Sullurupeta: పాలకురాలు కాదు.. ప్రజల సేవకురాలిని.. ఎమ్మెల్యే విజయశ్రీ

​సూళ్ళూరుపేట: సాధారణంగా ఏదైనా భారీ రాజకీయ కార్యక్రమం ముగిసిన వెంటనే ప్రజాప్రతినిధులు ప్రోటోకాల్ ప్రకారం భారీ పోలీసు బందోబస్తు మధ్య అక్కడి నుంచి హడావిడిగా వెళ్లిపోవడం మనం చూస్తుంటాం. కానీ సూళ్ళూరుపేట ఎమ్మెల్యే డాక్టర్ నెలవల విజయశ్రీ ఇందుకు పూర్తి భిన్నంగా వ్యవహరించి అందరి మనసులను గెలుచుకున్నారు.

పట్టణంలో కూటమి ప్రభుత్వం రెండేళ్ల సంబరాలు, భారీ ర్యాలీ, సభ ముగిసిన అనంతరం భోజన సమయం ఆసన్నమైంది. కార్యక్రమానికి విచ్చేసిన కూటమి నాయకులు, కార్యకర్తలు, వేలాది మంది మహిళలు భోజనాలు చేసేందుకు సిద్ధమయ్యారు. ఆ సమయంలో ఎమ్మెల్యే తన హోదాను పక్కనపెట్టి ఓ సామాన్య గృహిణిలా, ఒక ఆత్మీయ బంధువులా మారిపోయారు.

​వేదిక దిగిన వెంటనే వెళ్లిపోకుండా నేరుగా భోజనశాలకు చేరుకున్న డాక్టర్ నెలవల విజయశ్రీ, స్వయంగా గరిటె పట్టి అందరికీ అన్నం వడ్డించడం ప్రారంభించారు. కార్యక్రమానికి ఎంతమంది మహిళలు, కార్యకర్తలు వచ్చారో వారందరికీ ఎంతో ఓపికగా తన చేతుల మీదుగా భోజనం వడ్డించారు. కేవలం వడ్డించడమే కాకుండా ప్రతి ఒక్కరినీ చిరునవ్వుతో అత్యంత ఆత్మీయంగా పలకరించారు. ఒక ఎమ్మెల్యే స్థాయి వ్యక్తి ఇలా తమ వద్దకు వచ్చి స్వయంగా వడ్డించడం చూసి అక్కడున్న జనం ఆశ్చర్యానికి గురయ్యారు.

​వృత్తిరీత్యా డాక్టర్ అయిన విజయశ్రీ, ప్రజా సేవలోనూ అదే బాధ్యతను కొనసాగిస్తున్నారు. నియోజకవర్గ ప్రజలకు ఎలాంటి ఆరోగ్య సమస్యలు వచ్చినా, తన వైద్య వృత్తి అనుభవంతో భరోసానిస్తూ వారికి అండగా నిలుస్తున్నారు. కేవలం వైద్యానికే పరిమితం కాకుండా, ప్రజలకు ఏ సమస్య వచ్చినా నేరుగా వారితో మాట్లాడుతుంటారు. దగ్గరుండి ప్రతి పనిని పర్యవేక్షిస్తూ, సమస్యల పరిష్కారానికి నిరంతరం కృషి చేస్తారు.

​పదవీ దర్పం ఏమాత్రం లేకుండా ఇంతటి సామాన్యంగా ఉండే నాయకురాలిని చూసి ప్రజలు మురిసిపోయారు. "ఇప్పటివరకు ఎంతోమంది ఎమ్మెల్యేలను చూశాము, కానీ ఇంతటి ఆప్యాయత పంచే ఇలాంటి ఎమ్మెల్యేను మేము ఎన్నడూ చూడలేదు" అంటూ అక్కడున్న వారంతా సంతోషం వ్యక్తం చేశారు.

పదవి కన్నా ప్రజల పట్ల చూపే ప్రేమే గొప్పదని డాక్టర్ నెలవల విజయశ్రీ తన చేతలతో నిరూపించుకున్నారు. ఆకలి తీర్చే అన్నదాతలా ఆమె చూపిన ఈ వాత్సల్యం సభకు వచ్చిన ప్రతి ఒక్కరి హృదయాల్లో చెరగని ముద్ర వేసింది. ప్రజా ప్రతినిధి అంటే పాలకుడు కాదు, సేవకుడు అని ఆమె మరోసారి నిరూపించారు. ఆమె నాయకత్వం పట్ల ప్రజల్లో ఉన్న నమ్మకం రెట్టింపు అయ్యింది. కార్యకర్తల కడుపు నింపిన ఎమ్మెల్యే ఆప్యాయత, నియోజకవర్గంలో ఇప్పుడు చర్చనీయాంశంగా మారింది.