Chirala: చీరాలలో రోటరీ క్లబ్ ఆధ్వర్యంలో పండ్ల మొక్కలు నాటే కార్యక్రమం!

చీరాల: పర్యావరణ పరిరక్షణ, పచ్చదనం పెంపొందించడమే లక్ష్యంగా చీరాల రోటరీ క్లబ్ ఆధ్వర్యంలో సెయింట్ మార్క్స్ లూథరన్ జూనియర్ కాలేజీలో వివిధ రకాల పండ్ల మొక్కలను నాటారు. రోటరీ 3150 డిస్ట్రిక్ట్ గవర్నర్ రొటేరియన్ ఉదయ్ సుధీర్ పీలానీ ముఖ్య అతిథిగా పాల్గొని మొక్కలు నాటే కార్యక్రమాన్ని ప్రారంభించారు.

కాలేజీ ప్రాంగణంలో మామిడి, సపోటా, జామ, ఉసిరి తదితర రకాల 20 మొక్కలను నాటారు. ఈ సందర్భంగా డిస్ట్రిక్ట్ గవర్నర్ మాట్లాడుతూ పర్యావరణ పరిరక్షణలో ప్రతి ఒక్కరూ భాగస్వాములు కావాలని, విద్యార్థి దశ నుంచే పచ్చదనం ప్రాధాన్యతను యువతకు తెలియజేయాల్సిన అవసరం ఉందని పేర్కొన్నారు. మొక్కలను నాటడమే కాకుండా వాటిని సంరక్షించే బాధ్యతను కూడా తీసుకోవాలని సూచించారు.

టాయిలెట్ల ఏర్పాటుకు విజ్ఞప్తి

సెయింట్ మార్క్స్ లూథరన్ జూనియర్ కాలేజీలో విద్యార్థులు, సిబ్బందికి అవసరమైన టాయిలెట్ల సౌకర్యం లేదని కాలేజీ ప్రిన్సిపాల్ గారపాటి పుష్పరాజ్ తెలిపారు. కాలేజీలో టాయిలెట్లను ఏర్పాటు చేసేందుకు రోటరీ క్లబ్ సహకరించాలని కోరుతూ డిస్ట్రిక్ట్ గవర్నర్ రొటేరియన్ ఉదయ్ సుధీర్ పీలానీ, అసిస్టెంట్ గవర్నర్ డాక్టర్ ఐ. బాబూరావులకు విజ్ఞాపన పత్రాన్ని అందజేశారు. విద్యార్థుల అవసరాలను దృష్టిలో ఉంచుకుని ఈ సమస్యను పరిశీలించి తగిన సహాయం అందించాలని కోరారు.

గవర్నర్‌కు ఘన సన్మానం

చీరాల రోటరీ క్లబ్‌కు అధికారిక పర్యటనలో భాగంగా విచ్చేసిన డిస్ట్రిక్ట్ గవర్నర్ ఉదయ్ సుధీర్ పీలానీని రోటరీ క్లబ్ సభ్యులు ఘనంగా సన్మానించారు. క్లబ్ ఆధ్వర్యంలో చేపడుతున్న సేవా కార్యక్రమాలను ఆయన పరిశీలించి సభ్యులను అభినందించారు. పర్యావరణ పరిరక్షణతో పాటు విద్యార్థుల అవసరాలకు సహకరించడం వంటి సామాజిక సేవా కార్యక్రమాలను మరింత విస్తరించాలని సూచించారు.

ఈ కార్యక్రమంలో రోటరీ క్లబ్ సభ్యులు తిరుమలశెట్టి లక్ష్మీ ప్రతాప్, చందలూరి బాల వెంకటేశ్వరరావు, బండారుపల్లి హేమంత్ కుమార్, కరణం శ్రీనివాస బాబు, సుభాషిణి, కళాశాల అధ్యాపకులు, విద్యార్థులు తదితరులు పాల్గొన్నారు.