Madhapur: సున్నం చెరువు వద్ద నీటి మాఫియాపై హైడ్రా ఉక్కుపాదం!

Madhapur: మాదాపూర్‌లోని సున్నం చెరువు పరివాహక ప్రాంతంలో గత కొన్నేళ్లుగా సాగుతున్న అక్రమ నీటి దందాపై హైడ్రా అధికారులు ఉక్కుపాదం మోపారు. ఎలాంటి ప్రభుత్వ అనుమతులు లేకుండా చెరువు భూముల్లో ఏర్పాటు చేసిన 100కి పైగా అక్రమ బోరు బావులను అధికారులు శనివారం ప్రత్యేక దాడులు నిర్వహించి పూర్తిగా తొలగించారు.

సున్నం చెరువు పరిసరాల్లో తవ్విన ఈ అక్రమ బోర్ల ద్వారా నిత్యం లక్షల లీటర్ల నీటిని తోడేస్తూ వాణిజ్య అవసరాలకు విక్రయిస్తున్నట్లు వెల్లడైంది. సమీపంలోని ఐటీ కంపెనీలు, ప్రముఖ హోటళ్లు, మరియు ప్రైవేట్ హాస్టళ్లకు భారీ వాటర్ ట్యాంకర్ల ద్వారా ఈ నీటిని అక్రమంగా సరఫరా చేస్తూ కొందరు వ్యాపారులు కోట్ల రూపాయలు ఆర్జిస్తున్నారు.

ఇటీవలే సున్నం చెరువును పునరుద్ధరించి, పర్యావరణపరంగా అభివృద్ధి చేసే కార్యక్రమాన్ని హైడ్రా అధికారులు చేపట్టారు. అయితే, చెరువు నీటి మట్టం క్షీణించడానికి ఈ అక్రమ బోర్లే కారణమని గుర్తించిన స్థానికులు, నీటి మాఫియా అక్రమాలపై ఆధారాలతో సహా హైడ్రాకు ఫిర్యాదు చేశారు.

స్థానికుల ఫిర్యాదుపై స్పందించిన హైడ్రా బృందాలు, పోలీసుల భద్రత నడుమ రంగంలోకి దిగి బోరు బావుల కనెక్షన్లను, మోటార్లను, విద్యుత్ మార్గాలను తొలగించారు.