Mansoorabad: మాన్సూరాబాద్‌లో పేకాట స్థావరంపై ఎస్‌వోటీ మెరుపుదాడి!

మాన్సూరాబాద్‌: పక్కా సమాచారంతో ఎల్‌బీనగర్‌ ఎస్‌ఓటీ పోలీసులు పేకాట స్థావరంపై మెరుపుదాడి చేశారు. ఎల్‌బీనగర్‌ పోలీస్‌ స్టేషన్‌ పరిధిలోని సాయినగర్‌ కాలనీలోని ప్లాట్‌ నంబర్‌ 26లో నిర్వహిస్తున్న గేమింగ్‌ హౌస్‌పై SOT LB Nagar Zone బృందం దాడి చేసింది.

దాడిలో పేకాట ఆడుతున్న 11 మందిని పోలీసులు అదుపులోకి తీసుకున్నారు. వారి నుంచి రూ.40,740 నగదు, రెండు సెట్ల పేకాట కార్డులు, 11 స్మార్ట్‌ మొబైల్‌ ఫోన్లను స్వాధీనం చేసుకున్నారు.

అదుపులోకి తీసుకున్న వారిలో మాన్సూరాబాద్‌, ఎల్‌బీనగర్‌, నాగోల్‌, కొత్తపేట, నార్సింగి, ఎర్రగడ్డ, కొంపల్లి తదితర ప్రాంతాలకు చెందిన వారు ఉన్నట్లు పోలీసులు తెలిపారు. వీరిలో వ్యాపారం, రియల్‌ ఎస్టేట్‌, వ్యవసాయ రంగాలకు చెందిన వారు ఉన్నారు.

పేకాట స్థావరంపై దాడి అనంతరం 11 మంది నిందితులను, స్వాధీనం చేసుకున్న నగదు, పేకాట కార్డులు, మొబైల్‌ ఫోన్లను ఎల్‌బీనగర్‌ పోలీస్‌ స్టేషన్‌కు అప్పగించారు. తదుపరి చట్టపరమైన చర్యల కోసం ఎల్‌బీనగర్‌ పోలీసులు కేసు నమోదు చేసి దర్యాప్తు చేపట్టారు.

స్వాధీనం చేసుకున్నవి

నగదు: రూ.40,740, పేకాట కార్డులు 2 సెట్లు, మొబైల్‌ ఫోన్లు 11, అరెస్ట్ 11 మంది.