Soybean: 43 శాతం ప్రోటీన్లు ఉండే ఏకైక పంట... రైతులకు కాసుల వర్షం

Cultivation: చైనాలో పుట్టి ప్రపంచ దేశాల ఆకలిని తీరుస్తున్న అద్భుతమైన పంట సోయా చిక్కుడు. ప్రస్తుతం మన తెలుగు రాష్ట్రాల్లో దాదాపు 0.88 లక్షల హెక్టార్ల విస్తీర్ణంలో సాగవుతూ, ఏటా 1.73 లక్షల టన్నుల ఉత్పత్తితో రైతులకు కల్పవృక్షంగా మారింది. అటు పప్పుధాన్యంగా, ఇటు నూనె గింజగా రెండు రకాలుగా ఉపయోగపడే ఈ పంటలో ఏకంగా 43 శాతం ప్రోటీన్లు, 20 శాతం నూనె ఉంటాయి. ముఖ్యంగా సోయా నూనె గుండె ఆరోగ్యానికి ఎంతో మేలు చేస్తుందన్న విషయం అందరికీ తెలిసిందే. సోయా సాగుకు వాతావరణం చాలా కీలకం. విత్తనాలు బాగా మొలకెత్తాలంటే పగటి ఉష్ణోగ్రత 15 నుంచి 32 డిగ్రీ సెల్సియస్ మధ్య ఉండాలి. అయితే మొక్క ఏపుగా పెరగాలంటే కాస్త ఎక్కువ ఉష్ణోగ్రత అవసరం. ఉష్ణోగ్రత 10 డిగ్రీల కంటే తగ్గినా లేదా 40 డిగ్రీల కంటే పెరిగినా పంట ఎదుగుదల ఆగిపోతుంది. ఏడాదికి 600 నుంచి 650 మిల్లీమీటర్ల వర్షపాతం ఉండే ప్రాంతాలు ఈ పంటకు అనువైనవి. నేల విషయానికి వస్తే, కర్బన శాతం ఎక్కువగా ఉండి ఇసుక కలిసిన నేలలు సోయాకు ప్రాణం పోస్తాయి. నేల పి.హెచ్ విలువ 6.5 నుంచి 7.5 మధ్య ఉంటే దిగుబడి అద్భుతంగా ఉంటుంది.

నేల తయారీ. విత్తన శుద్ధి..

పొలాన్ని ఒకటి రెండు సార్లు లోతుగా దున్ని, ఆపై కల్టివేటర్‌తో చదును చేసుకోవాలి. సోయా లెగ్యూం జాతికి చెందినది కాబట్టి, గాలిలోని నత్రజనిని గ్రహించేలా రైజోబియం జపానికం అనే బాక్టీరియాతో విత్తన శుద్ధి చేయడం చాలా ముఖ్యం. ఎనిమిది నుంచి పది కిలోల విత్తనానికి 200 గ్రాముల రైజోబియం కల్చర్‌ను కలిపి నీడలో ఆరబెట్టాలి. దీనికంటే ముందే థైరామ్ లేదా కాప్టాన్ వంటి మందులతో విత్తన శుద్ధి చేసుకుంటే చీడపీడల భయం ఉండదు. ఇలా చేయడం వల్ల రసాయనిక ఎరువుల వాడకం కూడా తగ్గుతుంది.

సరైన సమయం ఇదే..

ఖరీఫ్ సీజన్‌లో జూన్ 15 నుంచి జూలై వరకు, రబీలో అక్టోబరులో మరియు వేసవిలో ఫిబ్రవరి నెలలో విత్తనాలు విత్తుకోవచ్చు. నేల స్వభావాన్ని బట్టి విత్తే దూరంలో మార్పులు ఉండాలి. నల్ల రేగడి భూములైతే 45 సెంటీమీటర్ల వరుసల దూరం, మొక్కల మధ్య 5 సెంటీమీటర్ల దూరం ఉండాలి. తేలికపాటి నేలల్లో అయితే 30 సెంటీమీటర్ల వరుసల దూరం, 7.5 సెంటీమీటర్ల మొక్కల మధ్య దూరం పాటించాలి. ఎరువుల విషయానికి వస్తే ఎకరాకు 12 కిలోల నత్రజని, 24 కిలోల భాస్వరం మరియు 16 కిలోల పొటాష్‌ను ఆఖరి దుక్కిలో వేయాలి.

కలుపు నివారణ ,నీటి యాజమాన్యం..

విత్తిన 40 రోజుల వరకు పొలంలో కలుపు లేకుండా జాగ్రత్త పడటం చాలా అవసరం. కలుపు వల్ల దిగుబడి 6 నుంచి 27 శాతం వరకు తగ్గిపోయే ప్రమాదం ఉంది. ఇందుకోసం విత్తిన 24 నుంచి 48 గంటల లోపు అలాక్లోర్ లేదా పెండి మిథాలిన్ అనే మందును పిచికారీ చేయాలి. ఇక నీటి విషయానికి వస్తే, ఖరీఫ్‌లో వర్షాలే సరిపోతాయి కానీ రబీ, వేసవి కాలాల్లో మాత్రం తగినన్ని తడులు ఇవ్వాలి. ముఖ్యంగా మొక్క మొలకెత్తే దశలో, కాయ ఊరే దశలో తేమ తగ్గకుండా చూసుకోవాలి. వేసవిలో కనీసం 5 నుంచి 6 తడులు అవసరమవుతాయి.

కోత , నిల్వ..

కాయలు పూర్తిగా పరిపక్వతకు రాగానే కోయాలి. ఆలస్యం చేస్తే గింజలు రంగు మారి రాలిపోయే అవకాశం ఉంది. కోసిన మొక్కలను కళ్లంపై రెండు మూడు రోజులు ఎండబెట్టి గింజలను వేరు చేయాలి. గింజల్లో తేమ 11 శాతం వచ్చే వరకు ఎండబెట్టి ఆ తర్వాతే గోదాముల్లో భద్రపరుచుకోవాలి. విత్తనం కోసం దాచుకునే వారు మరింత జాగ్రత్తగా ఉండాలి, ఎందుకంటే సోయా విత్తనాలకు ఒక సీజన్ తర్వాత మొలక శాతం తగ్గిపోతుంది. ఈ మెలకువలు పాటిస్తే సోయా సాగులో రైతన్నలు ఖచ్చితంగా విజయ కేతనం ఎగురవేయవచ్చు.