Bapatla: దివ్యాంగుల గోడు పట్టదా?: ఎంపీడీవోకు వినతిపత్రం అందజేత!
Bapatla: వేటపాలెం మండలంలో రెండేళ్లుగా దివ్యాంగుల డ్వాక్రా సంఘాల ఏర్పాటులో నిర్లక్ష్యం వహిస్తున్నారంటూ ఎంపీడీవో పాశం రాజారావుకు నవ్యాంధ్ర వికలాంగుల హక్కుల సేవా సమితి వినతిపత్రం అందజేసింది.
Bapatla: దివ్యాంగుల గోడు పట్టదా?: ఎంపీడీవోకు వినతిపత్రం అందజేత!
బాపట్ల: దివ్యాంగుల సంక్షేమం కోసం ప్రభుత్వం పలు పథకాలు అమలు చేస్తున్నప్పటికీ.. వేటపాలెం మండలంలో అర్హులైన దివ్యాంగులకు ఆ పథకాల ప్రయోజనాలు అందేలా స్వయం సహాయక సంఘాల ఏర్పాటు జరగడం లేదని నవ్యాంధ్ర వికలాంగుల హక్కుల సేవా సమితి రాష్ట్ర అధ్యక్షులు షేక్ కాలేషా ఆరోపించారు. దాదాపు రెండేళ్లుగా దివ్యాంగుల స్వయం సహాయక సంఘాల ఏర్పాటుకు అధికారులు చొరవ చూపకపోవడంతో అర్హులైన దివ్యాంగులు తీవ్ర ఇబ్బందులు ఎదుర్కొంటున్నారని తెలిపారు.
ఈ సమస్యపై శుక్రవారం వేటపాలెం మండల పరిషత్ అభివృద్ధి అధికారి పాశం రాజారావును కలిసి వినతిపత్రం అందజేశారు. మండలంలో గ్రామీణ అభివృద్ధి శాఖ (వెలుగు–డ్వాక్రా) ద్వారా అర్హులైన దివ్యాంగులకు స్వయం సహాయక సంఘాలను ఏర్పాటు చేయడంలో నిర్లక్ష్యం వహించిన ఏపీఎం కాటి అంజిబాబుపై తగిన చర్యలు తీసుకోవాలని ఎంపీడీవోను కోరారు.
కాలేషా మాట్లాడుతూ.. వేటపాలెం మండలంలో దివ్యాంగుల స్వయం సహాయక సంఘాలను ఏర్పాటు చేయాలని గతంలో పలుమార్లు సంబంధిత అధికారులను కలిసి విజ్ఞప్తి చేసినప్పటికీ సమస్య పరిష్కారం కాలేదన్నారు. వినతిపత్రాలు స్వీకరించి కూడా చర్యలు తీసుకోకుండా నిర్లక్ష్యంగా వ్యవహరించారని ఆరోపించారు. ఉన్నతాధికారుల నుంచి ఆదేశాలు వచ్చినప్పటికీ వాటిని అమలు చేయడంలో జాప్యం చేస్తున్నారని పేర్కొన్నారు.
పక్క మండలాల్లో సంక్షేమ పథకాల అమలు
పక్కనే ఉన్న చిన్నగంజాం మండలంలో దివ్యాంగుల స్వయం సహాయక సంఘాలను ఏర్పాటు చేసి, వాటి ద్వారా అర్హులకు వివిధ సంక్షేమ పథకాల ప్రయోజనాలు అందిస్తున్నారని కాలేషా తెలిపారు. అయితే వేటపాలెం మండలంలో మాత్రం దివ్యాంగుల సంఘాల ఏర్పాటు విషయంలో తీవ్ర నిర్లక్ష్యం కనిపిస్తోందని విమర్శించారు. దీంతో అర్హులైన దివ్యాంగులు ప్రభుత్వ సంక్షేమ పథకాల ప్రయోజనాలను పొందలేక నష్టపోతున్నారని ఆవేదన వ్యక్తం చేశారు.
చట్టం ఉన్నా.. అమలు ఏదీ?
దివ్యాంగుల హక్కుల చట్టం–2016 ప్రకారం దివ్యాంగులకు సమాన అవకాశాలు, సంక్షేమం, సాధికారత కల్పించాల్సిన బాధ్యత ప్రభుత్వ యంత్రాంగంపై ఉందని కాలేషా గుర్తుచేశారు. ఇప్పటికైనా అధికారులు స్పందించి మండలంలోని అర్హులైన దివ్యాంగులను గుర్తించి నూతనంగా స్వయం సహాయక సంఘాలను ఏర్పాటు చేయాలని డిమాండ్ చేశారు. అలాగే ఇప్పటివరకు జరిగిన జాప్యంపై విచారణ జరిపి, నిర్లక్ష్యానికి బాధ్యులైన అధికారులపై తగిన చర్యలు తీసుకోవాలని కోరారు.
దివ్యాంగుల సమస్యలను ఇకనైనా నిర్లక్ష్యం చేయకుండా తక్షణమే పరిష్కరించాలని, స్వయం సహాయక సంఘాల ఏర్పాటు ప్రక్రియను వేగవంతం చేసి వారికి ప్రభుత్వ సంక్షేమ పథకాలు అందేలా చర్యలు తీసుకోవాలని ఎంపీడీవోను కోరారు. ఈ కార్యక్రమంలో నవ్యాంధ్ర వికలాంగుల హక్కుల సేవా సమితి జిల్లా అధ్యక్షులు ఇరుపని వెంకటేశ్వర్లు, పి. అనిల్ నాయుడు తదితరులు పాల్గొన్నారు.