JEE Main 2026: అభ్యర్థులకు అలర్ట్.. తుది కీ వచ్చేసింది, నేడే ఫలితాలు?

JEE Main 2026: దేశవ్యాప్తంగా లక్షలాది మంది విద్యార్థులు ఎంతో ఆత్రుతగా ఎదురుచూస్తున్న జేఈఈ మెయిన్ 2026 సెషన్-2 తుది కీ (Final Answer Key) విడుదలైంది. నేషనల్ టెస్టింగ్ ఏజెన్సీ (NTA) సోమవారం మధ్యాహ్నం ఈ కీని అధికారిక వెబ్‌సైట్‌లో అందుబాటులో ఉంచింది. ఏప్రిల్ 20 (ఈరోజు) నాటికి ఫలితాలను ప్రకటిస్తామని ఎన్‌టీఏ ముందే వెల్లడించిన నేపథ్యంలో, ఏ క్షణంలోనైనా అభ్యర్థుల మెరిట్ లిస్ట్ మరియు ర్యాంకులు వెలువడే అవకాశం ఉంది.

ర్యాంకుల లెక్కింపు ఇలా..

ఈ నెల మొదటి వారంలో జరిగిన తుది విడత పరీక్షలకు సంబంధించి ఏప్రిల్ 13 వరకు అభ్యంతరాలను స్వీకరించిన అధికారులు, వాటిని పరిశీలించి తుది కీని రూపొందించారు. జేఈఈ మెయిన్ రెండు విడతల్లో (సెషన్ 1 & 2) అభ్యర్థులు సాధించిన అత్యుత్తమ స్కోరును (Best of Two) పరిగణనలోకి తీసుకుని జాతీయ స్థాయి ర్యాంకులను కేటాయించనున్నారు.

భారీగా హాజరైన విద్యార్థులు:

ఈ ఏడాది జేఈఈ మెయిన్ రెండో విడతకు రికార్డు స్థాయిలో దాదాపు 11.23 లక్షల మంది విద్యార్థులు హాజరయ్యారు. వీరిలో:

పేపర్-1 (B.E/B.Tech): 11.06 లక్షల మంది.

పేపర్-2 (B.Arch/B.Planning): 55 వేల మంది.

ఫలితాల ప్రకటన అనంతరం విద్యార్థులు తమ స్కోరు కార్డులను jeemain.nta.nic.in వెబ్‌సైట్ ద్వారా డౌన్‌లోడ్ చేసుకోవచ్చు. ఫలితాల కోసం విద్యార్థులు, తల్లిదండ్రులు వెబ్‌సైట్‌ను నిరంతరం గమనిస్తూ ఉత్కంఠగా ఎదురుచూస్తున్నారు.