Sitarampur: ‘ప్రీమియర్ ఎనర్జీస్’ మెగా ప్లాంట్‌ను ప్రారంభించిన సీఎం!

Sitarampur: తెలంగాణను గ్రీన్ ఎనర్జీ (హరిత ఇంధన) హబ్‌గా మార్చే దిశగా రాష్ట్ర ప్రభుత్వం మరో కీలక అడుగు వేసింది.

రంగారెడ్డి జిల్లా, షాబాద్ మండలం, సీతారాంపూర్ పారిశ్రామిక ప్రాంతంలో ఏర్పాటు చేసిన ప్రముఖ పునరుత్పాదక ఇంధన సంస్థ "ప్రీమియర్ ఎనర్జీస్" (Premier Energies) నూతన అత్యాధునిక సోలార్ మాడ్యూల్ తయారీ ప్లాంట్‌ను తెలంగాణ ముఖ్యమంత్రి ఎనుముల రేవంత్ రెడ్డి అధికారికంగా ప్రారంభించారు.

దాదాపు 75 ఎకరాల విస్తీర్ణంలో, ₹3,342 కోట్ల భారీ పెట్టుబడితో నిర్మించిన ఈ ప్లాంట్ దేశంలోనే అతిపెద్ద సోలార్ తయారీ కేంద్రాలలో ఒకటిగా నిలవనుంది.

ఈ కార్యక్రమంలో ఐటీ మరియు పరిశ్రమల శాఖ మంత్రి దుద్దిళ్ల శ్రీధర్ బాబు, ప్రీమియర్ ఎనర్జీస్ మేనేజింగ్ డైరెక్టర్ చిరంజీవ్ సాలూజా, ఇతర ఉన్నతాధికారులు మరియు ప్రజాప్రతినిధులు పాల్గొన్నారు.

ముఖ్యమంత్రి ఎనుముల రేవంత్ రెడ్డి ప్రసంగం

ఈరోజు రంగారెడ్డి జిల్లా, షాబాద్ మండలం, సీతారాంపూర్ వేదికగా తెలంగాణ పారిశ్రామిక ప్రగతిలో ఒక నూతన అధ్యాయం లిఖించబడింది. భారతదేశంలోనే అత్యంత ప్రతిష్టాత్మకమైన 'ప్రీమియర్ ఎనర్జీస్' మెగా సోలార్ ప్లాంట్‌ను ప్రారంభించడం నాకు ఎంతో సంతోషాన్ని ఇస్తోంది.

మా ప్రభుత్వం కేవలం మాటల ప్రభుత్వం కాదు, చేతల ప్రభుత్వం. తెలంగాణకు పెట్టుబడులను ఆకర్షించడమే కాకుండా, స్థానిక యువతకు ఉపాధి కల్పించడమే మా ప్రథమ ప్రాధాన్యత. సీతారాంపూర్‌లో ఏర్పాటైన ఈ గ్రీన్ ప్రాజెక్ట్ ద్వారా దాదాపు 2,500 మంది యువతకు ప్రత్యక్షంగా మరియు పరోక్షంగా ఉద్యోగ అవకాశాలు లభించబోతున్నాయి. రంగారెడ్డి జిల్లా రైతాంగం భూములను ఇవ్వడం వలన హైదరాబాద్ అభివృద్ధి చెందుతుంది

ముఖ్యంగా మన స్థానిక ప్రాంతాల యువతకు ఇందులో ప్రాధాన్యత దక్కడం అభినందనీయం.

భవిష్యత్తు అంతా గ్రీన్ ఎనర్జీదే (పునరుత్పాదక ఇంధనానిదే). పర్యావరణాన్ని కాపాడుకుంటూనే, పరిశ్రమలను ప్రోత్సహించాలనేది మా పాలసీ. ప్రీమియర్ ఎనర్జీస్ సంస్థ ఇక్కడ ప్రతి 16 సెకన్లకు 4 హై-ఎఫిషియెన్సీ సోలార్ మాడ్యూళ్లను తయారు చేసే సరికొత్త ఏఐ (AI) సాంకేతికతను తీసుకురావడం చూస్తే ముచ్చటేస్తోంది. తెలంగాణ గడ్డపై తయారైన సోలార్ ప్యానెళ్లు రేపు ప్రపంచవ్యాప్తంగా అమెరికా, యూరప్ దేశాలకు ఎగుమతి కాబోతున్నాయి. ఇది ప్రతి తెలంగాణ బిడ్డ గర్వించదగ్గ విషయం. పరిశ్రమల స్థాపనకు తెలంగాణ ఎల్లప్పుడూ స్వర్గధామం. పెట్టుబడులు పెట్టేందుకు వచ్చే పారిశ్రామికవేత్తలకు మా ప్రభుత్వం తరఫున 'సింగిల్ విండో' పద్ధతిలో అన్ని అనుమతులు, మౌలిక సదుపాయాలు వేగంగా కల్పిస్తాం. ప్రీమియర్ ఎనర్జీస్ యాజమాన్యానికి నా అభినందనలు. భవిష్యత్తులో ఇక్కడ ఇంగాట్స్, వేఫర్స్ తయారీని కూడా విస్తరించాలని, అందుకు మా ప్రభుత్వం నుంచి పూర్తి సహకారం ఉంటుందని ఈ వేదికగా హామీ ఇస్తున్నాను.

