జెప్టో స్టాక్‌ ఎక్స్చేంజ్‌లలో లిస్టయితే, ఇప్పటికే మార్కెట్లో ఉన్న స్విగ్గీ, ఎటర్నల్ సంస్థల క్విక్‌ కామర్స్‌ విభాగాలైన ఇన్‌స్టామార్ట్, బ్లింకిట్లకు ప్రత్యక్ష పోటీగా నిలవనుంది.