Jubileehills CI: ప్రైవేట్ వీడియోలతో బ్లాక్‌మెయిల్.. జూబ్లీహిల్స్ సీఐ శ్రీనివాసులురెడ్డిపై రే*ప్ కేసు

Jubileehills CI: హైదరాబాద్ మహానగరంలో అత్యంత కీలకమైన జూబ్లీహిల్స్ పోలీస్ స్టేషన్ సీఐ శ్రీనివాసులురెడ్డిపై లైంగిక దాడి కేసు నమోదు కావడం పోలీసు శాఖలో తీవ్ర సంచలనం రేపింది. ఒక మహిళ ఇచ్చిన ఫిర్యాదు, ఆమె నమోదు చేసిన అధికారిక వాంగ్మూలం ఆధారంగా సంగారెడ్డి జిల్లా అమీన్‌పూర్ పోలీస్ స్టేషన్‌లో పోలీసులు కేసు నమోదు చేసి దర్యాప్తును వేగవంతం చేశారు. బాధితురాలి ఫిర్యాదుతో సీఐ శ్రీనివాసులురెడ్డిపై పోలీసులు పలు కఠినమైన చట్టపరమైన సెక్షన్ల కింద కేసులు నమోదు చేశారు. BNSలోని సెక్షన్లు 68, 64(2)(a)(m), 89, 74, 75, 77, 78, 115(2), 308, 351(3) లతో పాటు సమాచార సాంకేతిక చట్టం (IT Act) లోని 66(E), 67, 67(A) సెక్షన్ల కింద ఎఫ్‌ఐఆర్ నమోదు చేసినట్లు అధికారులు తెలిపారు. మహిళలను మానసికంగా, శారీరకంగా వేధించడం, డిజిటల్ మాధ్యమాల ద్వారా బ్లాక్‌మెయిల్ చేయడం వంటి తీవ్రమైన అంశాలు ఈ కేసులో ప్రధానంగా ఉన్నాయి.

బాధితురాలి ఫిర్యాదులోని సంచలన ఆరోపణలు

సీఐ శ్రీనివాసులు రెడ్డి తనను నమ్మించి, మానసికంగా లొంగదీసుకుని శారీరకంగా వాడుకున్నారని బాధితురాలు తన ఫిర్యాదులో పేర్కొంది. ఆ తర్వాత తనకు సంబంధించిన ప్రైవేట్ వీడియోలు, ఫొటోలను చిత్రీకరించి, వాటిని అడ్డం పెట్టుకుని తనను తీవ్రంగా బెదిరింపులకు గురిచేశారని ఆరోపించింది. వీడియోలు బహిర్గతం చేస్తానని బెదిరించి తన వద్ద నుంచి భారీగా డబ్బులు కూడా వసూలు చేశారని పేర్కొంది. కొంతకాలం పాటు తనతో సహజీవనం చేసిన ఆయన, ఆ తర్వాత తనను వదిలించుకునేందుకు ప్రయత్నించాడని బాధితురాలు ఆవేదన వ్యక్తం చేసింది.

విచారణలో ఆధారాలు నమోదు.. సస్పెన్షన్ వేటు

బాధితురాలు ఇచ్చిన ఫిర్యాదుపై ఉన్నతాధికారులు చేపట్టిన ప్రాథమిక విచారణలో శ్రీనివాసులురెడ్డి కొంతకాలం పాటు బాధితురాలితో కలిసి ఒకే ఇంట్లో నివసించినట్లు ఆధారాలు లభ్యమైనట్లు సమాచారం. అలాగే ఆమెను దూరం చేసుకునేందుకు బెదిరింపులకు పాల్పడినట్లు కూడా విచారణలో తేలింది. ఈ లైంగిక వేధింపుల ఆరోపణలు వెలుగులోకి వచ్చిన వెంటనే స్పందించిన పోలీస్ ఉన్నతాధికారి సజ్జనార్, సీఐ శ్రీనివాసులురెడ్డిని సస్పెండ్ చేస్తూ ఉత్తర్వులు జారీ చేసిన విషయం తెలిసిందే. తాజాగా అమీన్‌పూర్ పీఎస్‌లో బిఎన్‌ఎస్, ఐటీ యాక్ట్ కింద ఎఫ్‌ఐఆర్ నమోదు కావడంతో ఈ వ్యవహారంపై పోలీసులు పూర్తిస్థాయి దర్యాప్తును కొనసాగిస్తున్నారు.