Amaravati: తెలుగు ప్రజలందరికీ తొలి ఏకాదశి శుభాకాంక్షలు తెలిపిన మంత్రి ఆనం!

Amaravati: తెలుగు రాష్ట్రాల ప్రజలందరికీ, ప్రపంచవ్యాప్తంగా ఉన్న తెలుగు వారందరికీ తొలి ఏకాదశి సందర్భంగా రాష్ట్ర దేవాదాయ శాఖ మంత్రి ఆనం రామనారాయణరెడ్డి హృదయపూర్వక శుభాకాంక్షలు తెలిపారు.హిందూ సనాతన ధర్మంలో తొలి ఏకాదశికి విశిష్టమైన ఆధ్యాత్మిక ప్రాధాన్యం ఉందని మంత్రి పేర్కొన్నారు.

ఈ పవిత్రమైన రోజున శ్రీమహావిష్ణువును భక్తిశ్రద్ధలతో ఆరాధించడం, ఉపవాస దీక్షలు పాటించడం, దానధర్మాలు చేయడం ద్వారా దైవానుగ్రహం లభిస్తుందని తెలిపారు.ప్రతి ఒక్కరి జీవితాల్లో శ్రీమన్నారాయణుని కృపాకటాక్షాలు నిత్యం ఉండాలని, ప్రజలందరూ ఆయురారోగ్యాలు, సుఖసంతోషాలు, ఐశ్వర్యాలు, శాంతి-సమృద్ధులతో వర్ధిల్లాలని మనస్ఫూర్తిగా ఆకాంక్షించారు.రాష్ట్రంలోని అన్ని దేవాలయాల్లో తొలి ఏకాదశి ఉత్సవాలు భక్తిశ్రద్ధలతో, వైభవంగా నిర్వహించాలని ఇప్పటికే దేవాదాయ శాఖ అధికారులు, ఆలయ నిర్వాహకులకు మంత్రి సూచించారు. భక్తులకు ఎలాంటి అసౌకర్యం కలగకుండా అన్ని ఏర్పాట్లు చేయాలని ఆదేశించారు.