Area 51 Wildfire: మంటల్లో అమెరికా రహస్య స్థావరం... ఆందోళనకరంగా ఏరియా 51
అమెరికాకు అత్యంత కీలకమైన రహస్యమైన సైనిక స్థావరం పరిసర ప్రాంతాల్లో మంటలు వ్యాపించాయి. 40 డిగ్రీలకు పైగా నమోదవుతున్న ఉష్ణోగ్రతల కారణంగా అడవులు మంటల్లో చిక్కుకున్నాయి.
Area 51 Wildfire: అమెరికాలోని అత్యంత రహస్యమైన సైనిక స్థావరం 'ఏరియా 51' సమీపంలో దట్టమైన అడవులు, ఎడారి ప్రాంతాలు తీవ్రమైన దావానలంలో చిక్కుకున్నాయి. నెవాడా రాష్ట్రంలోని లింకన్ కౌంటీలో విరుచుకుపడిన ఈ 'క్వేల్ స్ప్రింగ్స్ ఫైర్' ఇప్పటివరకు 2,000 ఎకరాలకు పైగా విస్తీర్ణాన్ని కాలిబూడిద చేసింది. రహస్య సైనిక కార్యకలాపాలకు కేంద్రమైన ఏరియా 51కి వాయువ్యంగా ఈ మంటలు వేగంగా వ్యాపిస్తుండటం అంతర్జాతీయంగా ఆందోళన కలిగిస్తోంది.
క్వేల్ స్ప్రింగ్స్ ఫైర్
ఈ మంటలు అత్యంత నిర్జనమైన ప్రాంతంలో రగులుకోవడంతో, ప్రమాదానికి గల ఖచ్చితమైన మూలకారణాలు, మంటల తీవ్రతను అదుపు చేసే స్థాయిపై అధికారులు ఇంకా స్పష్టతనివ్వలేదు. అత్యవసర రక్షణ బృందాలు ఈ ప్రాంతాన్ని నిరంతరం పర్యవేక్షిస్తూ నిరోధక చర్యలు చేపడుతున్నాయి. యూరప్నుంచి వీస్తున్న వేడి గాలలతో అమెరికా ఉక్కిరిబిక్కిరి అవుతోంది. ఇప్పుడు మంటలు అంటుకోవడంతో ఈ పరిస్థితి మరింత దారుణంగా మారిపోయింది.
కాలిఫోర్నియాలోనూ తీవ్రరూపం దాల్చిన డోవ్ ఫైర్
మరోవైపు కాలిఫోర్నియాలోని తుయోలమ్నే కౌంటీలో 'డోవ్ ఫైర్' పేరిట చెలరేగిన మరో దావానలం జనవాసాలను భయకంపితులను చేస్తోంది. సనోరా నగరం సమీపంలోని మిల్ విల్లా ప్రాంతంలో ప్రారంభమైన ఈ మంటలు క్షణాల్లో 50 ఎకరాలకు పైగా విస్తరించాయి. మక్కెబ్బన్ డ్రైవ్, గోల్డెన్ డోవ్ లేన్, సౌత్గేట్ రోడ్ వంటి ప్రాంతాల్లోని ప్రజలను వెంటనే ఇళ్లను ఖాళీ చేయాలని షెరీఫ్ కార్యాలయం ఆదేశించింది. అంతేకాదు, అగ్నిమాపక యంత్రాల కదలికల కోసం హైవే 108, స్టాక్టన్ రోడ్డు మార్గాలను అధికారులు తాత్కాలికంగా మూసివేశారు. ఇక, నిరాశ్రయులైన పెంపుడు జంతువుల కోసం ప్రత్యేక తాత్కాలిక పునరావాస కేంద్రాలను ఏర్పాటు చేశారు. మంటల్లో చిక్కుకున్న వాటిని రక్షించి పునరావాస కేంద్రాలకు తరలిస్తున్నారు.
వాతావరణ పరిణామాలు
ఎండిపోయిన వృక్షసంపద, 40 డిగ్రీలకు పైగా నమోదవుతున్న విపరీతమైన ఉష్ణోగ్రతలు, గంటకు కిలోమీటర్ల వేగంతో వీస్తున్న గాలులు మంటలను మరింత తీవ్రతరం చేస్తున్నాయి. అమెరికా పశ్చిమ తీరంలో తరచూ ఏర్పడే ఈ అగ్నిప్రమాదాలు కేవలం అటవీ ప్రాంతాలనే కాక, వ్యూహాత్మకంగా ప్రాముఖ్యత కలిగిన సైనిక స్థావరాల భద్రతను కూడా ప్రశ్నార్థకం చేస్తున్నాయని అంతర్జాతీయ విశ్లేషకులు భావిస్తున్నారు. ఇప్పటి వరకు నెవెడా ప్రాంతంలో ఏరియా 51 అత్యంత సురక్షితంగా భావించినా... ఇప్పుడు ఆ ప్రాంతంపై ప్రకృతి కన్నెర్ర చేయడంతో... మంటల్లో చిక్కుకున్నది.
Balachander
బాలచందర్ పెళ్లూరి తెలుగు మీడియా రంగంలో 12 ఏళ్లకు పైగా అనుభవం కలిగిన సీనియర్ న్యూస్, పొలిటికల్, భక్తి కంటెంట్ రైటర్, ఎడిటర్. హైదరాబాద్ కేంద్రంగా టీవీ, డిజిటల్ జర్నలిజంలో పనిచేశారు. పొలిటికల్ విశ్లేషణ, ఆధ్యాత్మిక రచనల్లో నైపుణ్యం కలిగి, పొలిటికోస్, ఎన్టీవీ డిజిటల్, మల్లెమాల ఎంటర్టైన్మెంట్లో సేవలందించారు. ఎడిటోరియల్ లీడర్షిప్, కథనం చెప్పే శైలిలో ప్రత్యేక గుర్తింపు పొందారు.