Chandanagar: చందానగర్‌లో ఇద్దరు కేటుగాళ్ల అరెస్ట్.. 5 బైక్‌లు స్వాధీనం

చందానగర్: చందానగర్ రైల్వే స్టేషన్ సమీపంలో అర్ధరాత్రి వేళ ఓ మైనర్‌పై దాడి చేసి మొబైల్ ఫోన్ దోచుకెళ్లిన కేసును చందానగర్ పోలీసులు ఛేదించారు. ఈ దారుణానికి ఒడిగట్టిన ఇద్దరు పాత నేరస్థులను అరెస్ట్ చేయడంతో పాటు, వారి నుంచి దోపిడీకి గురైన సెల్ ఫోన్ మరియు వివిధ జిల్లాల్లో దొంగిలించిన 5 విలాసవంతమైన ద్విచక్ర వాహనాలను పోలీసులు స్వాధీనం చేసుకున్నారు.

పోలీసుల వివరాల ప్రకారం... ఈ నెల 22వ తేదీన రాత్రి 11:30 గంటల ప్రాంతంలో చందానగర్ రైల్వే స్టేషన్ సమీపంలోని హుడా కాలనీ వద్ద ఉన్న ఓ గుడిసె వద్దకు ఇద్దరు యువకులు వచ్చారు. అక్కడ ఒంటరిగా ఉన్న శ్రీ జాన్ సయ్యద్ (16) అనే బాలుడిని మంచినీళ్లు కావాలని అడిగారు. ఆ తర్వాత సమీపంలో మద్యం సేవించి తిరిగి గుడిసె వద్దకు వచ్చి, సయ్యద్‌ను కత్తితో బెదిరించారు. బాధితుడు భయపడకుండా ప్రతిఘటించడంతో అతనిపై దాడి చేసి, అతనికి చెందిన రెడ్‌మీ నోట్ 11 ప్రో మొబైల్ ఫోన్‌ను గుంజుకుని అక్కడ నుంచి పరారయ్యారు.

బాధితుడి ఫిర్యాదుతో రంగంలోకి దిగిన చందానగర్ పోలీసులు కేసు నమోదు చేసి దర్యాప్తు ప్రారంభించారు. సంఘటన స్థలం వద్ద లభించిన సీసీటీవీ ఫుటేజ్ ఆధారంగా నిందితులను పాత నేరస్థులుగా గుర్తించారు.

పక్కా సమాచారంతో ఈ నెల 27న (సోమవారం) ఉదయం 06:00 గంటలకు పాపిరెడ్డి కాలనీలో దాడి చేసిన పోలీసులు ఇద్దరు నిందితులను అదుపులోకి తీసుకున్నారు. అరెస్టయిన వారిని మంగళ్‌హాట్‌కు చెందిన *ఉజార్ల విష్ణు వర్ధన్ (21)* (A-1), శేరిలింగంపల్లి రాజీవ్ గృహకల్ప నివాసి *దండుగుల భాను ప్రసాద్ (25)* (A-2)గా గుర్తించారు.

11 ఆస్తి నేరాలు వెలుగులోకి...

పోలీసుల విచారణలో నిందితులు నిజాలు ఒప్పుకున్నారు. సైబరాబాద్, హైదరాబాద్, యాదాద్రి-భువనగిరి జిల్లాల పరిధిలోని మంగళ్‌హాట్, KPHB, రాయదుర్గం, కూకట్‌పల్లి, భువనగిరి, యాదగిరిగుట్ట పోలీస్ స్టేషన్లలో నమోదైన దాదాపు 11 ఆస్తి నేరాల్లో తమ ప్రమేయం ఉన్నట్లు అంగీకరించారు.

వీరి వద్ద నుంచి దోపిడీకి గురైన రెడ్‌మీ ఫోన్‌తో పాటు దొంగిలించిన బజాజ్ పల్సర్ 220, పల్సర్ 150, పల్సర్ NS 160, KTM డ్యూక్ 200, యమహా ఫాసినో వాహనాలను పోలీసులు స్వాధీనం చేసుకున్నారు.

కాగా, A-1 విష్ణు వర్ధన్‌పై గతంలోనే ఆసిఫ్ నగర్, రాజేంద్రనగర్, మాదాపూర్, పోక్సో (POCSO) సహా 8 కేసులు ఉన్నట్లు పోలీసులు తెలిపారు. నిందితులిద్దరినీ న్యాయస్థానంలో హాజరుపరిచి రిమాండ్‌కు తరలించారు.