ONGC Scholarship: పేద విద్యార్థులకు మంచి అవకాశం.. ఎలా అప్లై చేసుకోవాలంటే

ONGC Scholarship: ఉన్నత విద్య చదవాలనుకునే నిరుపేద విద్యార్థులకు భారీ ఊరట కలిగించే ఉద్దేశంతో ఆయిల్ అండ్ నేచురల్ గ్యాస్ కార్పొరేషన్ సంస్థ స్కాలర్‌షిప్ నోటిఫికేషన్ విడుదల చేసింది. 2025-26 విద్యాసంవత్సరానికి సంబంధించిన ఈ పథకం ద్వారా ప్రతిభ ఉన్న విద్యార్థులకు ఆర్థిక సహాయం అందించనుంది. దేశవ్యాప్తంగా మొత్తం 2,000 మంది విద్యార్థులను ఎంపిక చేసి వారికి సహాయం అందిస్తారు.

కేటగిరీల వారీగా స్కాలర్‌షిప్‌లు

ఈ స్కాలర్‌షిప్‌లో సామాజిక వర్గాల ప్రకారం సీట్లు కేటాయించారు. ఎస్సీ, ఎస్టీ విద్యార్థులకు ఎక్కువ ప్రాధాన్యం ఇస్తూ 1000 స్కాలర్‌షిప్‌లు కేటాయించారు. ఓబీసీ అభ్యర్థులకు 500, జనరల్ ఈడబ్ల్యూఎస్ వర్గానికి 500 స్కాలర్‌షిప్‌లు ఉంటాయి. ప్రతి కేటగిరీలో 50 శాతం స్కాలర్‌షిప్‌లు అమ్మాయిలకు కేటాయించడం ప్రత్యేకత. దీంతో బాలికలకు కూడా సమాన అవకాశాలు లభిస్తున్నాయి.

అర్హతలు ఏమిటి? ఎవరు దరఖాస్తు చేయాలి?

ఈ స్కాలర్‌షిప్‌కు దరఖాస్తు చేయాలంటే కొన్ని ముఖ్యమైన అర్హతలు ఉన్నాయి. 2025-26 విద్యాసంవత్సరంలో ఫస్ట్ ఇయర్ చదువుతున్న విద్యార్థులు మాత్రమే అర్హులు. బీఈ/బీటెక్, ఎంబీబీఎస్ వంటి డిగ్రీ కోర్సులు లేదా పీజీ స్థాయిలో జియాలజీ, జియోఫిజిక్స్, ఎంబీఏ చదువుతున్న వారు అప్లై చేయవచ్చు. ఇంజినీరింగ్, మెడికల్ కోర్సులకు ఇంటర్‌లో కనీసం 60 శాతం మార్కులు ఉండాలి. అలాగే పీజీ కోర్సులకు డిగ్రీలో 60 శాతం మార్కులు అవసరం. కుటుంబ వార్షిక ఆదాయం సాధారణ వర్గాలకు రూ.2 లక్షలు మించకూడదు. ఎస్సీ, ఎస్టీలకు రూ.4.5 లక్షల లోపు ఉండాలి. అభ్యర్థుల వయస్సు 30 ఏళ్లకు లోపే ఉండాలి.

ఎంపిక విధానం, స్కాలర్‌షిప్ మొత్తం

ఈ పథకంలో ఎలాంటి రాత పరీక్ష ఉండదు. విద్యార్థుల విద్యా ప్రతిభ ఆధారంగానే ఎంపిక జరుగుతుంది. ఇంజినీరింగ్, ఎంబీబీఎస్ కోర్సులకు ఇంటర్ మార్కులు, ఎంబీఏ, ఇతర పీజీ కోర్సులకు డిగ్రీ మార్కులను పరిగణలోకి తీసుకుంటారు. ఎంపికైన విద్యార్థులకు నెలకు రూ.4,000 చొప్పున స్కాలర్‌షిప్ అందిస్తారు. అంటే ఏడాదికి రూ.48,000 వస్తుంది. ఇంజినీరింగ్, మెడికల్ విద్యార్థులకు నాలుగేళ్లు, పీజీ కోర్సులకు రెండేళ్లు ఈ సహాయం కొనసాగుతుంది.

ఎలా దరఖాస్తు చేయాలి?

ఈ స్కాలర్‌షిప్‌కు ఆన్‌లైన్ ద్వారా దరఖాస్తు చేయాలి. National Scholarship Portal ద్వారా అప్లికేషన్ సమర్పించాలి. మే 15, 2026 చివరి తేదీగా నిర్ణయించారు. ఒక ముఖ్యమైన నిబంధన ఏమిటంటే, ఇతర స్కాలర్‌షిప్‌లు పొందుతున్న వారు దీనికి అర్హులు కారు. దేశాన్ని 5 జోన్లుగా విభజించి ప్రతి జోన్‌కు నిర్దిష్ట సంఖ్యలో సీట్లు కేటాయించారు. ఆంధ్రప్రదేశ్, తెలంగాణ జోన్-5లో ఉన్నాయి. ఎంపికైన తర్వాత ప్రతి సంవత్సరం అన్ని సబ్జెక్టుల్లో ఉత్తీర్ణత సాధిస్తేనే స్కాలర్‌షిప్ కొనసాగుతుంది. పూర్తి వివరాల కోసం ఈ వెబ్‌సైట్‌ను చూడండి.