ఈ సీతారాంపూర్ ప్లాంట్ ద్వారా ప్రీమియర్ ఎనర్జీస్ అదనంగా 5.6 గిగావాట్ (GW) సామర్థ్యంతో సోలార్ మాడ్యూళ్లను ఉత్పత్తి చేయనుంది. దీనితో కంపెనీ మొత్తం ఉత్పత్తి సామర్థ్యం 11.1 గిగావాట్లకు చేరి, దేశంలోనే అగ్రస్థానంలో నిలిచింది.

* ఆధునిక సాంకేతికత (TOPCon): ఇక్కడ అత్యంత సమర్థవంతమైన "G12R TOPCon" సోలార్ మాడ్యూళ్లను జీరో బస్‌బార్ (0BB) టెక్నాలజీతో తయారు చేస్తున్నారు. ఇవి తక్కువ ఎండ ఉన్నా కూడా ఎక్కువ విద్యుత్‌ను ఉత్పత్తి చేయగలవు.

* ఆర్టిఫిషియల్ ఇంటెలిజెన్స్ (AI) వాడకం: తయారీ ప్రక్రియలో ఎలాంటి లోపాలు లేకుండా చూసేందుకు పూర్తిగా రోబోటిక్ మరియు AI ఆధారిత 'ఫాల్ట్ డిటెక్షన్' సిస్టమ్‌ను ప్లాంట్‌లో అమర్చారు.

* భారీ వేర్‌హౌస్: ఈ ప్లాంట్ ప్రాంగణంలోనే భీమా ఇన్‌ఫ్రా (Bheemaa Infra) సౌజన్యంతో 5,10,400 చదరపు అడుగుల భారీ మరియు అత్యాధునిక నిల్వ సామర్థ్యం (Warehouse) గల కేంద్రాన్ని ఏర్పాటు చేశారు.

హైదరాబాద్ ఔటర్ రింగ్ రోడ్డు అంతర్భాగం మొత్తంగా కాలుష్య రహిత ప్రాంతంగా తీర్చిదిద్దడానికి ప్రభుత్వం లక్ష్యాలను నిర్దేశించుకుని పనిచేస్తోందని ముఖ్యమంత్రి శ్రీ ఎ. రేవంత్ రెడ్డి గారు చెప్పారు. 2,100 చ.కి.మీ మేరకు విస్తరించి ఉన్న ఓఆర్ఆర్ లోపల కోర్ అర్బన్ ఏరియాలో 1 కోటి 35 లక్షల జనాభా అవసరాలకు అనుగుణంగా నగరాన్ని అభివృద్ధి చేస్తామన్నారు.

✅ సోలార్ మాడ్యూల్స్ తయారీ రంగంలో ప్రసిద్ధ ప్రిమియర్ ఎనర్జీస్ సంస్థ రంగారెడ్డి జిల్లా సీతారాంపూర్‌లో నెలకొల్పిన 5.6 గిగావాట్ల సామర్థ్యం కలిసిన సోలార్ మాడ్యూల్ తయారీ యూనిట్‌ను మంత్రి దుద్దిళ్ల శ్రీధర్ బాబు గారితో కలిసి ముఖ్యమంత్రి గారు ప్రారంభించారు.

✅ ప్రిమియర్ ఎనర్జీ రూపొందించిన మొట్టమొదటి సోలార్ ఆక్సీ ట్రీ – సోలార్ పవర్డ్ స్ట్రీట్ లైట్, ఎయిర్ క్లీనింగ్ సిస్టమ్ 'ఆక్సీట్రీ'ని, యూనిట్‌లో సోలార్ మాడ్యూల్స్‌కు సంబంధించి వివిధ ఉత్పత్తులను ముఖ్యమంత్రి గారు పరిశీలించారు.

✅ ఈ యూనిట్ ప్రారంభం సందర్భంగా ఏర్పాటు చేసిన సభలో ముఖ్యమంత్రి గారు మాట్లాడుతూ, దేశంలోని ఢిల్లీ, ముంబై, బెంగళూరు చెన్నై లాంటి మెట్రోపాలిటన్ నగరాలు ఎదుర్కొంటున్న సమస్యలను వివరించారు. సరైన సమయంలో సరైన నిర్ణయాలు తీసుకోని కారణంగానే చాలా కష్టమైన పరిస్థితులను ఎదుర్కొంటున్నాయని చెప్పారు.

✅ “ఆ నగరాల అనుభవాల నుంచి మనం పాఠాలు నేర్చుకోవాలి. హైదరాబాద్ కోర్ అర్బన్ ఏరియాలోని జీడిమెట్ల, బాలానగర్ లాంటి ఇండస్ట్రియల్ పార్కులున్న ప్రాంతాల్లో పరిశ్రమల నుంచి వెలువడుతున్న కాలుష్యం, దానికితోడు మూసీ నది కాలుష్యంతో నగర ప్రజలు తీవ్ర ఇబ్బందులు ఎదుర్కొంటున్నారు.

