Kukunoor: ఘనంగా జాతీయ పోషకాహార మాసోత్సవాల ప్రారంభం
Kukunoor: కుక్కునూరులో చిన్నారులు, గర్భిణుల్లో పోషకాహార లోపం నివారణకు 9వ జాతీయ పోషకాహార మాసోత్సవాలను ప్రాజెక్టు స్థాయిలో ప్రారంభించారు.
Kukunoor: ఘనంగా జాతీయ పోషకాహార మాసోత్సవాల ప్రారంభం
కుక్కునూరు: చిన్నారులు, గర్భిణులు, బాలింతలు, మహిళల్లో పోషకాహారంపై అవగాహన పెంచేందుకు 9వ జాతీయ పోషకాహార మాసోత్సవాలను బుధవారం కుక్కునూరు ప్రభుత్వ జూనియర్ కళాశాలలో ప్రాజెక్టు స్థాయిలో ప్రారంభించారు. సీడీపీఓ అనంతలక్ష్మి ఆధ్వర్యంలో జరిగిన కార్యక్రమంలో అంగన్వాడీ సూపర్వైజర్లు, కార్యకర్తలు, సిబ్బంది పాల్గొన్నారు.
ఈ ఏడాది ‘మన అంగన్వాడీ–మన బాధ్యత’ అనే ప్రధాన సందేశంతో నెలరోజుల పాటు గ్రామస్థాయిలో వివిధ అవగాహన కార్యక్రమాలు నిర్వహించనున్నట్లు అధికారులు తెలిపారు. స్థానికంగా లభించే ఆకుకూరలు, కూరగాయలు, పప్పుధాన్యాలు, చిరుధాన్యాలు, పండ్లు, గుడ్లు వంటి పోషక విలువలున్న ఆహార పదార్థాలను నిత్య ఆహారంలో చేర్చుకోవడం ద్వారా పోషకాహార లోపాన్ని నివారించవచ్చని సీడీపీఓ అనంతలక్ష్మి సూచించారు.
అంగన్వాడీ కేంద్రాల్లో చిన్నారులకు అందించే వేడి వండిన భోజనంలో పోషక విలువలకు ప్రాధాన్యత ఇవ్వాలని, చిరుధాన్యాలు, పప్పులు, కాలానుగుణ కూరగాయలను మెనూలో భాగం చేయాలని సూచించారు. భోజన మెనూ వివరాలను కేంద్రాల్లో అందుబాటులో ఉంచి తల్లిదండ్రులకు అవగాహన కల్పించాలని తెలిపారు.
చిన్నారుల పోషణతో పాటు వారి సమగ్ర అభివృద్ధిపై ప్రత్యేక దృష్టి సారించాల్సిన అవసరం ఉందన్నారు. ఆరు సంవత్సరాల్లోపు పిల్లల ఎదుగుదలను ఎప్పటికప్పుడు పర్యవేక్షించి, తల్లిదండ్రులకు అవసరమైన సూచనలు అందించాలని అంగన్వాడీ సిబ్బందికి సూచించారు.
అంగన్వాడీ కేంద్రాల నిర్వహణ, సేవల పర్యవేక్షణలో తల్లిదండ్రులు, పంచాయతీ ప్రతినిధులు, స్వయం సహాయక సంఘాలు, అంగన్వాడీ మేనేజ్మెంట్ కమిటీలు భాగస్వాములు కావాలని కోరారు. రక్తహీనత నివారణ, తల్లిపాల ప్రాధాన్యత, పరిశుభ్రత, వ్యక్తిగత ఆరోగ్యం, పోషణ వాటికల వినియోగం తదితర అంశాలపై గ్రామస్థాయిలో అవగాహన కార్యక్రమాలు నిర్వహించనున్నట్లు తెలిపారు.
ప్రధానమంత్రి మాతృ వందన యోజనకు సంబంధించి అర్హులైన గర్భిణులు, బాలింతలకు పథకం ప్రయోజనాలు అందేలా అవగాహన కల్పించనున్నట్లు సీడీపీఓ తెలిపారు. ప్రతి కుటుంబం పోషక విలువలతో కూడిన సమతుల్య ఆహారం తీసుకునేలా ప్రజలను చైతన్యపరచాలని అంగన్వాడీ కార్యకర్తలకు సూచించారు.