El Nino Effect: తెలంగాణలో ఎల్‌నీనో అలర్ట్... కొత్త బోర్లకు బ్రేక్ వేసిన ప్రభుత్వం

El Nino Effect: ప్రస్తుత కాలంలో ఎల్‌నీనో ప్రభావం కారణంగా రాష్ట్రంలో తలెత్తబోయే పరిస్థితులను ఎదుర్కొనేందుకు తెలంగాణ ప్రభుత్వం ముందస్తు చర్యలు చేపట్టింది. ఇందులో భాగంగా రాష్ట్ర ప్రభుత్వ ప్రధాన కార్యదర్శి సంజయ్ జాజు ఉమ్మడి జిల్లాల ఉన్నతాధికారులతో ఒక అత్యవసర సమావేశాన్ని నిర్వహించారు. తాగునీరు అలాగే విద్యుత్ సరఫరాలో ఎలాంటి అంతరాయం కలగకుండా మండల స్థాయి వరకు పకడ్బందీ ప్రణాళికలు రూపొందించాలని అధికారులను ఆదేశించారు. ప్రభుత్వ కార్యాలయాల్లో విద్యుత్ పొదుపు చర్యలు పాటించాలని సూచించినప్పటికీ, పరిశ్రమలకు మాత్రం ఎలాంటి పవర్ కట్స్ లేకుండా నిరంతరం విద్యుత్ సరఫరా కొనసాగుతుందని స్పష్టం చేశారు.

హైదరాబాద్‌లో కొత్త బోర్లకు నిషేధం

రాజధాని హైదరాబాద్ నగరంలో భూగర్భ జలాలు అడుగంటకుండా ఉండేందుకు ప్రభుత్వం కఠిన నిర్ణయం తీసుకుంది. నగరంలో కొత్త నిర్మాణాల నిమిత్తం బోర్లు వేసేందుకు ఎవరికీ ఎలాంటి అనుమతులు ఇవ్వకూడదని అధికారులకు సీఎస్ స్పష్టమైన ఆదేశాలు జారీ చేశారు. అంతేకాకుండా నగరంలో నీరు వృథా కాకుండా తగిన చర్యలు తీసుకోవాలని సూచించారు. నవంబర్ 1వ తేదీ నుంచి నిర్మాణ పనులకు తాగునీటిని వాడకుండా కేవలం గ్రీన్ ట్యాంకర్ల ద్వారా మాత్రమే నీటిని సరఫరా చేయాలని అధికారులు నిర్ణయించారు.

కరువు నివారణకు ప్రత్యేక కేబినెట్ సబ్ కమిటీ

రాష్ట్రంలో తలెత్తే కరువు అలాగే ఎల్‌నీనో పరిస్థితులను సమర్థవంతంగా ఎదుర్కొనేందుకు ప్రభుత్వం ఒక ప్రత్యేక కేబినెట్ సబ్ కమిటీని ఏర్పాటు చేసింది. ఈ కమిటీకి డిప్యూటీ సీఎం భట్టి విక్రమార్క చైర్మన్‌గా వ్యవహరించనుండగా, పంచాయతీరాజ్ అలాగే గ్రామీణాభివృద్ధి శాఖ మంత్రి సీతక్క సభ్యురాలిగా బాధ్యతలు నిర్వర్తించనున్నారు. వర్షపాతం తగ్గే అవకాశం ఉన్నందున కమిటీ ప్రధానంగా గ్రామీణ ప్రాంతాలపై ప్రత్యేక దృష్టి సారించనుంది. గ్రామాల్లో తాగునీటి ఎద్దడి తలెత్తకుండా ముందస్తుగా తగిన ఏర్పాట్లు చేయాలని నిర్ణయించారు.

క్షేత్రస్థాయి పర్యవేక్షణ

గ్రామీణ ప్రాంతాల్లో తాగునీటి సరఫరా తీరును నిరంతరం పర్యవేక్షించనున్నట్లు మంత్రి సీతక్క తెలిపారు. కరువు పరిస్థితులను ఎదుర్కొనేందుకు పంచాయతీరాజ్ శాఖ జల సంరక్షణ పనులకు అత్యధిక ప్రాధాన్యత ఇవ్వనుంది. అధికారులందరూ సమన్వయంతో పనిచేసి ప్రజలకు ఎక్కడా నీటి సమస్య రాకుండా చూడాలని ప్రభుత్వం ఆదేశించింది. ప్రజలు కూడా నీటిని పొదుపుగా వాడి ప్రభుత్వానికి సహకరించాలని కోరారు.