Serilingampally: శేరిలింగంపల్లిలో 'ఇందిరమ్మ టవర్స్'కు ఘనంగా భూమి పూజ

శేరిలింగంపల్లి: హైదరాబాద్ మహానగరంలో నానాటికీ పెరుగుతున్న భూముల ధరల వేళ, నిరుపేద మరియు మధ్యతరగతి కుటుంబాల సొంతింటి కలను సాకారం చేసేందుకు ప్రజా ప్రభుత్వం చారిత్రాత్మక నిర్ణయం తీసుకుంది. శేరిలింగంపల్లి నియోజకవర్గ పరిధిలోని రాయదుర్గం మల్కం చెరువు వెనుక 2.85 ఎకరాల (11,551 చ.మీ.) విస్తీర్ణంలో రూ. 752 కోట్లకు పైగా విలువైన స్థలంలో నిర్మించతలపెట్టిన *'ఇందిరమ్మ టవర్స్'* ప్రాజెక్టుకు సోమవారం భూమి పూజ ఘనంగా నిర్వహించారు.

రాష్ట్ర హౌసింగ్, రెవెన్యూ శాఖల మంత్రి పొంగులేటి శ్రీనివాస్ రెడ్డి, PAC చైర్మన్ ఆరెకపూడి గాంధీ, ఎమ్మెల్సీ బోగారపు దయానంద్ గుప్తా, యాదవ కో-ఆపరేటివ్ చైర్మన్ రఘునాథ్ యాదవ్, అడిషనల్ కలెక్టర్ కిరణ్మయి, హౌసింగ్ పీడీ నాయక్ తదితర ఉన్నతాధికారులు ఈ శంకుస్థాపన కార్యక్రమంలో పాల్గొన్నారు.

ఏడాదిలో గృహప్రవేశాలు జరిగేలా చర్యలు: మంత్రి పొంగులేటి

ఈ సందర్భంగా మంత్రి పొంగులేటి శ్రీనివాస్ రెడ్డి మాట్లాడుతూ.. "పేదవాడి సొంతింటి కల నెరవేరే సుదినం ఇది. నగర పరిధిలో ఏడాది వ్యవధిలోనే లక్ష ఇళ్ల నిర్మాణాన్ని పూర్తి చేసి అర్హులకు గృహప్రవేశాలు చేయించడమే ప్రభుత్వ ప్రాధాన్యత. ఎటువంటి అవకతవకలకు తావులేకుండా పారదర్శకంగా లక్కీ డిప్ విధానంలో ఇళ్లను కేటాయిస్తున్నాం" అని స్పష్టం చేశారు.

రూ. 50 లక్షల విలువైన ఫ్లాట్ రూ. 6 లక్షలకే: PAC చైర్మన్ గాంధీ

PAC చైర్మన్ ఆరెకపూడి గాంధీ మాట్లాడుతూ, హైదరాబాద్ గృహ నిర్మాణ రంగంలో ఇందిరమ్మ టవర్స్ ఒక సరికొత్త అధ్యాయానికి శ్రీకారం చుడుతుందన్నారు. ముఖ్యమంత్రి రేవంత్ రెడ్డి నేతృత్వంలోని ప్రభుత్వం పేదలకు గౌరవప్రదమైన జీవనాన్ని అందించేందుకు కట్టుబడి ఉందని తెలిపారు.

* *ప్రాజెక్ట్ పరిమాణం:* ఫేజ్-1 లో 480 ఇళ్లు, ఫేజ్-2 లో 680 ఇళ్లు నిర్మించనున్నారు.

* *టవర్ల నిర్మాణం:* మొత్తం 4 టవర్లు రానున్నాయి. ఒక్కో టవర్‌లో 120 ఫ్లాట్లు (ఫ్లోర్‌కు 12 ఫ్లాట్ల చొప్పున) నిర్మిస్తారు.

* *ఇంటి కొలతలు:* 528 చదరపు అడుగుల విస్తీర్ణంలో ఒక బెడ్‌రూమ్, హాల్, కిచెన్ (1BHK) సౌకర్యవంతంగా రూపుదిద్దుకోనున్నాయి.

* *ఆర్థిక భారం:* బహిరంగ మార్కెట్‌లో రూ. 50 లక్షలు పలికే ఈ ఫ్లాట్‌కు ప్రభుత్వం రూ. 5 లక్షల సబ్సిడీని అందించడమే కాకుండా ఉచితంగా భూమిని కేటాయిస్తోంది. లబ్ధిదారుడి వాటా కేవలం *రూ. 6 లక్షలు* మాత్రమే.

* *భూమి హక్కులు:* ప్రతి లబ్ధిదారుడి పేరుపై 20 నుండి 25 గజాల అన్‌డివైడెడ్ షేర్ (UDS) రిజిస్ట్రేషన్ చేయడం జరుగుతుంది.

ఆటో, ట్యాక్సీ డ్రైవర్లకు బిగ్ రిలీఫ్:

నాలుగు చక్రాల వాహనం (ట్యాక్సీ) ఉందనే నిబంధన వల్ల ఇందిరమ్మ ఇళ్లకు దూరమవుతున్న ఆటో, ట్యాక్సీ డ్రైవర్లను దృష్టిలో ఉంచుకుని, వారికి కూడా దరఖాస్తు చేసుకునే అవకాశం కల్పించాలని PAC చైర్మన్ గాంధీ చేసిన విజ్ఞప్తికి మంత్రి పొంగులేటి సానుకూలంగా స్పందించారు. అర్హులైన ట్యాక్సీ డ్రైవర్లకు కూడా ఇందిరమ్మ టవర్స్‌లో ఇళ్లు పొందే వెసులుబాటు కల్పిస్తామని మంత్రి హామీ ఇచ్చారు.

ఈ కార్యక్రమంలో స్థానిక మాజీ కార్పొరేటర్లు, ప్రజాప్రతినిధులు, వివిధ శాఖల అధికారులు మరియు పెద్ద సంఖ్యలో లబ్ధిదారులు పాల్గొన్నారు.