Bapatla: బాపట్లలో అల్లర్లు లేవు: ఎస్పీ ఉమామహేశ్వర్

బాపట్ల జిల్లా: బాపట్ల జిల్లా వ్యాప్తంగా స్థానిక సంస్థల ఎన్నికలకు సంబంధించి రెండో రోజు నామినేషన్ల ప్రక్రియ ప్రశాంతంగా ముగిసింది. జిల్లాలోని పలు ప్రాంతాల్లో నామినేషన్ కేంద్రాల వద్ద అధికారులు ఎన్నికల ప్రక్రియను సజావుగా నిర్వహించారు. ఎలాంటి అవాంఛనీయ ఘటనలు చోటుచేసుకోకుండా పోలీసులు ముందస్తు భద్రతా చర్యలు చేపట్టారు.

ఎన్నికల నేపథ్యంలో జిల్లాలో శాంతిభద్రతల పరిరక్షణకు ప్రత్యేక చర్యలు తీసుకున్నట్లు జిల్లా ఎస్పీ బి. ఉమామహేశ్వర్ తెలిపారు. నామినేషన్ కేంద్రాల వద్ద పటిష్ట పోలీస్ బందోబస్తు ఏర్పాటు చేయడంతో పాటు, నిరంతరం గస్తీ నిర్వహించేలా పోలీస్ సిబ్బందికి ఆదేశాలు జారీ చేశారు. ఎన్నికల కోడ్‌ను ఉల్లంఘించిన వారిపై కఠిన చర్యలు తీసుకుంటామని హెచ్చరించారు. శాంతిభద్రతలకు విఘాతం కలిగించే చర్యలకు పాల్పడితే ఉపేక్షించేది లేదని స్పష్టం చేశారు.

జిల్లాలో 144 సెక్షన్ అమలు చేస్తూ, ఎలాంటి అల్లర్లు జరగకుండా పోలీసులు అప్రమత్తంగా వ్యవహరించారు. ప్రజలు, రాజకీయ పార్టీలు ఎన్నికల నిబంధనలను పాటిస్తూ ప్రశాంత వాతావరణంలో ఎన్నికల ప్రక్రియకు సహకరించాలని పోలీస్ అధికారులు సూచించారు.