Elon Musk: అమెరికాలో సంచలనం.. ట్రంప్ కోసం ఏకంగా 3500 కోట్లిచ్చిన ఎలాన్ మస్క్

Elon Musk: ప్రపంచ కుబేరుడు, స్పేస్‌ఎక్స్ సీఈఓ ఎలన్ మస్క్ అమెరికా రాజకీయాల్లో మరోసారి సంచలనం సృష్టిస్తున్నారు. అమెరికా మిడ్‌టర్మ్ ఎన్నికల్లో రిపబ్లికన్ పార్టీ విజయం సాధించేందుకు ఆయన మునుపెన్నడూ లేని విధంగా అత్యధిక నిధులను సమకూరుస్తున్నారు. డొనాల్డ్ ట్రంప్ నాయకత్వంలోని రిపబ్లికన్ పార్టీ తరఫున ప్రచారం చేయడానికి, కాంగ్రెస్ పై పట్టు సాధించడానికి మస్క్ ఇప్పటివరకు దాదాపు 366 మిలియన్ డాలర్లు (మన భారతీయ కరెన్సీలో సుమారు రూ.3,500 కోట్లు) ఖర్చు చేశారు. ఈ భారీ విరాళాలతో అంతర్జాతీయ స్థాయిలో ఒకే ఎలక్షన్ సైకిల్‌లో అత్యధిక పొలిటికల్ డొనేషన్ ఇచ్చిన వ్యక్తిగా ఆయన నిలిచారు.

పొలిటికల్ ఫండింగ్ వెనుక మస్క్ వ్యూహం

క్యాంపెయిన్ ఫైనాన్స్ రికార్డుల ప్రకారం మస్క్ జూలై నెల నుంచి ఇప్పటివరకు దాదాపు 276 మిలియన్ డాలర్లను రిపబ్లికన్ పార్టీకి అందించారు. అమెరికా ప్రతినిధుల సభ, సేనట్‌లో డెమోక్రటిక్ పార్టీ మళ్లీ ఆధిక్యం సాధించే అవకాశాలు కనిపించడమే దీనికి ప్రధాన కారణం. ఒకవేళ డెమోక్రాట్లు అధికారంలోకి వస్తే మస్క్‌కు చెందిన స్పేస్‌ఎక్స్ ప్రభుత్వ కాంట్రాక్టులతో పాటు ట్రంప్ హయాంలో ఆయన నేతృత్వం వహించిన డిపార్ట్‌మెంట్ ఆఫ్ గవర్నమెంట్ ఎఫిషియెన్సీ (DOGE) వ్యవహారాలపై విచారణ జరిపే ప్రమాదం ఉంది. ఈ ముప్పు నుంచి తప్పించుకోవడానికే మస్క్ రిపబ్లికన్ల విజయం కోసం నీళ్లలా పైసలు ఖర్చు చేస్తున్నారు.

అమెరికా ప్యాక్ ద్వారా ప్రచారం

న్యూయార్క్ టైమ్స్ నివేదిక ప్రకారం.. మస్క్ ప్రధానంగా హోరాహోరీ పోరు సాగుతున్న బ్యాటిల్‌గ్రౌండ్ రాష్ట్రాల్లోని ప్రచారానికి ప్రాధాన్యత ఇస్తున్నారు. రిపబ్లికన్ పార్టీకి చెందిన సీనెట్ లీడర్‌షిప్ ఫండ్‎కు ఏకంగా 158 మిలియన్ డాలర్లు అందించారు. ఇది అమెరికా రాజకీయ చరిత్రలోనే ఒక వ్యక్తి ఇచ్చిన అతిపెద్ద పొలిటికల్ డొనేషన్‌గా రికార్డులకెక్కింది. దీనికి తోడు ముప్పైకి పైగా సీట్లలో పోటీ చేస్తున్న రిపబ్లికన్ అభ్యర్థుల తరఫున చురుగ్గా ప్రచారం చేయడానికి మస్క్ స్వయంగా స్థాపించిన అమెరికా ప్యాక్ అనే గ్రూప్‌కు మరో 76 మిలియన్ డాలర్లు విరాళంగా ఇచ్చారు.

ట్రంప్‌తో విభేదాలు

గత ఏడాది జనవరిలో ప్రభుత్వ వ్యయాన్ని తగ్గించే దిశగా ట్రంప్ ప్రభుత్వం మస్క్‌ను డిపార్ట్‌మెంట్ ఆఫ్ గవర్నమెంట్ ఎఫిషియెన్సీ ఇన్‌ఛార్జ్‌గా నియమించింది. అయితే ఆ తర్వాత కొద్ది నెలలకే ఇద్దరి మధ్య కొన్ని తీవ్రమైన అభిప్రాయ భేదాలు తలెత్తాయి. ఆ వివాదాలను పక్కనబెట్టి మస్క్ మళ్లీ ట్రంప్ వర్గానికి దగ్గరయ్యారు. ఇటీవల వైట్‌హౌస్‌లో జరిగిన ప్రత్యేక కార్యక్రమంలో డొనాల్డ్ ట్రంప్ మస్క్‌ను అత్యంత ప్రతిష్టాత్మకమైన నేషనల్ మెడల్ ఆఫ్ సైన్స్ పురస్కారంతో సత్కరించారు. సాంకేతిక రంగానికి ఆయన చేస్తున్న సేవలను కొనియాడుతూ ట్రంప్ మస్క్‌ను నేటి యుగం నాటి ఎడిసన్ అని ప్రశంసించారు.

ప్రభుత్వ కాంట్రాక్టులు, వైట్‌హౌస్‌పై ప్రభావం

ఎలన్ మస్క్ నడుపుతున్న వ్యాపార సామ్రాజ్యానికి అమెరికా ప్రభుత్వ కాంట్రాక్టులు అత్యంత కీలకం. నాసా, యుఎస్ మిలిటరీ స్పేస్‌ఎక్స్ సేవలపై ఎంతగానో ఆధారపడుతున్నాయి. పొలిటికల్ ఫండింగ్ ద్వారా వైట్‌హౌస్‌లో తన ప్రభావాన్ని నిలబెట్టుకోవడంతో పాటు, తన వ్యాపార ప్రయోజనాలను కాపాడుకోవడం మస్క్ ప్రధాన లక్ష్యంగా ఉంది. వచ్చే ఎన్నికల ఫలితాలు అమెరికా రాజకీయాలతో పాటు మస్క్ వ్యాపార భవిష్యత్తును కూడా శాసించే అవకాశం ఉంది.