Mangalagiri: సరికొత్త వైద్య విప్లవం.. నిమిషంలో 60 రకాల హెల్త్ టెస్ట్‌లు!

Mangalagiri: అత్యాధునిక సాంకేతిక పరిజ్ఞానంతో వైద్యరంగంలో సరికొత్త మార్పులు వస్తున్నాయి. గుజరాత్, ఉత్తరాఖండ్ రాష్ట్రాల తర్వాత దేశంలోనే అత్యంత ప్రతిష్టాత్మకంగా ఆంధ్రప్రదేశ్‌లోని మంగళగిరి గణపతి నగర్ లోని పట్టణ ప్రాథమిక ఆరోగ్య కేంద్రం UPHC లో ఈ సరికొత్త కృత్రిమ మేధస్సు సాంకేతికతను అందుబాటులోకి తెస్తున్నారు.

ఈ నియోజకవర్గంలో పేద, మధ్యతరగతి ప్రజలకు అత్యుత్తమ వైద్య సేవలను అందించేందుకు ‘ఎరోస్ వెల్నెస్’ అనే వేదిక ద్వారా ఈ కృత్రిమ మేధస్సు వైద్యశాలను ఏర్పాటు చేశారు. సాధారణంగా ఏవైనా ఆరోగ్య పరీక్షలు చేయించుకోవాలంటే రక్తం సేకరించి, ప్రయోగశాల నివేదికల కోసం గంటల తరబడి వేచి చూడాల్సి వస్తుంది.

కానీ, ఇక్కడ ఎలాంటి రక్త పరీక్ష అవసరం లేకుండానే కేవలం 60 సెకన్లలోనే 60 రకాల పరీక్షల పూర్తి నివేదికను రోగి చేతికి అందిస్తారు.ఈ విధానంలో కేవలం రోగి ముఖాన్ని స్కాన్ అనగా కృత్రిమ మేధస్సు సాంకేతికతతో ముఖ గుర్తింపు చేయడం ద్వారా 28 రకాల శారీరక కొలమానాలను గుర్తిస్తారు.

ముఖంలోని రక్తప్రసరణ, చర్మ కణాల కదలికల ఆధారంగా ఈ కృత్రిమ మేధస్సు సాంకేతికతను రూపొందించారు. దీనితో పాటు అంతర్జాల అనుసంధాన పరికరాల ఆధారిత జీవ-సంవేదకాలు, అత్యాధునిక స్క్రీనింగ్ పరికరాల సహాయంతో మరో 32 రకాల కీలక పరీక్షలు నిర్వహిస్తారు.

ఈ మొత్తం 60 రకాల పరీక్షల ద్వారా కేవలం శారీరక రుగ్మతలే కాకుండా, రోగి యొక్క మానసిక ఆరోగ్య స్థితిని (ఒత్తిడి, ఆందోళన స్థాయిలు) కూడా అంచనా వేస్తారు. నివేదికలు వచ్చిన తక్షణమే రోగులు భవిష్యత్తులో ఎలాంటి జబ్బుల బారిన పడకుండా ఉండాలో, అందుకు ఎలాంటి ముందస్తు జాగ్రత్తలు తీసుకోవాలో అక్కడి వైద్య సిబ్బంది రోగులకు స్పష్టంగా వివరించి, కౌన్సిలింగ్ ఇస్తారు.

ఈ వినూత్న ప్రాజెక్టు విజయవంతం కావడం కోసం ఇక్కడి ప్రయోగశాల సాంకేతిక నిపుణులకు, వైద్య సిబ్బందికి రెండు రోజుల పాటు ప్రత్యేక శిక్షణ ఇస్తున్నట్లు రాష్ట్ర నోడల్ అధికారి శ్యామల వెల్లడించారు. ఈ శిక్షణ పూర్తయిన వెంటనే పూర్తిస్థాయిలో సేవలు ప్రారంభం కానున్నాయి.

ఇందులో భాగంగా ఈరోజు ఈ కేంద్రంలో ప్రయోగాత్మక పరిశీలన (ట్రయల్ రన్) విజయవంతంగా నిర్వహించారు.

ఉచితంగా, అతి తక్కువ సమయంలో లభించే ఈ సేవలు స్థానిక ప్రజలకు ఎంతో మేలు చేకూరుస్తాయని అధికారులు ఆశాభావం వ్యక్తం చేశారు.

ఈ కార్యక్రమంలో ఎరోస్ వెల్నెస్ సీఈవో శిల్పా దేశాయ్ మంగళగిరి గణపతి నగర్ లోని ఇందిరానగర్ UPHC వైద్యాధికారిని డాక్టర్ అనూష పరుచూరి, సిబ్బంది తదితరులు పాల్గొన్నారు.