Vinukonda: వినుకొండలో పోలింగ్ సరళిని పరిశీలించిన కలెక్టర్ కృత్తికా శుక్ల!

Vinukonda: వినుకొండ మున్సిపల్ ఎన్నికల పోలింగ్ సరళిని పల్నాడు జిల్లా కలెక్టర్ డాక్టర్ కృత్తికా శుక్ల స్థానిక అధికారులతో కలిసి పరిశీలించారు. పట్టణంలోని పలు పోలింగ్ కేంద్రాలను సందర్శించి ఓటింగ్ జరుగుతున్న తీరును, ఎన్నికల ఏర్పాట్లను క్షేత్రస్థాయిలో సమీక్షించారు. ఈ సందర్భంగా ఓటర్లు పెద్ద సంఖ్యలో పోలింగ్‌లో పాల్గొని తమ ఓటు హక్కును వినియోగించుకోవడంపై కలెక్టర్ హర్షం వ్యక్తం చేశారు.

పల్నాడు జిల్లావ్యాప్తంగా మున్సిపల్ ఎన్నికల పోలింగ్ ప్రశాంత వాతావరణంలో కొనసాగుతోందని, ఇప్పటివరకు ఎలాంటి అవాంఛనీయ సంఘటనలు చోటుచేసుకోలేదని తెలిపారు. సాయంత్రం ఐదు గంటల వరకు పోలింగ్ ప్రక్రియ కొనసాగనున్న నేపథ్యంలో ప్రతి పోలింగ్ కేంద్రంలోని ఓటింగ్ సరళిని అధికారులు నిశితంగా పరిశీలిస్తున్నారని పేర్కొన్నారు.

ఓటు హక్కు ఉన్న ప్రతి ఒక్కరూ నిర్ణీత సమయానికి ముందే తమకు కేటాయించిన పోలింగ్ కేంద్రాలకు చేరుకుని ప్రజాస్వామ్య ప్రక్రియలో భాగస్వాములు కావాలని ఓటర్లకు కలెక్టర్ సూచించారు. ఎన్నికల నిర్వహణలో ఎలాంటి ఇబ్బందులు తలెత్తకుండా అధికారులు అన్ని చర్యలు తీసుకుంటున్నారని స్పష్టం చేశారు.