Health: రాత్రి 11 గంటల తర్వాత మేల్కొని ఉంటున్నారా? మీకు పిల్లలు పుట్టడం కష్టమే

Health: ప్రస్తుత వేగవంతమైన జీవనశైలిలో చాలా మంది మహిళలు ఉద్యోగం, కుటుంబ బాధ్యతలు, ఇంటి పనులతో బిజీగా గడుపుతున్నారు. దీంతో నిద్రకు సరైన సమయం కేటాయించలేకపోతున్నారు. రాత్రి ఆలస్యంగా నిద్రపోవడం, తగినంత విశ్రాంతి తీసుకోకపోవడం వల్ల కేవలం అలసట మాత్రమే కాదు, హార్మోన్ల సమతుల్యత, రుతుక్రమం, సంతానోత్పత్తి సామర్థ్యంపై కూడా ప్రభావం పడే అవకాశం ఉందని నిపుణులు హెచ్చరిస్తున్నారు.

నిద్రకు మహిళల ఆరోగ్యంతో ఉన్న ప్రత్యేక సంబంధం

మన శరీరం ఒక జీవ గడియారం మాదిరిగా పనిచేస్తుంది. ఈ గడియారం సక్రమంగా పనిచేయాలంటే సరైన సమయంలో నిద్రపోవడం అవసరం. ముఖ్యంగా మహిళల్లో నిద్ర, హార్మోన్ల మధ్య బలమైన సంబంధం ఉంటుంది.

రోజుకు ఎన్ని గంటలు నిద్రపోతున్నారన్నది ఎంత ముఖ్యమో, ఏ సమయంలో నిద్రపోతున్నారన్నది కూడా అంతే ముఖ్యం. రాత్రి వేళల్లో శరీరంలో జరిగే హార్మోన్ల ఉత్పత్తి, శారీరక పునరుద్ధరణ ప్రక్రియలకు సరైన నిద్ర చాలా అవసరం.

ఆలస్యంగా నిద్రపోతే హార్మోన్లపై ప్రభావం

మహిళల్లో అండోత్పత్తి (Ovulation) ప్రక్రియను నియంత్రించే కొన్ని ముఖ్యమైన హార్మోన్లు గాఢ నిద్ర సమయంలో ఉత్పత్తి అవుతాయి. వీటిలో ముఖ్యమైనది LH (Luteinizing Hormone). నిద్ర తరచూ భంగం కలిగితే లేదా అర్ధరాత్రి వరకు మేల్కొని ఉంటే ఈ హార్మోన్ ఉత్పత్తి తగ్గే అవకాశం ఉంటుంది. దీని వల్ల రుతుక్రమం అసమానంగా మారడం, కొన్ని నెలల్లో అండోత్పత్తి జరగకపోవడం వంటి సమస్యలు తలెత్తవచ్చు. అదే సమయంలో శరీరంలో ఈస్ట్రోజెన్, ప్రొజెస్టెరాన్ వంటి హార్మోన్ల సమతుల్యత కూడా దెబ్బతినే ప్రమాదం ఉంటుంది.

నిద్రలేమి వల్ల సంతానోత్పత్తి సామర్థ్యానికి ముప్పు

మహిళల్లో మెలటోనిన్ అనే హార్మోన్ అండాల నాణ్యతను కాపాడటంలో కీలక పాత్ర పోషిస్తుంది. తగినంత నిద్ర లేకపోతే ఈ హార్మోన్ ఉత్పత్తి తగ్గవచ్చు. ఇక నిద్రలేమి కారణంగా కార్టిసోల్ అనే ఒత్తిడి హార్మోన్ స్థాయులు పెరుగుతాయి. కార్టిసోల్ అధికమైతే మెదడు, అండాశయాల మధ్య ఉండే హార్మోన్ల సమన్వయం దెబ్బతింటుంది. దీని ప్రభావంతో అండాల ఎదుగుదల, విడుదల ప్రక్రియల్లో ఆటంకాలు ఏర్పడే అవకాశం ఉంది. దీర్ఘకాలంగా నిద్రలేమి కొనసాగితే గర్భం దాల్చడంలో ఇబ్బందులు ఎదురయ్యే ప్రమాదం ఉందని వైద్య నిపుణులు చెబుతున్నారు.

రుతుక్రమం, ఒత్తిడి, శరీర పనితీరుపై ప్రభావం

సరైన నిద్ర లేకపోతే మహిళల్లో రుతుక్రమం గందరగోళానికి గురయ్యే అవకాశం ఉంది. కొందరిలో పీరియడ్స్ ఆలస్యంగా రావడం, మరికొందరిలో అసాధారణంగా మారడం వంటి సమస్యలు కనిపించవచ్చు. అదే సమయంలో ఒత్తిడి స్థాయులు పెరగడం, మానసిక అలసట, చిరాకు, ఏకాగ్రత లోపం వంటి సమస్యలు కూడా ఎదురవుతాయి. శరీరంలో ఇన్సులిన్ పనితీరు కూడా ప్రభావితమై భవిష్యత్తులో ఇతర ఆరోగ్య సమస్యలకు దారితీయవచ్చు.

మహిళలు రోజుకు ఎంతసేపు నిద్రపోవాలి?

వైద్య నిపుణుల సూచనల ప్రకారం మహిళలు రోజుకు కనీసం 7 నుంచి 8 గంటల పాటు నాణ్యమైన నిద్ర తీసుకోవాలి. అంతేకాకుండా రాత్రి 11 గంటలలోపు నిద్రపోవడం ఆరోగ్యానికి మరింత మేలు చేస్తుందని చెబుతున్నారు. పరిశోధనల ప్రకారం 7-8 గంటల నిద్ర తీసుకునే మహిళల్లో గర్భం దాల్చే అవకాశాలు మెరుగ్గా ఉండగా, తక్కువ లేదా అధిక నిద్ర తీసుకునేవారిలో ఆ అవకాశాలు తగ్గినట్లు గుర్తించారు.