Guntapalli: అవంతి క్యాంపస్‌లో ముగిసిన పూర్వ విద్యార్థుల సమ్మేళనం

Guntapalli: అవంతి గ్రూప్ ఆఫ్ కాలేజెస్ ఆధ్వర్యంలో నిర్వహించిన “కాన్‌ఫ్లూయెన్స్ అలుమ్ని మీట్–2026” కార్యక్రమం ఆదివారం గుంతపల్లిలోని అవంతి ఇంటిగ్రేటెడ్ క్యాంపస్‌లో అత్యంత వైభవంగా జరిగింది. పలువురు ప్రముఖులు, వివిధ రంగాల్లో ఉన్నత స్థానాల్లో ఉన్న పూర్వ విద్యార్థులు, అధ్యాపకులు, ప్రస్తుత విద్యార్థులు పెద్ద సంఖ్యలో పాల్గొని కార్యక్రమాన్ని విజయవంతం చేశారు.

కార్యక్రమానికి ముఖ్య అతిథిగా హాజరైన ప్రొఫెసర్ వి. కామాక్షి ప్రసాద్ మాట్లాడుతూ, విద్యార్థుల విజయాల్లో అలుమ్ని పాత్ర ఎంతో కీలకమని అన్నారు. పూర్వ విద్యార్థులు తమ అనుభవాలను పంచుకోవడం ద్వారా ప్రస్తుత విద్యార్థులకు సరైన మార్గదర్శకత్వం లభిస్తుందని పేర్కొన్నారు.

ప్రొఫెసర్ సి. కృష్ణమోహన్ మాట్లాడుతూ, విద్యార్థులు సాంకేతిక పరిజ్ఞానంతో పాటు కమ్యూనికేషన్ నైపుణ్యాలను పెంపొందించుకోవాలని సూచించారు. ప్రొఫెసర్ ఓ.బి.వి. రామనయ్య మాట్లాడుతూ, విద్య అనేది ఉద్యోగ సాధనకే కాకుండా సమాజ అభివృద్ధికి ఉపయోగపడాలని అన్నారు.

ఈ సందర్భంగా వివిధ రంగాల్లో విశేష ప్రతిభ కనబరిచిన అవంతి పూర్వ విద్యార్థులను ప్రత్యేకంగా సత్కరించారు. యోకోగావా ఇండియా లిమిటెడ్, ట్రాన్స్‌యూనియన్, ఎవోక్ టెక్నాలజీస్, హెటెరో హెల్త్‌కేర్, పోలీస్ శాఖ, రెవెన్యూ శాఖ, ఐటీ మరియు ఇతర కార్పొరేట్ సంస్థల్లో కీలక బాధ్యతలు నిర్వహిస్తున్న అలుమ్నీలు తమ విజయగాథలను వివరించి విద్యార్థులకు స్ఫూర్తినిచ్చారు.

అవంతి గ్రూప్ ఆఫ్ కాలేజెస్ ఛైర్మన్ శ్రీ ఎం. శ్రీనివాసరావు మాట్లాడుతూ, గత మూడు దశాబ్దాలుగా అవంతి సంస్థలు నాణ్యమైన విద్యను అందిస్తూ వేలాది మంది విద్యార్థులను ఉన్నత స్థానాలకు చేర్చాయని తెలిపారు. అలుమ్ని నెట్‌వర్క్‌ను మరింత బలోపేతం చేసి విద్యార్థులకు ఉద్యోగ, ఇంటర్న్‌షిప్ అవకాశాలు కల్పించేందుకు చర్యలు తీసుకుంటున్నట్లు చెప్పారు.

జనరల్ సెక్రటరీ డాక్టర్ ఎం. ప్రియాంక, మేనేజింగ్ డైరెక్టర్ ఐ. శ్రవణ్ కుమార్, వైస్ ప్రెసిడెంట్ ఎం.వి.ఎస్.ఎస్. నందీశ్, హెచ్‌ఆర్ డైరెక్టర్ డాక్టర్ వై. జయప్రద కార్యక్రమంలో పాల్గొని పూర్వ విద్యార్థులను అభినందించారు.

ఈ కార్యక్రమంలో అవంతి ఇన్‌స్టిట్యూట్ ఆఫ్ ఇంజినీరింగ్ అండ్ టెక్నాలజీ ప్రిన్సిపాల్ డాక్టర్ పి.హెచ్.వి. శేష తల్ప సాయి, అవంతి సైంటిఫిక్ టెక్నలాజికల్ అండ్ రీసెర్చ్ అకాడమీ ప్రిన్సిపాల్ డాక్టర్ పి. ఉమాపతి రెడ్డి, అవంతి ఇన్‌స్టిట్యూట్ ఆఫ్ ఫార్మాస్యూటికల్ సైన్సెస్ ప్రిన్సిపాల్ డాక్టర్ బి. రాజ్ కమల్, క్యాంపస్ ఇన్‌చార్జ్ బోస్ బాబు, పీఆర్‌ఓ శ్రీనివాస్, అధ్యాపకులు, సిబ్బంది, విద్యార్థులు పాల్గొన్నారు.

అలుమ్ని మీట్‌లో సాంస్కృతిక కార్యక్రమాలు, పూర్వ విద్యార్థుల అనుభవాల పంచిక, అవార్డుల ప్రదానం, విద్యార్థులతో పరస్పర చర్చలు ప్రత్యేక ఆకర్షణగా నిలిచాయి. పూర్వ విద్యార్థులు తమ పాత జ్ఞాపకాలను గుర్తుచేసుకుంటూ ఆనందాన్ని వ్యక్తం చేశారు.

కార్యక్రమం చివర్లో అతిథులు, పూర్వ విద్యార్థులు మరియు నిర్వాహకులకు కృతజ్ఞతలు తెలుపుతూ, భవిష్యత్తులో మరింత విస్తృత స్థాయిలో అలుమ్ని కార్యక్రమాలు నిర్వహిస్తామని యాజమాన్యం వెల్లడించింది. అవంతి కుటుంబ బంధాన్ని మరింత బలోపేతం చేసిన ఈ అలుమ్ని మీట్ విజయవంతంగా ముగిసింది.