నస్ర పాఠశాలలో విద్యార్థి నాయకులు బాధ్యతలు స్వీకరించారు

నస్ర పాఠశాలలో 61వ పదవీ స్వీకార కార్యక్రమం ఘనంగా జరిగింది. 2026-27 విద్యా సంవత్సరానికి కొత్తగా ఎంపికైన విద్యార్థి నాయకులు ఈ కార్యక్రమంలో లాంఛనంగా తమ బాధ్యతలను స్వీకరించారు. ముఖ్య అతిథిగా బ్రిగేడియర్ మనోజ్ కుమార్ శర్మ హాజరుకాగా.. నస్ర ఎడ్యుకేషన్ సొసైటీ ఛైర్మన్ నవాబ్ మీర్ ఖుతుబుద్దీన్ ఖాన్, డైరెక్టర్ బేగం సల్వా ఖాన్, సీఈఓ, నస్ర బాయ్స్ స్కూల్ ప్రిన్సిపాల్ మీర్ హఫీజుద్దీన్ అహ్మద్, ఎగ్జిక్యూటివ్ డైరెక్టర్–ఫైనాన్స్ మీర్ జమాలుద్దీన్ హమ్మద్, పాఠశాల సంఘ సభ్యులు పాల్గొన్నారు.

ఎన్‌సీసీ గౌరవ వందనం, పాఠశాల బృందగానంతో కార్యక్రమం ప్రారంభమైంది. అనంతరం కొత్త విద్యార్థి నాయకులు తమ బాధ్యతలను సమర్థంగా నిర్వర్తిస్తామని ప్రమాణం చేశారు. అమెథిస్ట్, ఎమరాల్డ్, రూబీ, సఫైర్, టోపాజ్ హౌస్‌ల విద్యార్థులు నిర్వహించిన వందనం, మార్చ్‌పాస్ట్‌ కార్యక్రమాలు ఆకట్టుకున్నాయి. క్రమశిక్షణ, సమన్వయం, జట్టుకృషి ప్రాధాన్యాన్ని ఇవి చాటిచెప్పాయి.

పర్యావరణ పరిరక్షణపై పాఠశాలకున్న ప్రాధాన్యాన్ని తెలియజేస్తూ కార్యక్రమానికి హాజరైన ప్రముఖులకు మొక్కలను అందజేశారు. ఈ సందర్భంగా ప్రిన్సిపాల్ మీర్ మొహియుద్దీన్ మహమ్మద్ మాట్లాడుతూ.. క్రమశిక్షణ, నిరంతర కృషితోనే శ్రేష్ఠతను సాధించగలమని అన్నారు. నాయకత్వం అంటే కేవలం విజయాలను సాధించడం మాత్రమే కాదని, సమాజానికి ఉపయోగపడే విధంగా సేవ చేయడం కూడా ముఖ్యమని విద్యార్థులకు సూచించారు.

ముఖ్య అతిథి బ్రిగేడియర్ మనోజ్ కుమార్ శర్మ విద్యార్థులను ఉద్దేశించి మాట్లాడుతూ.. క్రమశిక్షణ, పట్టుదల, బాధ్యత, సేవా భావం జీవితంలో ఎంతో ముఖ్యమైనవని చెప్పారు. విద్యార్థి నాయకులు తమకు అప్పగించిన బాధ్యతలను నిబద్ధతతో, స్పష్టమైన లక్ష్యంతో నిర్వర్తించాలని సూచించారు.

ఈ సందర్భంగా విద్యా, సాహిత్య, సాంస్కృతిక కార్యక్రమాలు, మార్చింగ్, ఇంటర్-హౌస్ పోటీల్లో ప్రతిభ కనబరిచిన విద్యార్థులకు కప్పులు, షీల్డ్‌లను అందజేసి అభినందించారు. సాహిత్య, సాంస్కృతిక కార్యక్రమాల్లో టోపాజ్ హౌస్ ఉత్తమ హౌస్‌గా నిలిచింది. దేశభక్తి గీతాల గానం, నృత్య పోటీలోనూ టోపాజ్ హౌస్ ఉత్తమ హౌస్ అవార్డును దక్కించుకుంది. ఎమరాల్డ్ హౌస్ ఉత్తమ మార్చింగ్ కంటింజెంట్‌గా ఎంపికైంది.

విద్యార్థులు తమపై నమ్మకం ఉంచి, అంకితభావంతో లక్ష్యాల వైపు ముందుకు సాగాలని నస్ర ఎడ్యుకేషన్ సొసైటీ ఛైర్మన్ నవాబ్ మీర్ ఖుతుబుద్దీన్ ఖాన్ సూచించారు. నిజాయితీ, క్రమశిక్షణ, దయ, భిన్నత్వాన్ని గౌరవించడం వంటి విలువలను జీవితంలో పాటించాలని ఆయన కోరారు.

విద్యార్థి నాయకత్వం, బాధ్యత, విద్యా ప్రతిభతో పాటు విద్యార్థుల సమగ్ర అభివృద్ధికి ప్రాధాన్యం ఇవ్వాలని సందేశాన్ని ఇస్తూ కార్యక్రమం ముగిసింది.