Nvidia AI Chip Smuggling: చైనాకు ఎన్విడియా ఏఐ చిప్‌ల అక్రమ రవాణా.. తెర వెనుక అసలు సూత్రధారి ఎవరంటే

చైనాకు ఎన్విడియా ఏఐ చిప్‌ల అక్రమ రవాణా వెనుక లీ మింగ్ పాత్ర ఏమిటి? మెగాస్పీడ్ కంపెనీ, ఆగ్నేయాసియా వ్యాపార నెట్‌వర్క్, అమెరికా ఎగుమతి ఆంక్షల ఉల్లంఘన ఆరోపణల పూర్తి వివరాలు తెలుసుకుందాం.

Rudrachander
Published on: 22 Nov 2026 6:06 PM IST
Nvidia AI Chip Smuggling: చైనాకు ఎన్విడియా ఏఐ చిప్‌ల అక్రమ రవాణా.. తెర వెనుక అసలు సూత్రధారి ఎవరంటే
X

Nvidia AI Chip Smuggling: ప్రపంచవ్యాప్తంగా ఆర్టిఫిషియల్ ఇంటెలిజెన్స్ రంగంలో పోటీ పెరుగుతున్న వేళ.. అత్యాధునిక కంప్యూటర్ చిప్‌ల సరఫరా అంతర్జాతీయ రాజకీయాల్లో కీలక అంశంగా మారింది. ముఖ్యంగా చైనాకు ఎన్విడియా తయారు చేసిన అధునాతన ఏఐ చిప్‌లు చేరకుండా అమెరికా ఎగుమతి ఆంక్షలు విధించింది. అయితే ఈ నిబంధనలను పక్కదారి పట్టించి చైనాకు చిప్‌లు సరఫరా చేసేందుకు ఆగ్నేయాసియాలో పెద్ద నెట్‌వర్క్ పనిచేసినట్లు వాల్ స్ట్రీట్ జర్నల్ సంచలన కథనం వెల్లడించింది. సింగపూర్‌కు చెందిన మెగాస్పీడ్ సంస్థలో ఆలిస్ హువాంగ్ బయటకు కనిపించే వ్యక్తి మాత్రమేనని, అసలు వ్యవహారాలను చైనా వ్యాపారవేత్త లీ మింగ్ నడిపించినట్లు నివేదిక పేర్కొంది.

తెర వెనుక లీ మింగ్ పాత్ర

52 ఏళ్ల లీ మింగ్ ఆగ్నేయాసియాలో పలు కంపెనీలను ఏర్పాటు చేసి, వాటి ద్వారా ఎన్విడియా చిప్‌లతో కూడిన కంప్యూటర్ సర్వర్లను చైనాకు మళ్లించే ప్రయత్నం చేసినట్లు WSJ తెలిపింది. మెగాస్పీడ్‌లో ఆలిస్ హువాంగ్ ఉన్నత పదవిలో ఉన్నప్పటికీ, కీలక వ్యాపార నిర్ణయాల్లో లీ మింగ్‌దే ప్రధాన పాత్రగా ఉందని నివేదిక పేర్కొంది. ఎన్విడియా చిప్‌ల వ్యాపారంలో ఉన్న మరికొన్ని సంస్థలతోనూ ఆయనకు సంబంధాలున్నట్లు వెల్లడించింది. ఈ వ్యవహారంలో సింగపూర్‌లో గత ఏడాది ఫిబ్రవరిలో లీ మింగ్‌పై మోసం కేసు నమోదైంది. అమెరికా సరఫరాదారులకు తప్పుడు సమాచారం ఇచ్చి, ఎన్విడియా చిప్‌లు అమర్చిన సర్వర్లు సింగపూర్‌లోని తన కంపెనీ అవసరాల కోసమేనని నమ్మించినట్లు అభియోగాలు ఉన్నాయి. కానీ ఆ పరికరాలను తొలుత మలేషియాకు, అక్కడి నుంచి మరో గుర్తుతెలియని దేశానికి తరలించినట్లు సింగపూర్ ప్రాసిక్యూటర్లు ఆరోపించారు. ప్రస్తుతం లీ మింగ్ బెయిల్‌పై ఉన్నట్లు సమాచారం. అయితే మెగాస్పీడ్‌ను ఆ కేసులో నిందిత సంస్థగా చేర్చలేదు.

