ఎండ‌లో ముఖం కందిపోతోందా? క‌ల‌బంద నుంచి పెరుగు వ‌ర‌కు, స‌న్‌టాన్ త‌గ్గించే చిట్కాలు

Summer Skincare: వేసవి కాలంలో మండే ఎండ, అధిక ఉష్ణోగ్రతల కారణంగా శరీరానికి మాత్రమే కాదు చర్మానికి కూడా అనేక సమస్యలు ఎదురవుతాయి. ముఖ్యంగా ఎక్కువసేపు ఎండలో తిరగడం వల్ల చర్మం నల్లబడటం (సన్ టాన్) సాధారణ సమస్యగా మారుతుంది. ఈ స‌మ‌స్య‌ను త‌గ్గించుకునే నేచుర‌ల్ చిట్కాలు ఇవే..

పెరుగు – శనగపిండి ఫేస్ ప్యాక్‌తో టాన్‌కు చెక్

పెరుగు, శనగపిండి కలిపి తయారుచేసే ఫేస్ ప్యాక్ చర్మంపై పేరుకుపోయిన టాన్‌ను తగ్గించడంలో ఉపయోగపడుతుంది. ఒక గిన్నెలో రెండు స్పూన్ల పెరుగు, ఒక స్పూన్ శనగపిండి వేసి బాగా కలపాలి. ఈ మిశ్రమాన్ని ముఖం, మెడపై సమానంగా రాసి 20 నిమిషాలు ఉంచాలి. తర్వాత చల్లటి నీటితో శుభ్రం చేసుకోవాలి.

ఈ ప్యాక్‌ను వారానికి రెండు నుంచి మూడు సార్లు ఉపయోగిస్తే చర్మం మృదువుగా మారడంతో పాటు సహజ కాంతి కూడా పెరుగుతుంది.

దోసకాయ – టమాటా ప్యాక్‌తో చర్మానికి చల్లదనం

దోసకాయ చర్మానికి చల్లదనాన్ని అందించడంలో బాగా ఉప‌యోగ‌ప‌డుతుంది. దోసకాయను మెత్తగా గ్రైండ్ చేసి కొద్దిగా పసుపు కలిపి ముఖానికి రాసుకోవచ్చు. ఇది టాన్ తగ్గించడంతో పాటు చర్మాన్ని తాజాగా ఉంచుతుంది.

అలాగే టమాటా గుజ్జులో కొద్దిగా పెరుగు కలిపి ముఖానికి అప్లై చేయవచ్చు. 20 నిమిషాల తర్వాత కడిగేస్తే చర్మంపై పేరుకుపోయిన మృతకణాలు తొలగి కాంతివంతంగా కనిపిస్తుంది. ఈ రెండు ప్యాక్‌లను వారానికి ఒకటి లేదా రెండు సార్లు ఉపయోగించడం మంచిది.

కలబంద – నిమ్మరసం మిశ్రమం ప్రయోజనాలు

కలబంద (అలోవెరా) చర్మ సంరక్షణలో అత్యంత ఉపయోగకరమైన సహజ పదార్థం. తాజా కలబంద జెల్‌లో కొద్దిగా నిమ్మరసం కలిపి ముఖం, మెడపై రాయాలి. సుమారు 15 నిమిషాల తర్వాత శుభ్రం చేసుకోవాలి. ఈ మిశ్రమం చర్మాన్ని చల్లబరచడమే కాకుండా టాన్ తగ్గించడంలో కూడా సహాయపడుతుంది. వారానికి రెండు నుంచి మూడు సార్లు ఉపయోగిస్తే మంచి ఫలితాలు కనిపించే అవకాశం ఉంటుంది.

బొప్పాయి – తేనె – పసుపుతో సహజ కాంతి

బొప్పాయిలో ఉండే ఎంజైమ్స్ చర్మంపై ఉన్న మృతకణాలను తొలగించడంలో సహాయపడతాయి. బొప్పాయి గుజ్జులో కొద్దిగా తేనె, చిటికెడు పసుపు కలిపి పేస్ట్ తయారు చేయాలి. ఈ ప్యాక్‌ను ముఖానికి రాసి 10 నిమిషాల తర్వాత కడగాలి. ఇది చర్మానికి తేమను అందించడంతో పాటు టాన్‌ను తగ్గించి సహజ కాంతిని పెంచడంలో ఉపయోగపడుతుంది. ఒక రోజు విడిచి ఒక రోజు ఉపయోగిస్తే మరింత ప్రయోజనం పొందవచ్చు.

టాన్, అలర్జీలను నిర్లక్ష్యం చేయొద్దు

వేసవిలో సన్ టాన్‌తో పాటు చర్మ అలర్జీలు, దురద, ఎర్రటి మచ్చలు వంటి సమస్యలు కూడా రావచ్చు. టాన్ ఒక సమస్య కాగా, అలర్జీలు మరో సమస్య. ఇవి రెండూ చర్మాన్ని వేర్వేరు విధాలుగా ప్రభావితం చేస్తాయి. చర్మంపై మార్పులు ఎక్కువగా కనిపిస్తే లేదా సమస్యలు తీవ్రంగా మారితే వెంటనే చర్మ వైద్యుడిని సంప్రదించడం మంచిది. అలాగే బయటకు వెళ్లేటప్పుడు సన్‌స్క్రీన్ వాడటం, టోపీ లేదా గొడుగు ఉపయోగించడం, తగినంత నీరు తాగడం వంటి జాగ్రత్తలు పాటిస్తే సన్ టాన్ సమస్యను చాలా వరకు నివారించవచ్చు.