Elon Musk: భార‌త్‌లో ఎందుకిలా జ‌రుగుతోంది..? ఎలాన్ మ‌స్క్ ఆందోళ‌న

Elon Musk: ప్రపంచంలో అత్యధిక జనాభా కలిగిన దేశంగా నిలిచిన భారత్ ఇప్పుడు మరో కీలక జనాభా మార్పును ఎదుర్కొంటోంది. దేశంలో జననాల సంఖ్య క్రమంగా తగ్గుతుండటం జనాభా నిపుణులను ఆందోళనకు గురి చేస్తోంది. తాజాగా ఈ అంశంపై ప్రముఖ పారిశ్రామికవేత్త, టెస్లా సీఈఓ మ‌స్క్ స్పందించారు.

టీఎఫ్‌ఆర్ అంటే ఏమిటి.. ఎందుకు కీలకం?

భార‌త్‌లో జననాల సంఖ్య క్రమంగా తగ్గుతుండటం జనాభా నిపుణులను ఆందోళనకు గురి చేస్తోంది. తాజాగా ఈ అంశంపై ప్రముఖ పారిశ్రామికవేత్త, టెస్లా సీఈఓ ఎలాన్ మ‌స్క్‌ కూడా స్పందించడం చర్చనీయాంశంగా మారింది. భారతదేశంలో సంతానోత్పత్తి రేటు ఇప్పటికే జనాభా స్థిరత్వానికి అవసరమైన స్థాయి కంటే దిగువకు చేరిందని ఆయన పేర్కొన్నారు.

టోటల్ ఫెర్టిలిటీ రేట్ (TFR) అంటే ఒక మహిళ తన జీవితకాలంలో సగటున ఎంతమంది పిల్లలకు జన్మనిస్తుందో సూచించే గణాంకం. ఏ దేశమైనా తన జనాభాను స్థిరంగా కొనసాగించాలంటే ఈ రేటు కనీసం 2.1గా ఉండాలని జనాభా శాస్త్రవేత్తలు చెబుతారు. దీనినే "రీప్లేస్‌మెంట్ లెవెల్" అని పిలుస్తారు.

ఇటీవల విడుదలైన గణాంకాల ప్రకారం, భారత్‌లో టీఎఫ్‌ఆర్ గత దశాబ్దంలో 2.3 నుంచి 1.9కి తగ్గింది. అంటే కొత్త తరాలు, పాత తరాలను పూర్తిగా భర్తీ చేసే స్థాయికి కూడా జననాలు జరగడం లేదన్న మాట. దీర్ఘకాలంలో ఇది జనాభా నిర్మాణంపై ప్రభావం చూపే అవకాశం ఉంది.

ఎలాన్ మస్క్ వ్యాఖ్యలు ఎందుకు ప్రాధాన్యం సంతరించుకున్నాయి?

భారత్‌లో జననాల రేటు తగ్గుతున్న అంశానికి సంబంధించిన ఒక అంతర్జాతీయ వార్తా కథనాన్ని ఎలాన్ మస్క్ తన ఎక్స్ ఖాతాలో పంచుకున్నారు. ఈ సందర్భంగా ఆయన, భారతదేశంలో జననాల రేటు చాలా కాలం క్రితమే రీప్లేస్‌మెంట్ స్థాయి కంటే దిగువకు చేరిందని వ్యాఖ్యానించారు.

ముఖ్యంగా విద్యావంతుల వర్గాల్లో సంతానోత్పత్తి రేటు మరింత వేగంగా పడిపోతున్న అంశాన్ని ఆయన ప్రస్తావించారు. భవిష్యత్తులో అనేక దేశాలు ఎదుర్కొనే జనాభా సంక్షోభం భారత్‌కూ సవాల్‌గా మారవచ్చని గతంలో కూడా మస్క్ పలుమార్లు హెచ్చరించిన విషయం తెలిసిందే.

రాష్ట్రాల మధ్య భారీ వ్యత్యాసాలు.. భవిష్యత్తుపై నిపుణుల హెచ్చరిక

దేశవ్యాప్తంగా టీఎఫ్‌ఆర్ తగ్గుతున్నప్పటికీ అన్ని రాష్ట్రాల్లో పరిస్థితి ఒకేలా లేదు. దేశ‌ రాజధాని ఢిల్లీలో సంతానోత్పత్తి రేటు సుమారు 1.2 వరకు పడిపోయింది. అలాగే త‌మిళ‌నాడుతో పాటు దక్షిణ భారత రాష్ట్రాల్లో కూడా జననాల రేటు గణనీయంగా తగ్గినట్లు గణాంకాలు సూచిస్తున్నాయి. మరోవైపు బిహార్‌, జార్ఖండ్‌, ఉత్త‌ర‌ప్ర‌దేశ్‌, రాజ‌స్థాన్ వంటి రాష్ట్రాల్లో మాత్రం టీఎఫ్‌ఆర్ ఇంకా 2.1 కంటే ఎక్కువగానే ఉంది.

నిపుణుల అభిప్రాయం ప్రకారం, జననాల రేటు దీర్ఘకాలం పాటు తక్కువగానే కొనసాగితే దేశంలో వృద్ధుల జనాభా శాతం పెరుగుతుంది. దాంతో ఉద్యోగ రంగం, ఆర్థిక వృద్ధి, సామాజిక భద్రతా వ్యవస్థలపై అదనపు ఒత్తిడి ఏర్పడే అవకాశం ఉంటుంది. అందుకే జనాభా నిర్మాణంలో జరుగుతున్న ఈ మార్పులను ప్రభుత్వాలు, విధాన నిర్ణేతలు నిశితంగా పరిశీలిస్తున్నాయి.