Crude Oil Prices Surge: హర్మూజ్ దిగ్బంధనం?: 150 డాలర్లకు చేరనున్న చమురు ధర..

Crude Oil Prices Surge: అంతర్జాతీయ మార్కెట్‌లో చమురు ధరలు మళ్లీ భగ్గుమన్నాయి. ఇరాన్ మరియు అమెరికా మధ్య జరుగుతున్న శాంతి చర్చలు ఎటువంటి ఫలితం లేకుండా ముగియడంతో ప్రపంచవ్యాప్తంగా చమురు సరఫరాపై ఆందోళనలు మొదలయ్యాయి. కాల్పుల విరమణ ఒప్పందం జరుగుతుందన్న ఆశలతో గతంలో 100 డాలర్ల దిగువకు చేరిన బ్యారెల్ బ్రెంట్ క్రూడ్ ధర, ఇప్పుడు మళ్లీ 103 డాలర్లకు చేరుకుంది.

హర్మూజ్ జలసంధిపై ఉత్కంఠ:

అగ్రరాజ్యం అమెరికా అధ్యక్షుడు ట్రంప్ చేసిన హెచ్చరికలు మార్కెట్లను కుదిపేస్తున్నాయి. టెహ్రాన్‌కు అక్రమంగా టోల్ చెల్లించే ఏ నౌకనూ హర్మూజ్ జలసంధి గుండా వెళ్లనివ్వొద్దని ఆయన తన నౌకాదళాన్ని ఆదేశించారు. దీనికి ప్రతిగా ఇరాన్ ఐఆర్‌జీసీ (IRGC) కూడా తీవ్ర హెచ్చరికలు జారీ చేసింది. సీజ్ ఫైర్‌ను ఉల్లంఘించి ఏ సైనిక నౌక వచ్చినా ఉపేక్షించబోమని స్పష్టం చేసింది.

నిపుణుల హెచ్చరికలు:

ఓనిక్స్ క్యాపిటల్ గ్రూప్ మేనేజింగ్ డైరెక్టర్ జార్జ్ మోంటెపెక్ ఈ పరిణామాలపై ఆందోళన వ్యక్తం చేశారు. ట్రంప్ హెచ్చరికలు అమలులోకి వస్తే బ్రెంట్ క్రూడ్ ధర 140 నుంచి 150 డాలర్లకు చేరడం ఖాయమని ఆయన పేర్కొన్నారు.

ప్రస్తుతం హర్మూజ్ జలసంధి గుండా రోజుకు 12 మిలియన్ బ్యారెళ్ల చమురు సరఫరా జరుగుతోంది. దిగ్బంధనం అమలైతే ఈ సరఫరా నిలిచిపోయి ప్రపంచవ్యాప్త కొరత ఏర్పడుతుంది.

ఇప్పటి వరకు ఒక ప్రాంతానికే పరిమితమైన ఈ ఉద్రిక్తతలు, చమురు సంక్షోభం కారణంగా ప్రపంచ వ్యాప్త యుద్ధానికి దారితీయొచ్చని ఆయన అభిప్రాయపడ్డారు.

ప్రస్తుతానికి పూర్తి స్థాయి దిగ్బంధనం జరగకపోవచ్చని మార్కెట్ విశ్లేషకులు అంచనా వేస్తున్నప్పటికీ, పెరుగుతున్న ధరలు మాత్రం సామాన్యుడిపై భారంగా మారనున్నాయి.