Health: చర్మంలో ఈ మార్పులు కనిపిస్తున్నాయా? లివ‌ర్ స‌మ‌స్య‌కు సంకేతం కావొచ్చు

Health: కాలేయం (లివర్) మన శరీరంలో అత్యంత ముఖ్యమైన అవయవాల్లో ఒకటి. అయితే ప్రస్తుతం అనారోగ్యకరమైన ఆహారం, అధిక మద్యం సేవించడం, ఊబకాయం వంటి కారణాలతో కాలేయ సంబంధిత వ్యాధులు పెరుగుతున్నాయి. చాలా సందర్భాల్లో కాలేయ సమస్యలు ప్రారంభ దశలో పెద్దగా లక్షణాలు కనిపించవు. అయితే చర్మంలో కనిపించే కొన్ని మార్పులు లివర్ సమస్యకు ముందస్తు హెచ్చరికలుగా ఉండొచ్చు.

చర్మం, కళ్ల రంగు పసుపుగా మారితే నిర్లక్ష్యం చేయొద్దు

కాలేయం సరిగా పనిచేయకపోతే శరీరంలో బిలిరుబిన్ అనే పదార్థం పెరుగుతుంది. దీంతో చర్మం, కళ్లలోని తెల్లని భాగం పసుపు రంగులోకి మారుతుంది. దీనినే కామెర్లు (జాండిస్) అంటారు. ఇది కాలేయ సమస్యకు ప్రధాన సంకేతంగా భావిస్తారు. ఇలాంటి లక్షణాలు కనిపిస్తే వెంటనే వైద్యుడిని సంప్రదించడం అవసరం.

చర్మంలో దురద, చిన్న దెబ్బలకే నీలి మచ్చలు వస్తున్నాయా?

కాలేయం దెబ్బతిన్నప్పుడు కొందరికి ఎలాంటి స్పష్టమైన కారణం లేకుండానే శరీరమంతా లేదా కొన్ని భాగాల్లో నిరంతర దురద రావచ్చు. అలాగే రక్తం గడ్డకట్టడానికి అవసరమైన ప్రోటీన్ల తయారీలో కాలేయం కీలక పాత్ర పోషిస్తుంది. అది సరిగా పనిచేయకపోతే చిన్న దెబ్బ తగిలినా చర్మంపై నీలం లేదా నలుపు రంగు మచ్చలు త్వరగా ఏర్పడవచ్చు. ఈ లక్షణాలను తేలికగా తీసుకోకుండా వైద్య పరీక్షలు చేయించుకోవడం మంచిది.

చర్మంపై సాలీడు గూడు లాంటి ఎర్రటి మచ్చలు కూడా సంకేతమే

కొన్ని రకాల కాలేయ వ్యాధుల్లో చర్మంపై చిన్న చిన్న ఎర్రటి రక్తనాళాలు సాలీడు గూడు ఆకారంలో కనిపించవచ్చు. వీటిని స్పైడర్ యాంజియోమా అని పిలుస్తారు. ఇవి ఎక్కువగా ముఖం, మెడ, ఛాతీ లేదా భుజాలపై కనిపిస్తాయి. ఇలాంటి మార్పులు గమనిస్తే వాటిని నిర్లక్ష్యం చేయకుండా వైద్యుడి సలహా తీసుకోవాలి.

కాలేయ సమస్యల్లో కనిపించే ఇతర లక్షణాలు

చర్మంలో మార్పులతో పాటు కాలేయం దెబ్బతింటే తరచూ అలసటగా ఉండటం, ఆకలి తగ్గిపోవడం, వికారం లేదా వాంతులు, కడుపు నొప్పి లేదా కడుపు ఉబ్బడం, కాళ్లు, చీలమండలు వాపు రావడం వంటి లక్షణాలు కనిపించవచ్చు. అలాగే మూత్రం ముదురు రంగులో రావడం, మలం లేత రంగులో ఉండటం, కారణం లేకుండా బరువు తగ్గడం లేదా అయోమయం వంటి సమస్యలు కూడా రావచ్చు. ఈ లక్షణాలు ఇతర వ్యాధుల్లో కూడా కనిపించే అవకాశం ఉన్నందున స్వయంగా మందులు వాడకుండా వైద్యులను సంప్రదించడం ఉత్తమం.

కాలేయాన్ని ఆరోగ్యంగా ఉంచాలంటే ఏం చేయాలి?

కాలేయం ఆరోగ్యంగా ఉండాలంటే సమతుల్యమైన పోషకాహారం తీసుకోవాలి. నూనె ఎక్కువగా ఉండే, ప్రాసెస్డ్ ఫుడ్స్‌ను తగ్గించాలి. ప్రతిరోజూ వ్యాయామం చేయడం, బరువును అదుపులో ఉంచడం, మద్యం సేవించకుండా ఉండటం చాలా ముఖ్యం. వైద్యుల సలహా లేకుండా ఎక్కువకాలం మందులు వాడకూడదు. అవసరమైతే హెపటైటిస్ వ్యాక్సిన్ వేయించుకోవడం, క్రమం తప్పకుండా ఆరోగ్య పరీక్షలు చేయించుకోవడం కూడా మంచిది. కాలేయానికి సంబంధించిన ఏవైనా లక్షణాలు కనిపిస్తే ఆలస్యం చేయకుండా వైద్యుడిని సంప్రదిస్తే తీవ్రమైన సమస్యలను ముందుగానే నివారించే అవకాశం ఉంటుంది.

గమనిక: ఈ సమాచారం అవగాహన కోసం మాత్రమే. మీకు పై లక్షణాలు కనిపిస్తే తప్పనిసరిగా వైద్యుడిని సంప్రదించి అవసరమైన పరీక్షలు చేయించుకోండి.