Supreme Court: సీబీఎస్‌ఈ ఆరో తరగతి విద్యార్థులకు సుప్రీంకోర్టు ఊరట.. కీలక మార్గదర్శకాలు జారీ!

Supreme Court: దేశవ్యాప్తంగా సీబీఎస్‌ఈ (CBSE) పాఠశాలల్లో ఆరో తరగతి చదువుతున్న విద్యార్థులకు సుప్రీంకోర్టు భారీ ఉపశమనం కలిగించింది. నూతన విద్యా విధానంలో భాగంగా ప్రవేశపెట్టిన మూడో భాష (Third Language) మరియు బోర్డు పరీక్షల నిబంధనలపై కీలక ఆదేశాలు జారీ చేసింది. ప్రస్తుతం ఏడు, ఎనిమిదో తరగతి విద్యార్థులకు అమలవుతున్న మినహాయింపులను ఇప్పుడు ఆరో తరగతి విద్యార్థులకు కూడా పూర్తిగా వర్తింపజేయాలని స్పష్టం చేసింది.

తాజా నిర్ణయం ప్రకారం.. ఆరో తరగతి విద్యార్థులు మూడో భాషను అభ్యసించాల్సి ఉన్నప్పటికీ, భవిష్యత్తులో పదో తరగతి బోర్డు పరీక్షలు రాసేటప్పుడు ఆ నిర్దిష్ట థర్డ్ లాంగ్వేజ్ పరీక్ష రాయాల్సిన అవసరం నుంచి మినహాయింపు లభిస్తుంది.

ప్రస్తుతం రెండు స్థానికేతర భాషలను అభ్యసిస్తున్న విద్యార్థులు తమ పాత సబ్జెక్టులను మార్చుకోవాల్సిన పనిలేదని, వాటిని అలాగే కొనసాగిస్తూ థర్డ్ లాంగ్వేజ్ కింద ఏదైనా ఒక భారతీయ భాషను ఎంచుకునే వెసులుబాటును కోర్టు కల్పించింది.

విద్యా సంస్కరణల అమలులో విద్యార్థులు, తల్లిదండ్రులకు ఎలాంటి ఇబ్బందులు కలగకుండా ఉండేందుకే ఈ సడలింపులు ఇచ్చినట్లు సుప్రీంకోర్టు పేర్కొంది.

ఈ తాజా తీర్పుతో దేశవ్యాప్తంగా లక్షలాది మంది సీబీఎస్‌ఈ విద్యార్థులకు థర్డ్ లాంగ్వేజ్ ఎంపిక మరియు పరీక్షల విషయంలో స్పష్టత లభించింది. సుప్రీంకోర్టు ఆదేశాలకు అనుగుణంగా సీబీఎస్‌ఈ త్వరలోనే అధికారిక మార్గదర్శకాలను విడుదల చేసే అవకాశం ఉంది.