Hyderabad: గచ్చిబౌలి అపార్ట్‌మెంట్‌లో భారీ అగ్నిప్రమాదం..!

Hyderabad: హైదరాబాద్ నగరంలోని గచ్చిబౌలి పోలీస్ స్టేషన్ పరిధిలో గల టీఎన్జీవో కాలనీలో సోమవారం తెల్లవారుజామున భారీ అగ్నిప్రమాదం సంభవించింది. ఒక అపార్ట్‌మెంట్‌లోని సెల్లార్‌లో అకస్మాత్తుగా మంటలు చెలరేగడంతో నివాసితులు తీవ్ర భయాందోళనకు గురయ్యారు.

బిల్డింగ్ సెల్లార్‌లోని ఎలక్ట్రికల్ ప్యానెల్‌లో షార్ట్ సర్క్యూట్ సంభవించడంతో మంటలు మొదలైనట్లు అధికారులు ప్రాథమికంగా నిర్ధారించారు. మంటలు వేగంగా వ్యాపించడంతో సెల్లార్‌లో పార్క్ చేసి ఉన్న 15 ద్విచక్ర వాహనాలు పూర్తిగా అగ్నికి ఆహుతయ్యాయి.

ప్రమాదం కారణంగా అపార్ట్‌మెంట్ మొత్తం దట్టమైన పొగ కమ్మేసింది. దీంతో పై అంతస్తుల్లో ఉన్న వాసులకు ఊపిరాడక తీవ్ర ఇబ్బందులు పడ్డారు. సమాచారం అందుకున్న అగ్నిమాపక సిబ్బంది తక్షణమే అక్కడికి చేరుకుని, నిచ్చెనల సహాయంతో చిక్కుకున్న వారిని సురక్షితంగా కిందకు దించారు. పొగ పీల్చడం వల్ల తీవ్ర అస్వస్థతకు గురైన ఇద్దరిని చికిత్స నిమిత్తం సమీపంలోని ఆసుపత్రికి తరలించారు. ప్రస్తుతం మంటలు అదుపులోకి వచ్చాయి.