Health: మంచిద‌ని పిల్ల‌ల‌కు ఫ్రూట్ జ్యూస్‌లు తాగిస్తున్నారా.? పెద్ద‌య్యాక జ‌రిగేది ఇదే..

Health: చాలా మంది తల్లిదండ్రులు పిల్లలకు కూల్‌డ్రింక్స్‌కు బదులుగా ఫ్రూట్ జ్యూస్ ఇస్తే ఆరోగ్యానికి మంచిదని భావిస్తారు. అయితే తాజా అధ్యయనం మాత్రం దీనిపై కీలక హెచ్చరిక చేసింది. చిన్నప్పటి నుంచి తరచూ ఫ్రూట్ జ్యూస్ లేదా చక్కెర ఎక్కువగా ఉండే పానీయాలు తాగితే, పెద్దయ్యాక హై బ్లడ్ ప్రెజర్ (హైపర్‌టెన్షన్) వచ్చే ప్రమాదం గణనీయంగా పెరిగే అవకాశం ఉందని పరిశోధకులు వెల్లడించారు.

25 ఏళ్ల పాటు సాగిన అధ్యయనం

ఈ అధ్యయనం ప్రముఖ వైద్య జర్నల్ స‌ర్క్యులేష‌న్‌లో ప్రచురితమైంది. అమెరికాలో 25 వేల మందికి పైగా వ్యక్తులను దాదాపు 25 సంవత్సరాల పాటు పరిశీలించి ఈ పరిశోధన నిర్వహించారు. రోజుకు రెండు సార్లు లేదా అంతకంటే ఎక్కువ చక్కెర పానీయాలు తాగిన పిల్లలకు పెద్దయ్యాక హై బీపీ వచ్చే ప్రమాదం 52 శాతం ఎక్కువగా కనిపించింది. రోజూ ఒకటిన్నర సర్వింగ్ లేదా అంతకంటే ఎక్కువ ఫ్రూట్ జ్యూస్ తాగిన వారిలో హై బీపీ ప్రమాదం 35 శాతం అధికంగా ఉన్నట్లు గుర్తించారు. వారానికి మూడు సార్ల కంటే తక్కువగా ఇలాంటి పానీయాలు తీసుకున్న వారితో పోలిస్తే ఈ ప్రమాదం ఎక్కువగా నమోదైంది.

పండ్లు తినడం మంచిదే.. కానీ జ్యూస్ మాత్రం ఎందుకు కాదు?

ఈ అధ్యయనం ప్రకారం పండ్లు తినడం ఆరోగ్యానికి హానికరం కాదు. అసలు సమస్య పండ్లలోని చక్కెర కాదు.. దాన్ని ఏ రూపంలో తీసుకుంటున్నామనేదే ముఖ్యమని పరిశోధకులు చెబుతున్నారు. పూర్తి పండ్లలో ఫైబర్ ఎక్కువగా ఉంటుంది. ఈ ఫైబర్ వల్ల శరీరంలో చక్కెర నెమ్మదిగా శోషిస్తుంది. దీంతో రక్తంలో చక్కెర, ఇన్సులిన్ స్థాయిలు ఒక్కసారిగా పెరగవు.

కానీ జ్యూస్ తయారు చేసే సమయంలో ఫైబర్ చాలా వరకు తొలగిపోతుంది. దీంతో అందులోని చక్కెర వేగంగా శరీరంలోకి చేరుతుంది. ఇలా తరచూ జరగడం వల్ల ఇన్సులిన్ నిరోధకత (Insulin Resistance) పెరిగి, రక్తపోటును నియంత్రించే శరీర వ్యవస్థపై ప్రభావం చూపే అవకాశం ఉందని అధ్యయనం పేర్కొంది.

జ్యూస్‌కు బదులుగా పండ్లు తింటే ఎంత ప్రయోజనం?

పరిశోధనలో మరో ఆసక్తికర విషయం కూడా బయటపడింది. రోజుకు ఒకసారి చక్కెర పానీయాలకు బదులుగా పూర్తి పండ్లు తింటే హై బీపీ ప్రమాదం 22 శాతం వరకు తగ్గవచ్చు. ఫ్రూట్ జ్యూస్‌కు బదులుగా పూర్తి పండ్లు తింటే ప్రమాదం 19 శాతం వరకు తగ్గే అవకాశం ఉందని పరిశోధకులు గుర్తించారు. అందుకే పిల్లలకు జ్యూస్ ఇవ్వడం కంటే నేరుగా పండ్లు తినే అలవాటు చేయడం మంచిదని నిపుణులు సూచిస్తున్నారు.

పూర్తి పండ్లు ఎందుకు ఆరోగ్యానికి మేలు చేస్తాయి?

పూర్తి పండ్లలో ఫైబర్‌తో పాటు శరీరానికి అవసరమైన అనేక పోషకాలు ఉంటాయి. పొటాషియం శరీరంలో అదనపు సోడియంను బయటకు పంపించి రక్తపోటును నియంత్రించడంలో సహాయపడుతుంది. యాంటీఆక్సిడెంట్లు కణాలను రక్షించి ఆరోగ్యాన్ని మెరుగుపరుస్తాయి. పాలీఫెనాల్స్ రక్తనాళాల పనితీరును మెరుగుపరచి గుండె ఆరోగ్యానికి మేలు చేస్తాయి. మరోవైపు, చక్కెర పానీయాల్లో ఉండే ఫ్రక్టోజ్ ఎక్కువగా కాలేయానికి చేరి కొవ్వు పేరుకుపోవడం, ఫ్యాటీ లివర్, ట్రైగ్లిజరైడ్లు పెరగడం, పొట్ట చుట్టూ కొవ్వు నిల్వ కావడం వంటి సమస్యలకు దారితీయవచ్చు. ఇవన్నీ దీర్ఘకాలంలో రక్తపోటు పెరగడానికి కారణమవుతాయని పరిశోధకులు చెబుతున్నారు.

నిపుణుల సూచన

పిల్లలకు ప్రతిరోజూ ప్యాకెట్ జ్యూస్ లేదా చక్కెర పానీయాలు ఇవ్వడం కంటే, తాజా పండ్లను నేరుగా తినే అలవాటు చేయడం ఆరోగ్యానికి ఎంతో మేలు చేస్తుంది. చిన్నప్పటి ఆహారపు అలవాట్లే భవిష్యత్తులో గుండె ఆరోగ్యాన్ని, రక్తపోటును ప్రభావితం చేసే అవకాశం ఉందని నిపుణులు సూచిస్తున్నారు.