Hyderabad: 4 ఏళ్లుగా పరారీలో ఉన్న నకిలీ డీఎస్పీ కేవీపీ రాజు అరెస్ట్

హైదరాబాద్: తిరుపతి జిల్లా డిఎస్పీ (Dy. S.P.)నంటూ నకిలీ అవతారమెత్తి, బోగస్ కంపెనీల్లో పెట్టుబడుల పేరిట అధిక లాభాలు ఇప్పిస్తామని నమ్మించి అమాయకులను నిలువునా ముంచిన ఓ ముఠా సభ్యుడిని హైదరాబాద్ సీసీఎస్ (డిటెక్టివ్ డిపార్ట్‌మెంట్) ఈఓడబ్ల్యూ (EOW) బృందం అరెస్టు చేసింది.

అరెస్టయిన నిందితుడిని ఆంధ్రప్రదేశ్ రాష్ట్రం, అన్నమయ్య జిల్లా, రాయచోటికి చెందిన కొండూరు రెడ్డి వెంకట్ రాజు అలియాస్ కేవీపీ రాజు అలియాస్ డిఎస్పీ రాజు (40)గా పోలీసులు గుర్తించారు. నిందితుడు 2021 నుంచి పరారీలో ఉన్నాడని తెలిపారు.

కేసు వివరాలు: పోలీసుల కథనం ప్రకారం... నిందితుడు కేవీపీ రాజు, అతని ముఠా సభ్యులు తాము సీనియర్ పోలీస్ అధికారులమని ప్రచారం చేసుకుంటూ తెలంగాణ, ఆంధ్రప్రదేశ్ రాష్ట్రాల్లోని అనేక మంది అమాయకులను లక్ష్యంగా చేసుకున్నారు. ఉనికిలో లేని నకిలీ కంపెనీల్లో పెట్టుబడులు పెడితే స్వల్పకాలంలోనే అధిక లాభాలు వస్తాయని నమ్మించారు. బాధితులకు నమ్మకం కలిగించేందుకు సెక్యూరిటీ పేరిట నకిలీ ఆస్తి పత్రాలు, పోస్ట్ డేటెడ్ చెక్కులను ఇచ్చేవారు.

సమయానికి డబ్బులు తిరిగి ఇవ్వకపోగా, బాధితులు నిలదీస్తే తాము ‘ఎన్‌కౌంటర్ స్పెషలిస్టులమంటూ’ బెదిరింపులకు దిగేవారు. ఈ క్రమంలోనే ఒక ఫిర్యాదుదారుడి నుంచి రూ.1.20 కోట్లు వసూలు చేసి మోసం చేయడంతో, బాధితుడి ఫిర్యాదు మేరకు సీసీఎస్ పోలీస్ స్టేషన్‌లో క్రైమ్ నంబర్: 192/2021 (U/Sec 406, 420, 170 r/w 34 IPC) నమోదు చేశారు.

ఇతర నేరాలు: నిందితుడు కేవీపీ రాజుపై ఇదివరకు 3 క్రిమినల్ కేసులు నమోదై ఉన్నాయని పోలీసులు వెల్లడించారు:

• తిరుపతి సీసీఎస్ PS: Cr. No: 09/2021 (U/s 419, 420 R/w 34 IPC)

• తుకారాంగేట్ PS (హైదరాబాద్): Cr. No: 46/2022 (U/s 420, 468, 471 R/w 120(B) IPC)

• వేదాయపాళెం PS (నెల్లూరు జిల్లా): Cr. No: 325/2022 (U/s 420, 406, 468, 170 R/w 120(B) IPC)

హైదరాబాద్ సీసీఎస్ డిప్యూటీ కమిషనర్ ఆఫ్ పోలీస్ (DCP) నేతృత్వంలో, EOW టీమ్-V ఏసీపీ శ్రీ కె. కిరణ్ పర్యవేక్షణలో ఎస్ఐ శ్రీ జి. అనిల్ కుమార్ మరియు సిబ్బంది నిందితుడిని చాకచక్యంగా పట్టుకున్నారు. నిందితుడిని న్యాయస్థానంలో హాజరుపరచి రిమాండ్‌కు తరలించారు.

ప్రజా హెచ్చరిక: అధిక లాభాలు ఇప్పిస్తామంటూ చేసే నకిలీ వాగ్దానాలను, ప్రచారాలను నమ్మి అమాయక ప్రజలు ఎవరూ తమ కష్టార్జితాన్ని పెట్టుబడిగా పెట్టి మోసపోవద్దని హైదరాబాద్ సీసీఎస్ డిప్యూటీ కమిషనర్ ఆఫ్ పోలీస్ (DCP) ఈ సందర్భంగా విజ్ఞప్తి చేశారు.

జారీ చేసిన వారు: డిప్యూటీ కమిషనర్ ఆఫ్ పోలీస్,సీసీఎస్, డిడి, హైదరాబాద్ సిటీ.