✅ అందుకే 2,100 చ.కి.మీ మేరకు విస్తరించి ఉన్న ఈ కోర్ అర్బన్ రీజియన్ లో పూర్తిగా కాలుష్యరహిత ప్రాంతంగా మార్చాలని సంకల్పించాం. పరిశ్రమలను ఓఆర్ఆర్ బయటకు తరలించడానికి చట్టం చేశాం. ఓఆర్ఆర్ బయట పెరి అర్బన్ రీజియన్ ఎకానమీ ప్రాంతంలో మాన్యుఫాక్చరింగ్ జోన్ గా గుర్తించాం. ఇక్కడి నుంచి తరలించిన పరిశ్రమలకు అవసరమైన స్థలాలను మాన్యుఫాక్చరింగ్ జోన్ లో కేటాయిస్తాం..” అని ముఖ్యమంత్రి గారు వివరించారు.

✅ “మాన్యూఫాక్చరింగ్ జోన్‌లో మొట్టమొదటగా ప్రారంభమైన సంస్థ ప్రీమియర్ ఎనర్జీ కావడం ప్రశంసనీయం. కేవలం 12 నెలల కాలంలో యూనిట్‌ను నెలకొల్పింది” అని ముఖ్యమంత్రి సంస్థ యాజమాన్యాన్ని అభినందించారు.

✅ “తెలంగాణ రైజింగ్ 2047 విజన్‌తో రాష్ట్రాన్ని క్యూర్, ప్యూర్, రేర్ అనే మూడు ప్రాంతీయ మండళ్లుగా విభజించి సమగ్రమైన ప్రణాళికలతో ముందుకు వెళుతున్నాం. 2034 నాటికి 1 ట్రిలియన్ ఆర్థిక వ్యవస్థగా తీర్చిదిద్ది, తెలంగాణను దేశంలో అగ్రస్థానంలో నిలబెట్టాలన్నది మా సంకల్పం.

✅ వైట్ కాలర్ ఉద్యోగాలు కష్టమైన పరిస్థితులను అర్థం చేసుకుని యువత బ్లూకాలర్ జాబ్స్ అందిపుచ్చుకునే దిశగా నైపుణ్యతను పెంచడానికి ఎక్కువ దృష్టి సారించాం. ఏటీసీలు, పాలిటెక్నక్ కాలేజీలు, స్కిల్స్ యూనివర్సిటీ ఏర్పాటు వంటి మొత్తంగా వ్యవస్థలను ఆ దిశగా సిద్ధం చేస్తున్నాం” అని చెప్పారు.

✅ “హైదరాబాద్ ప్రపంచంతో పోటీ పడాలంటే ఇప్పుడున్న పెట్టుబడులు, పరిశ్రమలు సరిపోవు. మరిన్ని పెట్టుబడులు, పరిశ్రమలు రావాలి. 2047 నాటికి వంద సంవత్సరాల స్వాతంత్య్ర ఉత్సవాలను జరుపుకోబోతున్న తరుణంలో వెనక్కి తిరిగి చూస్తే ఎక్కడ మొదలయ్యాం. ఎక్కడికి చేరుకోవాలనుకున్నామో ప్రణాళికా బద్ధంగా ముందుకు వెళ్లాలి.

✅ పెరిగిన కాలుష్యాన్ని నియంత్రించడానికి సోలార్ ఎనర్జీతో ఆక్సిజన్ పంపింగ్ చేసే యంత్రాలను ప్రీమియర్ ఎనర్జీ రూపొందించడం అభినందనీయం. అలాంటి పరిస్థితులు తలెత్తడంపై అందరూ ఆలోచన చేయాలి. ప్రకృతిని విధ్వంసం చేయడం వల్ల ఇలాంటి తీవ్రమైన పరిణామాలకు దారితీస్తోంది. నియంత్రించాల్సిన బాధ్యత ప్రభుత్వాలపై ఉంది. అంతకన్నా ఎక్కువ ప్రజల నుంచి సంపూర్ణ సహకారం ఉండాలి” అని ముఖ్యమంత్రి గారు కోరారు.

✅ ఈ కార్యక్రమంలో శాసన మండలి చీఫ్ విప్ పట్నం మహేందర్ రెడ్డి గారు, కాలే యాదయ్య గారు, ప్రీమియర్ ఎనర్జీ చైర్మన్ సురేందర్ పాల్ సింగ్ సలూజా గారు, మేనేజింగ్ డైరెక్టర్ చిరంజీవ్ సింగ్ సలూజా గారు, డైరెక్టర్ సుధీర్ మూల గారు, ఎగ్జిక్యూటివ్ డైరెక్టర్ రేవతి రోహిణి గారు, ప్రభుత్వ అధికారులు, సంస్థ ఇతర ప్రతినిధులు పాల్గొన్నారు.