Black Magic: క్షుద్రపూజల అనుమానంతో మూడేళ్ల చిన్నారి హత్య..ఇంటి పక్కనే మృతదేహం
ఉత్తరప్రదేశ్లోని బులంద్షహర్లో క్షుద్రపూజల అనుమానంతో మూడేళ్ల చిన్నారిని దారుణంగా హత్య చేశారు. ఇంటికి కేవలం 40 మీటర్ల దూరంలోని అద్దె గదిలో పాప మృతదేహం లభించింది.
Black Magic
Black Magic: ఉత్తరప్రదేశ్లోని బులంద్షహర్ జిల్లాలో హృదయవిదారక ఘటన చోటుచేసుకుంది. నగర్ కొత్వాలి పోలీస్ స్టేషన్ పరిధిలోని అవంతి నగర్ భూడ్ మొహల్లాలో మూడేళ్ల పసిపాప దారుణ హత్యకు గురైంది. నవంబర్ 21వ తేదీ మధ్యాహ్నం ఆ చిన్నారి ఇంటి నుంచి అకస్మాత్తుగా కనిపించకుండా పోయింది. కుటుంబ సభ్యులు చుట్టుపక్కల అంతా గాలించినా ఆచూకీ దొరక్కపోవడంతో వెంటనే పోలీసులకు ఫిర్యాదు చేశారు. అయితే పాప అదృశ్యమైన ఇంటికి కేవలం 40 మీటర్ల దూరంలోనే ఉన్న ఒక అద్దె గదిలో చిన్నారి మృతదేహం లభ్యమవ్వడం స్థానికంగా తీవ్ర కలకలం రేపింది.
సీసీటీవీ ఫుటేజీ ద్వారా బయటపడ్డ అసలు నిజం
ఫిర్యాదు అందుకున్న వెంటనే పోలీసులు ఘటనా స్థలానికి చేరుకుని దర్యాప్తు ప్రారంభించారు. ముందుగా ఆ వీధిలో ఉన్న సీసీటీవీ కెమెరాల ఫుటేజీని క్షుణ్ణంగా పరిశీలించారు. అందులో చిన్నారి వీధి దాటి ఎక్కడికీ దూరంగా వెళ్లినట్లు కనిపించలేదు. దీంతో పాప చుట్టుపక్కల ఇళ్లలోనే ఉండి ఉంటుందని పోలీసులకు అనుమానం కలిగింది. వెంటనే ఆ ప్రాంతంలోని ఇళ్లన్నింటిలో సోదాలు నిర్వహించారు. ఈ తనిఖీల్లో భాగంగా రోహతాశ్ రాజ్పుత్ ఇంట్లో అద్దెకు ఉంటున్న సోనాలి అనే పొరుగింటి మహిళ గదిలో చిన్నారి మృతదేహం బయటపడింది.
క్షుద్రపూజల కోసం నోరు నొక్కి హత్య చేశారా?
చిన్నారి మృతదేహాన్ని చూసి తల్లిదండ్రులు, బంధువులు కన్నీరుమున్నీరుగా విలపించారు. సమాచారం అందుకున్న బులంద్షహర్ సీనియర్ పోలీస్ సూపరింటెండెంట్ దినేష్ కుమార్ సింగ్ ఘటనా స్థలాన్ని పరిశీలించారు. గదిలో ఉన్న పరిస్థితులను చూస్తుంటే క్షుద్రపూజలు కోసమే చిన్నారి నోరు, ముక్కు మూసి ఊపిరాడకుండా చేసి చంపినట్లు ప్రాథమికంగా అనుమానిస్తున్నామని ఎస్పీ తెలిపారు. ప్రస్తుతం పాప మృతదేహాన్ని పోస్టుమార్టం కోసం ఆసుపత్రికి తరలించామని, అదుపులోకి తీసుకున్న సోనాలిని లోతుగా విచారిస్తున్నామని వెల్లడించారు.
ఢిల్లీ రోడ్డుపై ఆగ్రహ జ్వాల
పసిపాపను ఇంత దారుణంగా పొట్టనబెట్టుకున్నారని తెలియడంతో స్థానికుల్లో ఆగ్రహం కట్టలు తెంచుకుంది. నిందితులను కఠినంగా శిక్షించాలని డిమాండ్ చేస్తూ వందలాది మంది ఢిల్లీ రోడ్డుపైకి వచ్చి బైఠాయించి ట్రాఫిక్ను అడ్డుకున్నారు. పరిస్థితి ఉద్రిక్తంగా మారడంతో ఉన్నతాధికారులు అప్రమత్తమయ్యారు. ఆ ప్రాంతంలో శాంతిభద్రతలు అదుపు తప్పకుండా పలు పోలీస్ స్టేషన్ల బలగాలతో పాటు ఆరుగురు సర్కిల్ ఆఫీసర్లను భద్రత కోసం మోహరించారు.
పోస్టుమార్టం నివేదికపైనే దర్యాప్తు దృష్టి
కేవలం మూడేళ్ల పసికందుపై ఇంతటి కిరాతకానికి ఎవరు పాల్పడ్డారనే కోణంలో పోలీసులు దర్యాప్తు వేగవంతం చేశారు. అసలు సోనాలి ఈ దారుణానికి ఒడిగట్టిందా, దీని వెనుక ఇంకా ఎవరైనా ఉన్నారా, నిజంగానే క్షుద్రపూజలు జరిగాయా అనే విషయాలు పోలీసుల విచారణతో పాటు పోస్టుమార్టం నివేదిక వచ్చిన తర్వాత స్పష్టంగా తేలనున్నాయి.




