Hayathnagar: హయత్‌నగర్ ప్రభుత్వ డిగ్రీ కళాశాలలో బతుకమ్మ సంబురాలు!
Hayathnagar: హయత్‌నగర్ ప్రభుత్వ డిగ్రీ కళాశాలలో అంగరంగ వైభవంగా బతుకమ్మ సంబురాలు. రంగురంగుల పూల సోయగాలు, విద్యార్థినుల ఆటపాటలు, విజేతలకు బహుమతుల పంపిణీ.
Hayathnagar: హయత్‌నగర్ ప్రభుత్వ డిగ్రీ కళాశాలలో బతుకమ్మ సంబురాలు!
Hayathnagar: హయత్‌నగర్ ప్రభుత్వ డిగ్రీ కళాశాలలో తెలంగాణ సంస్కృతి, సంప్రదాయాలకు ప్రతీకగా నిలిచే బతుకమ్మ సంబురాలను ఘనంగా నిర్వహించారు. కళాశాల ప్రాంగణం పూల సోయగాలు, బతుకమ్మ పాటలు, విద్యార్థినుల ఆటపాటలతో పండుగ వాతావరణాన్ని సంతరించుకుంది.
ఈ సందర్భంగా విద్యార్థినులు రంగురంగుల వివిధ రకాల పూలతో అందంగా బతుకమ్మలను పేర్చారు. కళాశాల ప్రిన్సిపాల్ డా. పి. సురేష్ బాబు కొబ్బరికాయ కొట్టి ఉత్సవాలను ప్రారంభించారు. అనంతరం విద్యార్థినులు భక్తిశ్రద్ధలతో గౌరీ పూజ నిర్వహించి, బతుకమ్మ పాటలు పాడుతూ సంప్రదాయబద్ధంగా సంబురాల్లో పాల్గొన్నారు.
ఈ వేడుకల్లో కళాశాల మహిళా అధ్యాపకులు ఆకుపచ్చని వస్త్రధారణతో ప్రత్యేక ఆకర్షణగా నిలిచారు. విద్యార్థినులతో కలిసి బతుకమ్మ ఆడుతూ, పాడుతూ ఉత్సాహాన్ని నింపారు. తెలంగాణ ఆత్మగౌరవానికి ప్రతీక అయిన బతుకమ్మ పండుగను కళాశాలలో ఘనంగా నిర్వహించడం ఆనందంగా ఉందని అధ్యాపకులు, విద్యార్థులు తెలిపారు.
బతుకమ్మల పోటీల్లో విజేతలకు బహుమతులు. విద్యార్థినులు నైపుణ్యంతో రూపొందించిన బతుకమ్మలలో న్యాయనిర్ణేతలు ఉత్తమమైన వాటిని ఎంపిక చేశారు. ఈ పోటీల్లో ఎన్‌సీసీ బతుకమ్మ మొదటి బహుమతి సాధించగా, బీఏ తృతీయ సంవత్సరం విద్యార్థినుల బతుకమ్మ రెండో బహుమతి, బీకాం తృతీయ సంవత్సరం విద్యార్థినుల బతుకమ్మ మూడో బహుమతి పొందాయి. బీఏ మొదటి సంవత్సరం విద్యార్థినుల బతుకమ్మ కన్సోలేషన్ బహుమతిని గెలుచుకుంది. విజేతలకు ప్రిన్సిపాల్ డా. పి. సురేష్ బాబు బహుమతులు అందజేసి అభినందించారు.
ఈ కార్యక్రమంలో కళాశాల వైస్ ప్రిన్సిపాళ్లు శ్రీనివాస్ రెడ్డి, ఇందిర, బతుకమ్మ వేడుకల కోఆర్డినేటర్ అనిత, అపర్ణ చతుర్వేది, నాగేంద్ర, వెంకటలక్ష్మి, విజయలక్ష్మి, గీతా నాయక్, పి. రమాదేవి, శారదాదేవి, డి. రమాదేవి, జయలక్ష్మి తదితర అధ్యాపకులు, బోధనేతర సిబ్బంది, విద్యార్థినీ విద్యార్థులు పెద్ద సంఖ్యలో పాల్గొన్నారు. అందరి భాగస్వామ్యంతో బతుకమ్మ సంబురాలు విజయవంతంగా ముగిశాయి.