ఆలిస్ హువాంగ్‌కు ఉన్న సంబంధాలపై దర్యాప్తు

లీ మింగ్‌కు ఆలిస్ హువాంగ్, ఆమె భర్త కాంగ్ వీతో చాలాకాలంగా వ్యాపార సంబంధాలు ఉన్నట్లు నివేదిక వెల్లడించింది. అమెరికా బైడెన్ ప్రభుత్వం చైనాకు అత్యాధునిక ఎన్విడియా చిప్‌ల ఎగుమతులపై ఆంక్షలు విధించిన తర్వాత, చైనా ఖాతాదారులకు కంప్యూటింగ్ సామర్థ్యాన్ని అందించేందుకు ఈ ముగ్గురూ ఆగ్నేయాసియాలో కంపెనీల నెట్‌వర్క్‌ను నిర్మించినట్లు కథనం పేర్కొంది. అంతేకాదు, మలేషియాలోని డేటా సెంటర్ల ద్వారా చైనా టెక్నాలజీ దిగ్గజం అలీబాబాకు మెగాస్పీడ్ కంప్యూటింగ్ సేవలు అందించినట్లు WSJ తెలిపింది. కొన్ని ఎన్విడియా సర్వర్లు నేరుగా చైనాకు చేరినట్లు కూడా అనుమానాలు వ్యక్తమయ్యాయి. అమెరికా, సింగపూర్ అధికారులు ఈ వ్యవహారంపై దర్యాప్తు చేస్తున్నారు. బిలియన్ల డాలర్ల విలువైన ఆంక్షల పరిధిలోని చిప్‌లను అక్రమంగా తరలించారనే అనుమానాలు ఉన్నాయి. అయితే తాము ఎగుమతి నిబంధనలను పాటిస్తున్నామని మెగాస్పీడ్ ఖండించింది.

ఎన్విడియా మాజీ సీఈఓ చుట్టూ వివాదం

ఈ వ్యవహారం ఎన్విడియా మాజీ సీఈఓ జెన్సెన్ హువాంగ్ వ్యక్తిగత జీవితానికి సంబంధించిన వివాదాలతోనూ ముడిపడింది. ఆలిస్ హువాంగ్‌తో తనకు సంబంధం ఉన్న విషయాన్ని నవంబర్ మొదట్లో ఉద్యోగులకు రాసిన లేఖలో జెన్సెన్ అంగీకరించి, కుటుంబ సభ్యులు, సహచరుల నమ్మకాన్ని దెబ్బతీసినందుకు క్షమాపణ చెప్పినట్లు నివేదిక పేర్కొంది. ఆలిస్‌కు చైనా నిఘా సంస్థలతో సంబంధాలున్నాయనే అనుమానాలను అమెరికా అధికారులు పరిశీలించినట్లు కూడా కథనం తెలిపింది. తైవాన్ అధికారులు సైతం ఆలిస్ హువాంగ్ ప్రయాణాలపై దర్యాప్తు నేపథ్యంలో ఆమె ప్రవేశ అనుమతిని రద్దు చేసి, తిరిగి రావడంపై నిషేధం విధించినట్లు సమాచారం.

ఏఐ పోటీలో చిప్‌ల ప్రాధాన్యం

ఈ ఉదంతం కేవలం ఒక కంపెనీ అక్రమ వ్యాపార ఆరోపణలకే పరిమితం కాదు. ఏఐ రంగంలో ఆధిపత్యం కోసం అమెరికా, చైనా మధ్య సాగుతున్న పోరాటాన్ని కూడా ఇది ప్రతిబింబిస్తోంది. అత్యాధునిక చిప్‌లు ఏఐ మోడళ్ల అభివృద్ధి, భారీ డేటా విశ్లేషణ, సూపర్ కంప్యూటింగ్‌కు కీలకం. అందుకే వాటి సరఫరాపై అమెరికా కఠిన నియంత్రణలు విధిస్తోంది. ఈ ఆంక్షలను మూడో దేశాల కంపెనీల ద్వారా అధిగమించే ప్రయత్నాలు జరిగితే, అది అంతర్జాతీయ వాణిజ్యంతో పాటు జాతీయ భద్రతకు సంబంధించిన సమస్యగా మారుతుంది. మెగాస్పీడ్ వ్యవహారంపై దర్యాప్తు పూర్తయితే, ప్రపంచ ఏఐ చిప్ సరఫరా వ్యవస్థపై మరిన్ని ప్రశ్నలు తలెత్తే అవకాశం ఉంది.

Rudrachander

Rudrachander

రుద్ర చందర్‌ తెలుగు మీడియా రంగంలో 12 ఏళ్లకు పైగా అనుభవం కలిగిన సీనియర్ న్యూస్, పొలిటికల్, భక్తి కంటెంట్ రైటర్, ఎడిటర్. హైదరాబాద్ కేంద్రంగా టీవీ, డిజిటల్ జర్నలిజంలో పనిచేశారు. పొలిటికల్ విశ్లేషణ, ఆధ్యాత్మిక రచనల్లో నైపుణ్యం కలిగి, పొలిటికోస్, ఎన్‌టీవీ డిజిటల్, మల్లెమాల ఎంటర్‌టైన్‌మెంట్‌లో సేవలందించారు. ఎడిటోరియల్ లీడర్‌షిప్, కథనం చెప్పే శైలిలో ప్రత్యేక గుర్తింపు పొందారు