AP SSC Results 2026: రేపే ఏపీ పదో తరగతి ఫలితాలు.. వాట్సాప్, వెబ్‌సైట్లలో చూసే విధానం ఇదే!

AP SSC Results 2026: ఆంధ్రప్రదేశ్‌లో పదో తరగతి పరీక్షలు రాసిన లక్షలాది మంది విద్యార్థుల నిరీక్షణకు తెరపడనుంది. 2026 ఎస్‌ఎస్‌సీ పబ్లిక్ పరీక్షల ఫలితాలను రేపు (ఏప్రిల్ 30, గురువారం) ఉదయం 11:00 గంటలకు విడుదల చేయనున్నట్లు రాష్ట్ర విద్యాశాఖ మంత్రి నారా లోకేశ్ సోషల్ మీడియా వేదికగా ప్రకటించారు.

ఫలితాలను తెలుసుకునే మార్గాలు ఇవే:

విద్యార్థులు తమ ఫలితాలను పలు మార్గాల్లో సులభంగా తెలుసుకునే అవకాశం కల్పించారు. SSC ఫలితాలను అధికారిక వెబ్‌సైట్ ద్వారా చూడవచ్చు. అలాగే మన మిత్ర వాట్సాప్ సేవలో 9552300009 నంబర్‌కు “Hi” అని మెసేజ్ పంపడం ద్వారా కూడా ఫలితాలను పొందవచ్చు. అదనంగా LEAP మొబైల్ యాప్ ద్వారా విద్యార్థులు ఫలితాలు చూసుకోవచ్చు. డిజిలాకర్ యాప్ మరియు వెబ్‌సైట్‌లో కూడా మార్కుల మెమోలు అందుబాటులో ఉండనున్నాయి అని తన ట్వీట్‌లో పేర్కొన్నారు మంత్రి నారా లోకేష్‌.

నిరుత్సాహపడొద్దు.. ఆత్మవిశ్వాసంతో ముందడుగు వేయండి!

ఫలితాల విడుదల సందర్భంగా మంత్రి లోకేశ్ విద్యార్థులకు ప్రత్యేక సందేశం ఇచ్చారు. పరీక్షల్లో విజయం సాధించిన వారికి అభినందనలు తెలుపుతూనే, ఆశించిన ఫలితాలు రాని విద్యార్థులకు ధైర్యం చెప్పారు. "పదో తరగతి ఫలితాలు జీవిత ప్రయాణంలో ఒక మైలురాయి మాత్రమే. మార్కులు తక్కువ వచ్చాయని ఎవరూ నిరుత్సాహపడొద్దు. ఆత్మవిశ్వాసంతో ముందుకు సాగాలి" అని ఆయన సూచించారు.