Chilakaluripet: చిలకలూరిపేటలో ప్రమాదకరంగా మారుతున్న బాణసంచా దుకాణాలు!

Chilakaluripet: చిలకలూరిపేట సమీపంలోని పసుమర్తి, బొప్పిడి గ్రామాల వద్ద జాతీయ రహదారిని ఆనుకుని వెలసిన దీపావళి బాణసంచా దుకాణాలు ఇప్పుడు మృత్యుకూపాలుగా మారాయి. నిబంధనలను బేఖాతరు చేస్తూ, భద్రతను గాలికొదిలేసి సాగిస్తున్న ఈ వ్యాపారం రేపో మాపో పెను విస్ఫోటనానికి దారితీసేలా కనిపిస్తోంది.

నిప్పుల కొలిమిలో ఊపిరాడని జనం

గత మూడు రోజులుగా వాతావరణం అనుకూలించక తుఫాను భయంతో ఇళ్లకే పరిమితమైన జనం, నేడు పండుగ పూట ఒక్కసారిగా బాణసంచా దుకాణాలకు పోటెత్తారు. సాధారణంగా ఇలాంటి సున్నితమైన, ప్రమాదకరమైన దుకాణాల్లోకి నిర్దిష్ట సంఖ్యలోనే కొనుగోలుదారులను అనుమతించాలన్న నిబంధన ఉంది. కానీ ఇక్కడ పరిస్థితి ఇందుకు పూర్తి విరుద్ధం.

ఒక్కో దుకాణంలోకి ఏకకాలంలో వందలాది మందిని నెట్టేస్తున్నారు. లోపల కనీసం ఊపిరి ఆడని పరిస్థితి. ఏదైనా చిన్న నిప్పురవ్వ పడినా బయటకు పరుగులు తీసేందుకు కూడా సందు లేని రీతిలో ప్రాణాలను పణంగా పెట్టి జనం కొనుగోళ్లు సాగిస్తున్నారు. అగ్నిమాపక శాఖ సూచించిన ప్రాథమిక భద్రతా ఏర్పాట్లు—ఇసుక బస్తాలు, నీటి నిల్వలు, ఫైర్ ఎక్స్‌టింగిషర్లు—కేవలం నామమాత్రపు ప్రదర్శనకే పరిమితమయ్యాయి.

ఇంకా మాయని గాయం... అయినా మేల్కోని తనం!

కొన్ని నెలల క్రితం చిలకలూరిపేట పరిధిలోని బాణసంచా దుకాణంలో జరిగిన ఘోర ప్రమాదం స్థానికుల కళ్లముందు ఇంకా మెదులుతూనే ఉంది. ఆ దుర్ఘటనలో దాదాపు ₹40 లక్షల విలువైన సరుకు క్షణాల్లో దగ్ధమైంది. ఆ దుకాణ యజమాని సజీవ దహనమవగా, మరొకరు తీవ్ర గాయాలపాలై నేటికీ నరకం అనుభవిస్తున్నారు.

ఇంతటి చేదు అనుభవం, నెత్తుటి గుణపాఠం కళ్లముందే ఉన్నప్పటికీ నిర్వాహకుల్లో కనీస బాధ్యత కనిపించడం లేదు. "పోయిన ప్రాణం ఎలాగూ తిరిగిరాదు... వచ్చే కాసులు వదులుకోలేం" అన్నట్లుగా వారి వ్యవహారశైలి తయారైంది.

పన్నుల ఎగవేత... తెల్లకాగితాలపైనే దందా!

కేంద్ర, రాష్ట్ర ప్రభుత్వాల ఖజానాకు చేరాల్సిన జీఎస్టీ (GST) ఆదాయానికి యథేచ్ఛగా గండి కొడుతున్నారు. లక్షలాది రూపాయల వ్యాపారం జరుగుతున్నా,కొనుగోలుదారులకు జీఎస్టీ ఇన్వాయిస్‌లు ఇవ్వకుండా కేవలం తెల్లకాగితాలపై చేతిరాతలతో లెక్కలు రాసి చేతులు దులుపుకుంటున్నారు.

మరోవైపు ఆకాశాన్నంటుతున్న ధరలతో వినియోగదారుల జేబులను గుల్ల చేస్తున్నారు. డిస్కౌంట్ల పేరుతో మాయమాటలు చెబుతూ, అసలు ధర కంటే రెట్టింపు వసూలు చేస్తూ యథేచ్ఛగా దోపిడీ సాగిస్తున్నారు.

స్తంభించిన జాతీయ రహదారి... అంధకారంలో రవాణా

దుకాణాల వద్ద వాహనాల పార్కింగ్‌కు సరైన స్థలం కేటాయించకపోవడంతో కొనుగోలుదారులు తమ కార్లు, ద్విచక్ర వాహనాలను జాతీయ రహదారి పైనే ఇష్టానుసారంగా నిలిపివేస్తున్నారు. దీంతో ప్రయాణికులు తీవ్ర ఇబ్బందులు పడుతున్నారు. వేగంగా దూసుకొచ్చే వాహనాలతో ఏ క్షణంలో ఏ ప్రమాదం ముంచుకొస్తుందో తెలియక వాహనదారులు బిక్కుబిక్కుమంటూ ప్రయాణించాల్సి వస్తోంది.

"మామూళ్లు ఇచ్చాం... మా ఇష్టం!"

ఇంత జరుగుతున్నా అధికార యంత్రాంగం నిమ్మకు నీరెత్తినట్లు వ్యవహరిస్తుండటం వెనుక అసలు రహస్యం ఏమిటి? దుకాణ నిర్వాహకుల వ్యాఖ్యలే దీనికి స్పష్టమైన సమాధానం ఇస్తున్నాయి.

"మేము అధికారులకు ఇవ్వాల్సిన మామూళ్లు ఇచ్చాం. అడిగినన్ని టపాసుల బాక్సులు పంపాం. ఇక మాపై ఎవరూ చర్యలు తీసుకోరు. మా వ్యాపారం మా ఇష్టం, రేట్లు మా ఇష్టం"

అంటూ కొందరు నిర్వాహకులు బరితెగించి మాట్లాడుతుండటం పరిస్థితి తీవ్రతకు అద్దం పడుతోంది. ప్రజల ప్రాణాలు పోతే తమకేంటి అన్న నైజం వారి మాటల్లో స్పష్టంగా వినిపిస్తోంది.

బాణసంచా వెలుగులు నింపాల్సిన పండుగ పూట, అధికారుల ఉదాసీనత మరియు వ్యాపారుల నిర్లక్ష్యం ఎవరి జీవితాల్లో చీకట్లు నింపుతుందోనన్న ఆందోళన స్థానికుల్లో వ్యక్తమవుతోంది. ఇప్పటికైనా జిల్లా ఉన్నతాధికారులు, విజిలెన్స్, కమర్షియల్ టాక్స్ మరియు పోలీస్ యంత్రాంగం తక్షణమే స్పందించి తనిఖీలు చేపట్టాలి. నిబంధనలు ఉల్లంఘించిన దుకాణాలపై కఠిన చర్యలు తీసుకుని, ప్రజలు కోరుకుంటున్నారు.