Fire Accident: హైదరాబాద్ న‌డిబొడ్డున‌ భారీ అగ్ని ప్ర‌మాదం.. రోడ్డంతా ద‌ట్ట‌మైన పొగ‌

Fire Accident: హైదరాబాద్‌లోని రద్దీ ప్రాంతమైన అమీర్‌పేటలో గురువారం భారీ అగ్నిప్రమాదం జ‌రిగింది. మైత్రీవనం సమీపంలో ఉన్న వాణిజ్య భవనంలో ఒక్కసారిగా మంటలు చెలరేగడంతో స్థానికంగా కలకలం రేగింది. భవనం పై అంతస్తుల నుంచి ఎగసిపడుతున్న మంటలు, దట్టమైన పొగ దూరం నుంచే కనిపించడంతో ప్రజలు భయాందోళనకు గురయ్యారు.

క్షణాల్లో భవనం అంతటా వ్యాపించిన మంటలు

ప్రధాన రహదారిపై ఉన్న KSR ఫ్యాషన్స్‌కు చెందిన మూడు అంతస్తుల భవనంలో ఈ ప్రమాదం చోటుచేసుకుంది. మొదట ఒక అంతస్తులో ప్రారంభమైన మంటలు కొద్ది సేపట్లోనే మొత్తం భవనాన్ని ఆవరించాయి. భవనంలో పెద్ద మొత్తంలో దుస్తుల నిల్వలు ఉండటంతో మంటలు వేగంగా వ్యాపించినట్లు అధికారులు భావిస్తున్నారు. మంటల తీవ్రత కారణంగా భవనం సమీపానికి వెళ్లడం కూడా కష్టంగా మారింది. మంటలు ఎగసిపడుతున్న దృశ్యాలు ప్ర‌స్తుతం సోష‌ల్ మీడియాలో వైర‌ల్ అవుతున్నాయి.

వ్యాపారుల్లో ఆందోళన..

అగ్నిప్రమాదం జరిగిన భవనం చుట్టూ అనేక వ్యాపార సంస్థలు ఉన్నాయి. హోటళ్లు, రెస్టారెంట్లు, మొబైల్ ఫోన్ షాపులు, కంప్యూటర్ స్టోర్లు తదితర వ్యాపార కేంద్రాలు సమీపంలో ఉండటంతో మంటలు వాటికి వ్యాపించే ప్రమాదం నెలకొంది. దీంతో సమీప దుకాణాల యజమానులు తమ షాపుల్లోని విలువైన వస్తువులను బయటకు తరలించే పనిలో నిమగ్నమయ్యారు. భద్రతా కారణాల దృష్ట్యా కొన్ని దుకాణాలను తాత్కాలికంగా మూసివేసినట్లు సమాచారం.

రంగంలోకి దిగిన అగ్నిమాపక, పోలీసు సిబ్బంది

సమాచారం అందుకున్న వెంటనే అగ్నిమాపక శాఖ సిబ్బంది ఫైర్ ఇంజిన్లతో సంఘటనా స్థలానికి చేరుకుని సహాయక చర్యలు చేపట్టారు. మంటలను అదుపులోకి తీసుకురావడంతో పాటు అవి సమీప భవనాలకు వ్యాపించకుండా చర్యలు తీసుకుంటున్నారు. పోలీసులు కూడా ఘటనాస్థలంలో భద్రతా ఏర్పాట్లు చేసి ప్రజలను దూరంగా ఉంచుతున్నారు. ప్రమాదానికి గల కారణాలు ఇంకా తెలియాల్సి ఉంది. మంటలు పూర్తిగా అదుపులోకి వచ్చిన తర్వాత నష్టంపై స్పష్టత వచ్చే అవకాశం ఉందని అధికారులు తెలిపారు.