Coal India Jobs: నిరుద్యోగులు ఎగిరి గంతేసే వార్త‌.. రూ. 60 వేల జీతంతో కోల్ ఇండియాలో ఉద్యోగాలు

Coal India Jobs: దేశంలోని ప్రముఖ ప్రభుత్వ రంగ సంస్థల్లో ఒకటైన కోల్ ఇండియా లిమిటెడ్ (CIL) భారీ స్థాయిలో ఉద్యోగాల భర్తీకి నోటిఫికేషన్ విడుదల చేసింది. మేనేజ్‌మెంట్ ట్రైనీ (E-1 గ్రేడ్) పోస్టుల కోసం మొత్తం 660 ఖాళీలను భర్తీ చేయనున్నారు.

ఏ విభాగాల్లో ఉద్యోగాలు భర్తీ చేస్తున్నారు?

ఈ నియామకాల ద్వారా పలు టెక్నికల్, నాన్ టెక్నికల్ విభాగాల్లో పోస్టులను భర్తీ చేయనున్నారు. ముఖ్యంగా సివిల్, ఎలక్ట్రికల్, మెకానికల్, సిస్టమ్, ఎలక్ట్రానిక్స్ అండ్ టెలికమ్యూనికేషన్, ఇండస్ట్రియల్ ఇంజినీరింగ్, జియాలజీ, రాజభాష (హిందీ), కంపెనీ సెక్రటరీ వంటి విభాగాల్లో ఖాళీలు ఉన్నాయి. దేశవ్యాప్తంగా ఉన్న కోల్ ఇండియా అనుబంధ సంస్థల్లో ఈ నియామకాలు జరగనున్నాయి. సంబంధిత విభాగంలో అర్హత కలిగిన అభ్యర్థులు ఈ అవకాశాన్ని వినియోగించుకోవచ్చు.

విద్యార్హతలు, వయోపరిమితి

ఈ పోస్టులకు దరఖాస్తు చేసుకునే అభ్యర్థులు సంబంధిత విభాగంలో కనీసం 60 శాతం మార్కులతో డిగ్రీ లేదా పీజీ పూర్తి చేసి ఉండాలి. అయితే ఎస్సీ, ఎస్టీ, దివ్యాంగ అభ్యర్థులకు 55 శాతం మార్కులు ఉంటే సరిపోతుంది. ప్రస్తుతం 2025-26 విద్యా సంవత్సరంలో చివరి సెమిస్టర్ చదువుతున్న విద్యార్థులు కూడా దరఖాస్తు చేసుకోవడానికి అవకాశం కల్పించారు. అభ్యర్థుల గరిష్ఠ వయస్సు 30 ఏప్రిల్ 2026 నాటికి 30 ఏళ్లు మించకూడదు. రిజర్వేషన్ వర్గాలకు కేంద్ర ప్రభుత్వ నిబంధనల ప్రకారం వయో సడలింపులు వర్తిస్తాయి.

ఎంపిక ప్రక్రియ ఎలా ఉంటుంది?

ఈ ఉద్యోగాల ఎంపిక పూర్తిగా ఆన్‌లైన్ రాత పరీక్ష ఆధారంగా నిర్వ‌హిస్తారు. అభ్యర్థులు పరీక్షలో సాధించిన మార్కుల ప్రకారం మెరిట్ లిస్ట్ తయారు చేసి నియామకాలు చేపడతారు. పరీక్షలో ప్రధానంగా అభ్యర్థుల సబ్జెక్ట్ పరిజ్ఞానం, సాంకేతిక నైపుణ్యాలు, సాధారణ సామర్థ్యాన్ని అంచనా వేస్తారు. ప్రభుత్వ రంగ సంస్థలో కెరీర్ ప్రారంభించాలని భావిస్తున్న వారికి ఇది మంచి అవకాశంగా చెప్పొచ్చు.

ఎంత జీతం లభిస్తుంది?

ఎంపికైన అభ్యర్థులను మేనేజ్‌మెంట్ ట్రైనీలుగా నియమిస్తారు. వీరికి ప్రారంభం నుంచే ఆకర్షణీయమైన వేతనం అందించనున్నారు. నెలకు సుమారు రూ.60 వేల వరకు జీతం లభించే అవకాశం ఉంది. అదనంగా డీఏ, హెచ్‌ఆర్‌ఏ, మెడికల్ సదుపాయాలు, ఇతర అలవెన్స్‌లు కూడా వర్తిస్తాయి. మంచి జీతంతో పాటు స్థిరమైన ఉద్యోగ భద్రత కూడా ఉండటంతో ఈ నోటిఫికేషన్‌పై భారీ ఆసక్తి కనిపిస్తోంది.

దరఖాస్తు ప్రక్రియ, ముఖ్యమైన తేదీలు

అభ్యర్థులు పూర్తిగా ఆన్‌లైన్ విధానంలో మాత్రమే దరఖాస్తు చేసుకోవాలి. దరఖాస్తు ప్రక్రియ 12 మే 2026 నుంచి ప్రారంభమవుతుంది. అప్లికేషన్ సమర్పణకు 11 జూన్ 2026 చివరి తేదీగా నిర్ణయించారు. దరఖాస్తు ఫీజు విషయానికి వస్తే జనరల్, ఓబీసీ, ఈడబ్ల్యూఎస్ అభ్యర్థులు రూ.1,180 చెల్లించాలి. అయితే ఎస్సీ, ఎస్టీ, దివ్యాంగులు, కోల్ ఇండియా ఉద్యోగులకు ఫీజు మినహాయింపు ఇచ్చారు. ప్రభుత్వ రంగంలో మంచి కెరీర్ కోసం ఎదురు చూస్తున్న యువత ఈ అవకాశాన్ని వినియోగించుకోవచ్చు.