Health: రాత్రంతా నిద్ర‌పోయినా.. ఉద‌యం ఆల‌స‌ట‌గా ఉంటోందా.? మీలో ఈ లోపం ఉన్న‌ట్లే

Health: ప్రతిరోజూ సరిపడా నిద్రపోయినా శరీరం అలసటగా అనిపించడం, గోర్లు బలహీనంగా మారడం, జుట్టు ఎక్కువగా రాలిపోవడం వంటి సమస్యలను చాలామంది సాధారణంగా తీసుకుంటారు. కానీ ఇవి శరీరంలో అవసరమైన విటమిన్లు, ఖనిజాలు (న్యూట్రియెంట్స్) లోపిస్తున్నాయనే సంకేతాలు కావచ్చని ఆరోగ్య నిపుణులు హెచ్చరిస్తున్నారు.

పోషకాహార లోపం ఎందుకు వస్తుంది?

ప్రస్తుతం మారుతున్న జీవనశైలి, సమతుల్య ఆహారం తీసుకోకపోవడం, ఫాస్ట్ ఫుడ్, ప్యాకెట్ ఫుడ్స్ ఎక్కువగా తినడం, అధిక ఒత్తిడి వంటి కారణాలతో శరీరానికి అవసరమైన పోషకాలు అందడం తగ్గుతోంది. దీంతో విటమిన్లు, ఐరన్, ఇతర ఖనిజాల లోపం ఏర్పడుతుంది. ఈ సమస్య ఒక్కసారిగా కనిపించదు. క్రమంగా లక్షణాలు బయటపడటంతో చాలామంది వాటిని నిర్లక్ష్యం చేస్తుంటారు.

ఆరోగ్య నిపుణుల అభిప్రాయం ప్రకారం, నగరాల్లో నివసించే వారిలో ఈ సమస్య మరింత ఎక్కువగా కనిపిస్తోంది. లక్షణాలు సాధారణంగా ఉండటంతో చాలా మంది వాటిని పెద్దగా పట్టించుకోరు.

విటమిన్ల లోపాన్ని తెలిపే ముఖ్యమైన లక్షణాలు

శరీరంలో పోషకాల లోపం ఉంటే కొన్ని స్పష్టమైన సంకేతాలు కనిపిస్తాయి. రాత్రి బాగా నిద్రపోయినా రోజంతా అలసటగా ఉండటం, శరీరంలో శక్తి తగ్గిపోవడం, పని చేయాలన్న ఉత్సాహం లేకపోవడం, జుట్టు సాధారణం కంటే ఎక్కువగా రాలిపోవడం, వాతావరణ మార్పులతో కొంత జుట్టు రాలడం సహజమే. కానీ నిరంతరం ఎక్కువగా జుట్టు ఊడిపోతుంటే శరీరానికి సరైన పోషకాలు అందడం లేదని అర్థం కావచ్చు.

నోటి పుండ్లు, తిమ్మిర్లు, బలహీనమైన గోర్లు కూడా సంకేతాలే

శరీరంలో విటమిన్ల లోపం ఉంటే నోటిలో తరచూ పుండ్లు రావడం, పెదాలు పగలడం వంటి సమస్యలు కూడా కనిపిస్తాయి. చాలామంది వీటికి బయట నుంచి క్రీములు లేదా మందులు వాడినా అసలు కారణం మాత్రం పోషకాల లోపమే కావచ్చు. అలాగే చేతులు, కాళ్లలో తిమ్మిర్లు లేదా మొద్దుబారిన భావన కలగడం కూడా నిర్లక్ష్యం చేయకూడని లక్షణం. ఇది నరాలపై ప్రభావం పడుతున్న సంకేతం కావచ్చు. మరోవైపు ముఖం పాలిపోయినట్లు కనిపించడం, గోర్లు బలహీనంగా మారి తరచూ విరిగిపోవడం కూడా శరీరంలో విటమిన్లు లేదా ఐరన్ వంటి పోషకాల లోపాన్ని సూచిస్తాయి.

ఎలా గుర్తించాలి? ఎలా నివారించాలి?

ఆరోగ్య నిపుణుల ప్రకారం, శరీరంలో విటమిన్లు లేదా ఇతర పోషకాల లోపం ఉందో లేదో సాధారణ రక్త పరీక్ష ద్వారా తెలుసుకోవచ్చు. పరీక్షల ఆధారంగా వైద్యుల సూచన మేరకు ఆహారంలో మార్పులు చేసుకోవడం లేదా అవసరమైతే సప్లిమెంట్లు తీసుకోవడం ద్వారా ఈ సమస్యను నియంత్రించవచ్చు.

ఆకుకూరలు, పండ్లు, గుడ్లు, పాలు, పప్పుధాన్యాలు, డ్రై ఫ్రూట్స్ వంటి పోషకాహారం తీసుకోవడం వల్ల విటమిన్ల లోపం రాకుండా చూసుకోవచ్చు. శరీరం ఇచ్చే చిన్న చిన్న సంకేతాలను నిర్లక్ష్యం చేయకుండా వెంటనే వైద్యులను సంప్రదిస్తే భవిష్యత్తులో వచ్చే అనేక ఆరోగ్య సమస్యలను నివారించే అవకాశం ఉంటుంది.

గమనిక: ఈ సమాచారం అవగాహన కోసం మాత్రమే. మీకు పై లక్షణాలు తరచూ కనిపిస్తే స్వయంగా మందులు వాడకుండా వైద్యులను సంప్రదించి అవసరమైన పరీక్షలు చేయించుకోవడం మంచిది.