Strait Of Hormuz: హోర్ముజ్ జలసంధిలో పెరుగుతున్న ఉద్రిక్తత.. ఇప్పటివరకు 7 మంది భారతీయ నావికుల మృతి

అమెరికా–ఇరాన్ మధ్య 2026 ఫిబ్రవరి 28 నుంచి కొనసాగుతున్న ఘర్షణల ప్రభావం హోర్ముజ్ జలసంధిపై తీవ్రంగా పడుతోంది. ప్రపంచంలో అత్యంత కీలకమైన సముద్ర వాణిజ్య మార్గాల్లో ఒకటైన ఈ ప్రాంతంలో వాణిజ్య నౌకలపై వరుస దాడులు జరుగుతుండటంతో భారతీయ నావికులు కూడా ప్రాణాలు కోల్పోతున్నారు.

ప్రజలకు అందుబాటులో ఉన్న నివేదికల ప్రకారం, ఘర్షణ ప్రారంభమైనప్పటి నుంచి ఇప్పటివరకు కనీసం ఏడుగురు భారతీయ నావికులు వివిధ దాడుల్లో మరణించగా, పలువురు గాయపడ్డారు. ప్రపంచ వాణిజ్య నౌకల్లో అత్యధికంగా పనిచేసే దేశాల్లో భారత్ ఒకటి కావడంతో ఈ పరిణామాలు ఆందోళన కలిగిస్తున్నాయి.

ఎప్పుడు ఏం జరిగింది?

మార్చి 1:

మార్షల్ ఐలాండ్స్ జెండాతో ప్రయాణిస్తున్న ఎంకేడీ వ్యోమ్ ఆయిల్ ట్యాంకర్‌పై జరిగిన దాడిలో ఓ భారతీయ నావికుడు మృతి చెందాడు. ఈ దాడికి ఇరాన్ బలగాలే కారణమని అమెరికా ఆరోపించింది.

అదే రోజు ఒమాన్‌లోని ముసందమ్ ద్వీపకల్పం సమీపంలో స్కైలైట్ ట్యాంకర్‌పై జరిగిన దాడిలో మరో ఇద్దరు భారతీయ నావికులు ప్రాణాలు కోల్పోయారు. దీంతో ఘర్షణ ప్రారంభమైన తొలి 48 గంటల్లోనే ముగ్గురు భారతీయులు మరణించారు.

మే 8:

హోర్ముజ్ జలసంధి సమీపంలో భారతీయ సిబ్బందితో ప్రయాణిస్తున్న ఓ చెక్క పడవలో అగ్నిప్రమాదం చోటుచేసుకుంది. ఈ ఘటనలో మరో భారతీయ నావికుడు మరణించాడు.

జూన్ 9:

ఒమాన్ తీరంలో సెట్టెబెల్లో ఆయిల్ ట్యాంకర్‌పై అమెరికా సైన్యం నిర్వహించిన దాడిలో ముగ్గురు భారతీయ సిబ్బంది మరణించారు. ఈ ఘర్షణలో భారతీయుల మరణాలు అత్యధికంగా నమోదైన ఘటనగా ఇది నిలిచింది.

జూలై 13:

హోర్ముజ్ దక్షిణ సముద్ర మార్గంలో ప్రయాణిస్తున్న రెండు యూఏఈ ఆయిల్ ట్యాంకర్లపై ఇరాన్ క్షిపణి దాడి చేసింది. ఈ ఘటనలో ఒక భారతీయ నావికుడు మరణించగా, మరో ఆరుగురు భారతీయులు సహా మొత్తం ఎనిమిది మంది గాయపడ్డారు.

ఆందోళన పెంచుతున్న సముద్ర భద్రత

హోర్ముజ్ జలసంధిలో కొనసాగుతున్న సైనిక ఉద్రిక్తతల కారణంగా వాణిజ్య నౌకల రాకపోకలు ప్రమాదకరంగా మారాయి. సముద్ర మార్గంలో పనిచేస్తున్న భారతీయ నావికుల భద్రతపై ఆందోళనలు వ్యక్తమవుతున్నాయి.