Vikarabad: తాండూరులో ఇందిరమ్మ కాలనీలో భారీ తనిఖీలు.. ఆ డబుల్ మర్డర్ ఎఫెక్ట్!

వికారాబాద్ జిల్లా: తాండూరు పట్టణంలోని ఇందిరమ్మ కాలనీలో పోలీసులు బుధవారం భారీగా కార్డెన్ సెర్చ్ నిర్వహించారు. తాండూరు డి.ఎస్.పి నర్సింగ్ యాదయ్య నేతృత్వంలో ముగ్గురు సిఐలు, 50 మందికి పైగా పోలీసు సిబ్బందితో ఈ తనిఖీలు చేపట్టారు.

తనిఖీల్లో వెల్లడైన వివరాలు:

​వాహనాల స్వాధీనం: సరైన పత్రాలు లేని, కాలం చెల్లిన వాహనాలను పోలీసులు గుర్తించారు. ఇందులో భాగంగా 31 బైకులు, 5 ఆటోలను అధికారులు స్వాధీనం చేసుకున్నారు.

​ప్రజల్లో భరోసా: ఇటీవల మొయినాబాద్ ఫామ్ హౌస్ జంట మహిళల హత్య కేసులో ప్రధాన నిందితురాలు ఇందిరమ్మ కాలనీకి చెందిన వ్యక్తి కావడంతో స్థానికులు భయాందోళనలకు గురవుతున్నారు. ప్రజల్లో ఉన్న భయాన్ని పోగొట్టి, వారికి ధైర్యం కల్పించేందుకే ఈ కార్డెన్ సెర్చ్ చేపట్టినట్లు డి.ఎస్.పి వెల్లడించారు.

​ పోలీసుల సూచనలు:

​ఈ సందర్భంగా ప్రజలకు పోలీసులు పలు కీలక సూచనలు చేశారు:

​ కాలనీలోకి కొత్త వ్యక్తులు ఎవరైనా వస్తే, వెంటనే పోలీసులకు సమాచారం అందించాలని కోరారు.

​ సైబర్ నేరాల పట్ల అప్రమత్తంగా ఉండాలని, అనుమానాస్పద వ్యక్తులు ఎవరైనా కనిపిస్తే వెంటనే స్థానిక పోలీసులకు ఫిర్యాదు చేయాలని సూచించారు.

​ భద్రత: అపరిచిత వ్యక్తుల విషయంలో జాగ్రత్తగా ఉండాలని, కాలనీలో శాంతిభద్రతలను కాపాడేందుకు ప్రజలందరూ సహకరించాలని డి.ఎస్.పి తెలిపారు.