Hyderabad: ప్రపంచంలోనే అతిపెద్ద క్రికెట్ స్టేడియం.. ఫ్యూచర్ సిటీలో భారీ ప్రాజెక్ట్‌కు సన్నాహాలు!

Hyderabad: తెలంగాణ క్రీడా రంగంలో మరో చరిత్రాత్మక అధ్యాయానికి రాష్ట్ర ప్రభుత్వం శ్రీకారం చుట్టింది. ముఖ్యమంత్రి రేవంత్ రెడ్డి ఆలోచనల మేరకు, హైదరాబాద్‌లోని ప్రతిష్టాత్మక 'భారత్ ఫ్యూచర్ సిటీ'లో ప్రపంచంలోనే అతిపెద్ద అంతర్జాతీయ క్రికెట్ స్టేడియాన్ని నిర్మించేందుకు ప్రణాళికలు వేగవంతమయ్యాయి. అహ్మదాబాద్‌లోని 1.32 లక్షల సీటింగ్ సామర్థ్యం గల 'నరేంద్ర మోదీ స్టేడియం' రికార్డును కూడా అధిగమించేలా ఈ భారీ ప్రాజెక్ట్‌ను రూపుదిద్దనున్నారు. "రాష్ట్ర ప్రభుత్వం భూమి కేటాయించనుండగా, బీసీసీఐ (BCCI) ఆధ్వర్యంలో ఈ స్టేడియం నిర్మాణం మరియు నిర్వహణ వ్యయాలు భరించనున్నారు."

ప్రస్తుతం దేశంలోనే అతిపెద్దదైన నరేంద్ర మోదీ స్టేడియం (1.32 లక్షలు) సామర్థ్యాన్ని మించిపోయేలా ఈ స్టేడియం ఉండనుంది. లండన్‌లోని 'లార్డ్స్' మరియు ఆస్ట్రేలియాలోని ప్రముఖ స్టేడియాల తరహాలో అంతర్జాతీయ ప్రమాణాలతో దీన్ని తీర్చిదిద్దనున్నారు.

రంగారెడ్డి జిల్లా ముచ్చెర్ల సమీపంలోని భారత్ ఫ్యూచర్ సిటీ పరిధిలో సుమారు 100 ఎకరాల విశాల స్థలంలో ఈ స్టేడియం ఏర్పాటుకు అధికారులు అన్వేషణ సాగిస్తున్నారు.

ఈ ప్రాజెక్ట్ కోసం రాష్ట్ర ప్రభుత్వం భూమిని కేటాయించనుండగా, భారత క్రికెట్ నియంత్రణ మండలి (BCCI) దీని నిర్మాణ మరియు నిర్వహణ బాధ్యతలను (ఖర్చులను) పూర్తిగా భరించనుంది. అంతా అనుకున్నట్లు జరిగితే ఈ ఏడాది డిసెంబర్ 2026 నాటికి ఈ భారీ ప్రాజెక్ట్‌కు శంకుస్థాపన చేసే అవకాశం ఉంది.

ఔటర్ రింగ్ రోడ్డు (ORR), ప్రతిపాదిత రీజినల్ రింగ్ రోడ్డు (RRR), శంషాబాద్ అంతర్జాతీయ విమానాశ్రయం అలాగే ఫ్యూచర్ సిటీకి ప్రతిపాదిత మెట్రో రైలు మార్గాలకు అతిసమీపంలో ఈ ప్రాజెక్ట్ ఉండనుంది.

కేవలం క్రికెట్ మాత్రమే కాకుండా ఫుట్‌బాల్ మ్యాచ్‌లు, భారీ మ్యూజికల్ కాన్సర్ట్‌లు మరియు అంతర్జాతీయ ఈవెంట్‌లను నిర్వహించేలా ఈ స్టేడియంను మల్టీపర్పస్ క్రీడా ప్రాంగణంగా అభివృద్ధి చేయనున్నారు.

ఫ్యూచర్ సిటీలో రూపుదిద్దుకోనున్న ఈ 'స్పోర్ట్స్ సిటీ' కాన్సెప్ట్ హైదరాబాద్ ఖ్యాతిని ప్రపంచస్థాయికి తీసుకువెళ్లేలా ప్రముఖ ఆకర్షణగా నిలవనుంది.