Australia fuel reserve: ఆస్ట్రేలియా సరికొత్త ఇంధన వ్యూహం... చమురు సంక్షోభంపై భద్రతా పోరాటం

Australia fuel reserve: ప్రపంచవ్యాప్తంగా ఇంధన సంక్షోభం ముదురుతున్న వేళ, ఆస్ట్రేలియా ప్రభుత్వం తన దేశ ఇంధన భద్రతను కాపాడుకునేందుకు ఒక భారీ వ్యూహాన్ని ప్రకటించింది. సుమారు 10 బిలియన్ ఆస్ట్రేలియన్ డాలర్ల అంటే 7.22 బిలియన్ అమెరికన్ డాలర్ల భారీ వ్యయం చేసేందుకు ప్రధాని ఆంథోనీ అల్బనీస్ పచ్చజెండా ఊపారు. ప్రపంచ సరఫరా గొలుసులో తలెత్తే ఆకస్మిక అడ్డంకుల నుండి దేశాన్ని రక్షించడమే ఈ నిర్ణయం వెనుక ఉన్న ప్రధాన ఉద్దేశ్యం. పశ్చిమాసియాలో ఉద్రిక్తతలు రోజుకో మలుపు తిరుగుతున్న నేపథ్యంలో ప్రపంచదేశాలు ఇంధన భద్రతపై దృష్టిసారించాయి.

సొంత ఇంధన నిల్వలు - ఒక రక్షణ కవచం

ఆస్ట్రేలియా ప్రస్తుతం తన ఇంధన అవసరాల కోసం దాదాపు 80 శాతం దిగుమతులపైనే ఆధారపడుతోంది. ముఖ్యంగా మధ్యప్రాచ్యంలోని 'హోర్ముజ్ జలసంధి'లో నెలకొన్న దిగ్బంధనం కారణంగా ఆస్ట్రేలియాలోని పలు ప్రాంతాల్లో చమురు కొరత ఏర్పడింది. ఈ పరిస్థితిని అధిగమించేందుకు ప్రభుత్వం ఇప్పుడు సొంతంగా ఇంధన నిల్వలను ఏర్పాటు చేస్తోంది. ఈ నేపథ్యంలో కొత్తగా 100 కోట్ల లీటర్ల సామర్థ్యం కలిగిన చమురు నిల్వ క్షేత్రాలను ఏర్పాటు చేస్తున్నది. ఏదైనా అత్యవసర పరిస్థితి తలెత్తితే దేశం మొత్తం మీద సుమారు 50 రోజులపాటు ఎటువంటి ఇబ్బంది లేకుండా నడిచేలా ఈ నిల్వలు ఉపయోగపడతాయి. ప్రధాన నగరాలతో పాటు, సరఫరా తక్కువగా ఉండే మారుమూల ప్రాంతాలకు ఇంధనం అందేలా ఈ నిల్వ కేంద్రాలను ఏర్పాటు చేస్తున్నారు.

ఇంధన సార్వభౌమాధికారం అంటే ఏమిటి?

"ఇది కేవలం చమురు దాచుకోవడం కాదు, మన దేశ ఇంధన సార్వభౌమాధికారాన్ని కాపాడుకోవడం" అని ప్రధాని అల్బనీస్ స్పష్టం చేశారు. విదేశీ శక్తులపై అతిగా ఆధారపడటం వల్ల దేశ ఆర్థిక వ్యవస్థ కుప్పకూలకుండా ఉండాలంటే, ఇలాంటి ముందస్తు జాగ్రత్తలు తప్పనిసరి. కేవలం యుద్ధ సమయాల్లోనే కాకుండా, అంతర్జాతీయ వాణిజ్య వివాదాలు తలెత్తినప్పుడు కూడా ఈ నిల్వలు ఆస్ట్రేలియాకు ఒక రక్షణ కవచంలా నిలుస్తాయి. ఈ భారీ పెట్టుబడి ద్వారా ఆస్ట్రేలియా తన ఇంధన అవసరాల విషయంలో స్వయం సమృద్ధి సాధించడమే కాకుండా, భవిష్యత్తులో రాబోయే ఏ విధమైన ఇంధన సంక్షోభాన్ని అయినా ధైర్యంగా ఎదుర్కొనే స్థితికి చేరుకుంటుంది. ఇంధనం అనేది దేశ గమనానికి చక్రం లాంటిది, ఆ చక్రం ఆగిపోకుండా చూడటమే ఈ '10 బిలియన్ డాలర్ల' ప్లాన్ వెనుక ఉన్న అసలు రహస్యం. ఆస్ట్రేలియా ముందస్తు జాగ్రత్తగా తీసుకుంటున్న ఈ చర్యలను అటు ప్రతిపక్షాలు కూడా స్వాగతిస్తున్నాయి.